وانا صغيره كنت احب النبي عيسى عشان عاش عمره سواح... عشان كده سموه المسيح ...... بحلم بحياه زى دى.... حياه فى الهوا.... مطرح مايغلبنى النوم انام تحت السما اعد النجوم براحتى والسحاب كله بتاعى ماحدش يشاركنى فيه..... طول عمرى احب ابص عالسما والسحاب واتنطط بطراطيف صوابعى على النجوم..ز احب اقعد علىالرصيف ماعملش حاجه غير انى العب مع الهوا والسما.... واتفرج على السحاب والمسرحيات اللى بيعملها.. بشوف ناس بترقص.... وناس بتضحك.... وناس بتعيط.... وناس بتحضن بعضها...... ووشوش بتاكل وشوش.... وقطط.. وكلاب.... وحيوانات كتير ... وكائنات معرفش اسمها..... ساعات بيتهيألى ان كل اللى السحاب بيعمله ده حاجات بجد حاجات شايفها فى بلاد معرفهاش..... انه بيقلد حاجات شايفها على الارض من مكانه فوق فى السما.. ودايما استعجب ليه السحاب مابيشوفنيش ويرسمنى انا كمان على السما..
1 comment:
على فكره
اعتقد أن المسيح سمى بهذا الاسم
لانه كان يمسح على رأس المريض فيشفى بأمر الله
والله اعلى واعلم
Post a Comment