14 Feb 2006

عزيزي الدكتور المحترم احمد عكاشة...........

قريت علي مدونه من شويه تحليل د/احمد عكاشه للأسباب النفسيه اللي وري تصرفات الناس اللي كانت بتشجع يوم مباراة الكونغو وقت دقيقة الحداد اما قعدوا يهيصّوا واتخنقت ماقدرتش اكمل... اصلي مش محتاجه شهادات الدكتور احمد عكاشه (مع احترامي لشهاداته) ولا لازم يبقي عندي مستشفي خاصه زي بتاعته (اللهم لا حسد) ولا محتاجه اتفرج علي شباب جيلي كأنهم قرود في جبلايه عشان اعرف ما بيتنططوش ليه... السبب بسيط.. عشان كل واحد حاسس ان البلد عامله زي البير الضلمه الغويط ترمي فيه القرش ماتسمعلوش رنّه... تنده ماتسمع لصوتك صدي... ترمي نفسك تتخنق وتموت قبل ماتوصل للقاع.. ولو حاولت تعمل دكر وتجيب سلم تنزل تشوف اللي بيحصل..... العفاريت اللي ساكنه في القعر هتشدك وتاخد السلم تستدرج بيبه الناس اللي عندها امل وبتروح ناحية البير... وكلنا عارفين ومتأكدين ان في ناس ولاد كلب قاعدين في القعر تحت بيكوشوا علي كل اللي بيتحدف من فوق علي اعتبار ان كلّه بينفع... فكانت النتيجه ان معدش حد مننا بيقرب م البير واللي بيروح ولسه عنده امل ... يا اما نخاف عليه "هتروح فيه يابني دي سكة اللي يروح مايرجعش".... يا اما بنتقلب علي قفانا من الضحك "هترمي ايه ياهبل كله بيقع في الكروش اللي تحت والبير مالوش قرار"...وياريت لو حد عرف ينزل يبعتلي رساله مع عفريت يقولي احمد عكاشة في القعر بيكوّش والا يطلع موقعه فين....... يا دكتور احمد احنا القرود واحنا اللي عارفين احنا ما بنتنططش ليه اجري علي اكل عيشك وسيبنا في حالنا مش ناقصين حد يجي يخنق فينا... احنا جيل الوكسه يا بيه... تعرف تشيل الوكسه من علي قفانا شيلها ماتعرفش مالكش دعوه بقي نعمل ايه في وكستنا... انا معرفش كتير عن د/ احمد ومعنديش ناحيته اي مشاعر سلبيه ولا آخذ عليه اي شيء بس مابحبش حد يعمل فيها العلّامه الفهّامه حتي لو هو علّامه وفهّامه عشان لو هو بيفهم وانا مبفهمش مش فارقه..... احنا الاتنين مبنعملش حاجه ولا بنغير شيء....مش طالبه ييجي هو والعلّامات الفهّامين التانيين يِنْجِعصوا علي كراسيهم وكل واحد يعدل نضارته ويبصلنا بعمق بعدين يقول علينا مرضي وعندنا مشاكل... طب ماحنا عارفين يابيه وربنا يديم عليك صحتك النفسيه.... عندك وقت تسمع نعبيلك مشاكلنا في شِوِلَه (جمع شوال)؟؟؟ والا عندك اماكن لينا في المستشفي بتاعتك تعالجنا كلنا؟؟؟... اتفضلوا اقعدوا يا دكاتره... جمبينا وانتوا تعرفوا احنا عاملين زي الزومبيز ليه وليه كل واحد فينا شايل حياته قَتَب علي ضهره... وعلي رأي محمود عبد العزيز في فيلم جري الوحوش" انا عايز اعرف حاجه واحده بس يا دكتور... القرد بيتنطط والّا بطّل تنطيط؟؟؟؟؟"
----------------------
الزومبيز= zombies

2 comments:

ayah aman said...

اية يا حجة كمية الحقد .. اللي انتي عايشة فيها دي

انا لا كبيرة ولا ببصلك من ورا نظارة ولا من كرسي عالي
بس ليا ليكي رسالة
يعني المفروض يكون في احترام شوية
وتعرفي توظفي نقدك صح
على الاقل علشان تلاق ياللي يسمعلك
انما اية مسورة واتفتحت شتايم .. وكلام فارغ
انتي اصلا تعرفي ميين اللي انتي بتنقدية دة
قدمتي انتي اية للدنيا ولا لبلدك ولا لدينك ... علشان تتكلمي وتكوني بالمرصاد كدة للناس
يا سبحان الله
ربنا يكملك بعقل سليم يا بنتي

Anonymous said...

احيانا بيكون هدف النقد هو النقد
الأخت صاحبة هذا المقال
تحية طيبة
...
ربنا سبحانه وتعالي ادانا عقلنا عشان نفكر ونبتكر بيه . انما لو لغينا جانب الأبتكار ساعتها هانبقي بنقلد اسلوب معين من التفكير او اسلوب معين من طريقة الكلام بدون فهم الهدف من الكلام اية. لأن الهدف من الكلام بيبقي الوصول لأسلوب معين فى الكلام او فى طريقة التفكير
....
بعد ما قريت مقالك قريته كمان مرة بهدف انى افهم انتى عايزة توصلي لأية.لكن للأسف ماعرفتش اية الى انتى عاوزة توصليله
...
الدكتور احمد عكاشة استاذ فاضل وانا بحب اسمعله واقراله لأنى بستفيد