المزيكا اللى شغاله بتفكرنى بامنيه كنت بتمناها وانا صغيره.. انى اكون باليرينا... كان لازم كل اسبوع اقعد انا ومامتى نتفرج على عالم الباليه (كانوا بيجيبوا زمان باليهات تحفه ايام اما كانت الست اللدغه بتقدمه دلوقتى بقى زفت)... كنت بموت فى باليه بحيرة البجع ولازلت الى الان بعتبره افضل باليه فى التاريخ بالذات من فرقة البولشوى...... كنت اقعد احفظ السولوهات بتاعه الباليرينا فى الباليه ده وكنت اتنح وانا مبهوره عشان مكنتش ببقى عارفه ازاى بتقدر تمشى مع المزيكا كده كأن المزيكا بتطلع من حركات جسمها مش من الات موسيقيه مع انها كانت بتبقى زى ماتكون بترسم...... الباليرينا فى سولوهاتها كانت بتبقى عباره عن وحدة ابداع حر بتمارس كل انواع الفنون فى وقت واحد... رقص... رسم... تمثيل... عزف موسيقى.... اللى بيحدد مدى استمتاعنا بالعمل الفنى هو مدى ارضاؤه للحواس الخمسه (بالاضافه لاشياء اخرى قد تكون غير محدده بشكل واضح عند كل الناس).... الباليرينا كانت بتشبع حاسه البصر بالحركه والسمع واللمس وكل ده فقط من خلال الحركه... كنت اما بشوف الراقصين بيتحركوا ازاى كنت بحس بصدرى بيتملى هوا.. هوا نضيف اوى.... كأنى طايره.. كنت احس بتوازن.. بايقاع بينظم تنفسى ودقات قلبى... بعد كده شوفت نفس الباليه لكذا فرقه تانيه بس مكنتش بستمتع بيهم زى بتاع البولشوى لان الحركه كانت بتبقى فيها شىء من الميكانيكيه مكانتش تقترب من مستوى البنت بتاعه البولشوى والرقصات الجماعيه بتاعه البولشوى كانت بتبقى زى مايكون باليرينا واحده متكرره.. مكنتش بحس باى فارق زمنى فى حركاتهم........ لسه شايفه نفسى واقفه فى وسط الاوده بقلد البنت فى كل السولوهات بتاعتها.... لسه فاكره شويه منهم... ولسه بقف فى وسط الاوده واقلدها وانا بسمع المزيكا بتاعه الباليه... ولسه كل مابسمع المزيكا بحس انى عايزه اطير.. وبطير... اغمض عينيه وماببقاش هنا.. ببقى فوق... فى السما وسط النجوم والسحاب والملايكه واطفال صغيرين بأجنحه زى كيوبيد وبتبقى السما متعبقه بريحه فل بلون فساتين الباليرينات....... ولسه كان نفسى ابقى باليرينا
5 comments:
أنا كمان كنت بقعد اتفرج مع مامتي و بابايا على البرنامج ده (اتهيألي اسمه فن الباليه؟؟) و كنت برده احاول اقلد الباليرينا اللي بترقص في تتر البرنامج..كان نفسي آوي ابقى راقصة باليه
مرسي أنك فكرتيني بالذكريات الحلوة دي
:-)))
ايوه صح فن الباليه بس الذاكره بقي معلش :)
W ana kaman ya banat :)
Ba7eb el rashaqa w el khefa el mesh tabe3eya elli feha
وانا كمان
..........
حيث كده ماتيجو نعمل فرقه :)
Post a Comment