كان ياما كان فى هذا العصر والأوان.. كان فى بنوته قطقوطه صحيت من النوم لقت دراعها بيوجعها اوى. استنتجت انه اتلوح وهى نايمه.. تانى يوم تازم الامر فاضطرت الى ربط دراعها برباط ضاغط وخرجت من منزلها لممارسة حياتها الطبيعيه فصار الآتى:
شخص 1: ايه ده!!!!! مين عمل فيكى كده!!!!!
ام دراع ملووح: ولله معرفش انا قمت من النوم لقيت دراعى بيوجعنى تقريبا اتلوح وانا نايمه :(
شخص 1: لا لا لا مش ممكن مفيش حد دراعه بيتلوح وهو نايم
----------------------------------------
شخص 2: ايه يابنتى ده!!!! دخلتى فى قطر والا ايه؟؟؟؟؟
ام دراع ملووح: لا
شخص 2: امال ايه!!!
ام دراع: ضربت واحد سألنى انتى دخلتى فى قطر والا ايه...
شخص 2: هاهاهاها لأ بجد ايه قطم دراعك كده؟
ام دراع: زى مابقولك كده... تحب التانى يتلوح على جنابك عشان تصدق؟؟؟؟؟؟؟؟
----------------------------------------
شخص 3: ايه ده!!!! حصل ايه؟ ايه الّلى لوح دراعك كده؟!!!!!
ام دراع ملووح: لا ابدا كنت بلعب مع التنين بتاعى وهزرنا هزار تقيل شويه
شخص 3: والتنين جراله حاجه؟
ام دراع ملووح: الله يرحمه بقى
----------------------------------------
شخص 4: ايه ده؟ خناقه دى والا ايه؟
ام دراع ملووح: لا انا برده وش خناقات!!!!!
شخص 4: امال ايه؟
ام دراع ملووح: كنت بلعب ماتش مصارعه مع الحيطه
شخص4: يا حلاوه!!! ومين اللى كسب؟
ام دراع ملووح: اظن النتيجه واضحه....... احرزت التفوق وحصلت على الميداليه الذهبيه ورفعت راس مصر
شخص4: واللى ياخد الذهبيه برده دراعه يتلوح!!!!
ام دراع ملووح: ماهى دى ضريبة المجد.. كله فدى مصر
----------------------------------------
شخص 5: ايه اللى عمل فيكى كده!!!!!
ام دراع ملووح: ابدا اصلى بمشى وانا نايمه
شخص 5: ايه ده بجد!!! طيب ماتروحى لدكتور يعالجك كده خطر
ام دراع ملووح: مانا روحت.. والدكتور اتعدى منى وطردنى بعد تالت جلسه
----------------------------------------
شخص 6: ايه ده!! ايه اللى عمل فيكى كده؟
ام دراع ملووح: تفتكر انت ايه؟
شخص 6: حد ضربك اكيد
ام دراع ملووح: اما هو اكيد بتسأل ليه؟؟؟؟
----------------------------------------
شخص 7: هو الرباط اللى انتى رابطاه ده بكام؟؟؟
ام دراع ملووح: مش فاكره والله اصله عندى من زمان
----------------------------------------
