وانت ماشى فى الشارع وواحد كعبلك منغير قصد فوقعت على جمب وجزمتك اتقلعت وبعد ماقومت تلاقى جزمتك اللى اتقلعت عدت عليها عربيه فعصتها... ناس كتير هيقولولك ده مجرد تزامن وناس هتقولك حظ وناس هتقولك دى العنايه الالهيه وناس هتقولك اصل اجلك لسه مافرغش.. بسمع كلمة فراغ الاجل دى واضحك للتشبيه العجيب..... كأننا كوبايات.. كانت مليانه بعدين ابتدت ينقص.. زى الساعه الرمليه اللى اتقلبت او سبق وبدأ.. سيجاره واتولعت.. اتشربت بمزاج او منغير مزاج مش فارقه هتخلص هتخلص مهما حاولت تحرص عليها... بس الكعبله دى بقى ايه علاقتها بأى حاجه؟؟ هل مفروض الواحد يتعلم منها انه يمشى منتبه؟ والا المفروض انه يتعلم منها ان موته سهل ووارد فى اى لحظه انه يتفعص زى جزمته اللى اتهرست من ثانيتين مطرح ماكان ماشى؟... هل هى صدفه والا دى اللى بيقولوا عليها تصاريف القدر.. والا المفروض الواحد ينفض هدومه وينتعل بقايا الحذاء ويمضى الى حال سبيله ويعمل عبيط!!!!... والا الحاجات دى بتحصل عشان الواحد يبدا يفكر فى الحجات دى بتحصل ليه؟؟؟... كل رد فع من دول ممكن يبدو فى منتهى الحكمه والعقلانيه اذا استمعنا الى منطقه.. بس مش ده الغريب.. الغريب هو مدى حياكه الموقف بدقه لا ماتنهيه.. يعنى لو اللى خبطك ده مفاتيحه وقعت على الارض قبل مايخبطك ووطى يجيبها مكن خبط فيك وكنت لزقت فى عجل العربيه بدل جزمتك، بس فى نفس الوقت لو الرجال اللى سايق العربيه نسى مفاتيح عربيته فوق الكومود فى بيتهم ورجع يجيبه مكنش فعص جزمتك... فرص الموت والبقاء ماشيين فى خطين جمب بعض لا بيتوازوا تماما ولا بيتقاطعوا تماما.. ساعات بيقربوا وساعات بيبعدوا بس بيفضلوا ماشيين جمب بعض.. لما بتحصل حاجه زى دى انا بستغرب... مع انى ببقى مقتنعه تماما ان ربنا هو اللى نجانى.. لان مفيش حد تانى عنده القدره على ترتيب الامور بالطريقه دى.. بس بستغرب لانى بستكتر على نفسى وزنه الامور للدرجه دى وترتيب الامور دى كلها عشانى...... يمكن تكون الحاجات دى بتحصل عشان الواحد يحس بعدها انه نجى من الموت ويقوم ينفض بنطلونه ويبص على جزمته المتفعصه ويفطس من الضحك ويورح بيتهم حافى يحكى لاهله وصحابه على الموته الفطيس اللى كان هيموتها لكن ربناااااااا ستررررررررررررر... بس برده الموضوع مش حياه وموت بس... الموضوع حاجات تانيه كتير بتحصل بنفس الطريقه.. زى مثلا انك تبقى مش معاك رخص وتبقى رايح اوتوستوراد تلاقى نفسك طلعت كوبرى غلط ولبست فى مشوار كورنيش وبعدين تكتشف ان الاوتوستوراد كان فيه لجنه ولو كنت مشيت من هناك كانت العربيه اتسحبت منك.... وزى مثلا انك نفسك تهفك على شاورمه تروح تجيب ساندوتشين ونفسك تتسد متقدرش تاكل غير واحد وييجى حد ميت من الجع يقولك ممعكش حاجه تتاكل. فى ساعات كده احنا بنعملها واحنا مش عارفين احنا بنعملها ليه يمكن مش دايما بناخد بالنا اننا لو مكناش عملنا الحاجه دى مكنش حصل كذا وكذا. احنا كلنا مربوطين ببعض حتى لو ماخدناش بالنا.. واى حاجه بتعملها ممكن تؤذي او تفيد ناس انت متعرفهاش وممكن ناس متعرفكش تؤذيك او تنفعك منغير مايعرفوك..
