العلبه دى فيها فيل

من قد سنتين اتعرفت على راجل انجليزى محترم سمانى نينا هاركر وللعلم ده اسم البنيه المهروشه اللى وقعت فى غرام المرحوم دراكولا الله ينشف دمه... المهم من فتره قصيره اتفرجت على فيلم دراكولا بتاع الخواجه انتونى هوبكنز فعجبنى اوى.. والمصادفه البنت اللى عامله نينا هاركر " وينونا رايدر" دايما بتقص شعرها قصير وهى سفروته زى حالاتى وعندها برده مشاكل فى زياده الوزن.... كنت بسمع دلوقتى الساوند تراك بتاع الفيلم سألت نفسى هل ياترى انا فعلا ممكن احب واحد زى دراكولا كده فى يوم من الايام؟؟... افتكرت انى كنت دايما بفكر انى هقع فى غرام واحد زى دكتور هانيبال ليكتر اللى عمله انتونى هوبكنز فى صمت الحملان وهو نفسه اللى كان عامل دكتور فان-هيلسنج فى فيلم دراكولا..... قلت اللهم اغزيك يا شيطان واخدتلى بق كابوتشينو كمان.. ببص كده لمحت على الارض الست شجرة الدر ملموم حواليها الستات بيضربوها بالقباقيب وانا مرميه على الارض من كتر الضحك وجنبى الطاووس ولابسه هدوم مضحكه كده من اللى كانت فى فيلم وا اسلاماه.. بس مشعارفه انا كنت بضحك على شجرة الدر وهى بتضرب بالقبابيب والا على الهدوم اللى كنت لابساها.. صعبت عليه اوى شجرة الدر...... ويوليوس قيصر قطع قلبى وهو بيتدور يلاقى بروتس واقف معاهم .. اىىىىىىىىىىى حتى انت يا بروتس.... وفى وسط ده كله افتكرت ناس واحشينى اوى وناس تانيه واطيه عملوا فيه فصول فكرتنى بضرب القباقيب وبالخواجه بروتس.... يعنى يوليوس قيصر وشجرة الدر اتغدر بيهم وباى باى كمبوره لكن بروتس عاش ازاى بعد كده؟ وام على.. ام المنصور... الاهبل مافكرتش فى مدى بشاعه الطريقه اللى قتلت بيها شجرة الدر... يعنى كانت تقطع راسها اهون من انها تموت الست مبطوحه بعد عضامها ماتففتت. ياترى ام على دى بقى ماتت ازاى؟؟ طيب وبروتش مكانش بيجيله كوابيس بالليل زى سميه الخشاب فى ريه وسكينه؟... طيب والناس اللى افتروا عليه دول بيعرفوا يناموا مرتاحين والا بحلموا بيه بالليل بعضهم واحطلهم بودره العفريت فى قفاهم تشكشكهم؟ والناس اللى انا اذيتهم هياخدوا حقهم منى ازاى يوم القيامه؟ يعنى مين فيهم هياخد حقه الاول؟ هل ياترى هتبقى بالترتيب الابجدى؟ والا حسب السن؟والا الاقدميه؟؟؟؟؟؟...... كان فى واحده جارتنا قالتلى مره ماترميش السندويتشات بتاعتك عشان ماتطلعش تجرى وراكى يوم القيامه..... لازلت الى الان مش عارفه ازاى الساندوتش هيطاردنى طيب ولو حصلنى هيعمل فيه ايه؟ طيب مش كان اوقع انها تقولى ماترميش الساندوتش احسن ربنا يسخطك ساندوتش والناس ترميكى.. كنت هزعل اوى.. اكيد انا لو سندوتش مش هحب الناس ترمينى... بس مش هحب برده الناس تاكلنى... يععععععع انزل فى مصارين حد كده طيب افرض كان واحد طفس واكل خمستلاف حاجه ياكلنى وانزل معدته واتعاص يعنى!!!!!!!!......... الحمد لله انى مش ساندوتش... ولا جزمه.. ولا قبقاب... ياترى القباقيب اللى كانت بتنضرب بيها شجرة الدر كانت متضايقه؟؟؟؟؟ يعنى اكيد انا لو قبقاب مش هبقى مبسوطه وانا بخبط فى جمجمه شجرة الدر واتعاص من دمها وناس تانيه ماسكانى فى ايدها وايدها عرقت وهى ماسكانى... بيتهيالى كنت هقرف... بس هل انا بقى لو كنت قبقاب كنت هبقى فاهمه حجه اساسا؟ كنت هبقى مستوعبه انى بينضرب بيه حد وان فى ناس ماسكانى وان ايدهم عرقت والعرق قرف؟؟؟؟؟ واقعد بقى افتكر ايام اما كنت شجره قبل مايعملونى قبقاب...... واعمل ثوره ضد الجنس البشرى عشان بيسىء استخدامنا ويا قباقيب العالم اتحدوا..... .. وابقى قبقاب-تاكوس محرر القباقيب ونقتل شجرة الدر وام على وكل الحريم اللى كانوا فى الحمام ساعتها والحراس يسمعوا الصريخ يخشوا ويلمونا كلنا ويحرقونا... ويوم القيامه نطلع نجرى وراهم كلهم عشان حرقونا ظلم..... طيب كنا هنجرى ورى انهى حارس فيهم؟؟؟؟؟؟ .. جارتنا ماعرفتش تقولى ايه ام اسالتها وهو السندوتش هيعذب نفسه ليه ويجرى ورايا ما اكيد انا هقطع نفسه من كتر الجرى..... طيب هل لو انا كنت قبقاب كنت هشتاق لقباقيب تانيه؟؟.......... طيب انا بحب الابراص لو انا قبقاب هفضل احب الابراص برده؟؟؟؟؟؟ طيب كان هيبقى شعورى ايه اما حد يضرب بيه بورص يموته؟؟؟؟؟؟؟ طيب وشجرة الدر يوم القيامه هتجرى ورى مين؟؟؟؟؟ ورى القباقيب والا ورى ام على .. ام المنصور... الاهبل..... والا ورى الستات الباقيين اللى ضربوها؟؟؟؟؟؟؟

الدروس المستفاده من الكلام الفارغ السابق: ماحدش يشرب كابوتشينو من الكابوتشينو الغريب اللى انا شربت منه النهارده ده