10 Jul 2005

عم سيد

تبدأ الحكايه من حوالى 3 اسابيع اما كنت بسمع فى الشغل اغنيه " على ورق الفل دلعنى"ومفيش داعى طبعا اقولكم عن نظره القرف اللى كانت منحوته على وش شريف زميلى وهو بيقولى " ايه الاغنيه البيئه دى" بس للاسف مكنش معايا كيس اديهوله يفرغ محتويات امعاؤه فيه وهو مسك نفسه على العموم قبل مايرجع فى وشى........ كريم قاللى الأغنيه دى ماتتسمعش غير من فرقه النيل.... ودارت الايام ومرت الايام وفى اقل من اسبوع الاقى ساميه عامله فى البلوج بتاعها تنويه عن حفلات فى جنينه الازهر والمفاجاه ان اول حفله هى فرقه النيل...... طبعا اتكيفت جدا طيب يا ولاد هروح ازاى معرفش ولا حد عارف يقولى بس طبعا ولا يهمنى اتصرفت وروحت برده..... الجنينه طبعا حاجه كده تهبل طول مانا ماشيه فى واحد بيغنى اغانى ام كلثوم وانا ماشيه بغنى معاه ومنين ماتمشى فى ميركوفون بيوصلك صوته .. وزرع بقى فى كل حته ونوافير ... حاجه كده تحفه..ز المهم روحت المسرح كنت من اول الناس هناك وقعدت اتفرج على افراد الفرقه وكان قاعد معاهم واحده ست من جنوب شرق اسيا اللى عينيهم ضيقين كده وعماله ترغى معاهم وتسالهم وطبعا هم مش فاهمين حاجه فراحوا جابولها مقدم الحفله عشان يترجم وانسجموا مع بعض تماما.. كنت عطشانه اوى ... قمت دخلت الحمام وقابلت الفراش المسؤول عن الحمامات وطلب منه ميه قالى طيب هشوفلك حد يروح يجيب عشان هنا مفيش.....ز اول ماطلعت شاورلى على راجل طيب كده وقاللى قوليله ... طلبت منه ميه قالى خلصت ومقدرش اطلع بره واسيب شغلى قلتله طب انا هموت من العطش قاللى طب استنى وطلع جابلى ميه من الشباب بتوع الصوت وقالى فى ازازه ميه جوه بس سخنه قلتله يا عم سخنه سخنه اى حاجه جابهالى وقالى فى واحده تانيه اسقع بس مفتوحه فاتكسفت اجيبهالك بكام يا عم مارضيش يقول اديته خمسه جنيه الراجل حلف ميت يمين ماهو واخد حاجه... الراجل حاجه كده تحس انه ابوك.. اسمر ونحيف ووشه فيه طيبه غير عاديه..... قلبى انفتحله جدا.... قلتله بقولك ايه انا بتخنق من الكراسى وكراسي المسرح هنا تقتطم الضهر هو ماينفعش اخد شلته الكرسى واربع جمبك هنا احسن الحفله دى مش مزاج كراسى خالص وازاى ومش ازاى وراسه والف سيف اقعد على كرسى قلتله يا عم انا ماليش فيهم قالى طيب وجابلى شلته واصر يسيب كرسيه ويقعد على الارض زيى...... قعدنا نرغى بقى قد كده على الحفله مابدت قعد يحكيلى عن ولاده وشغله والحفلات ولا كأنه يعرفنى من قرن ويقولى انتى بتفكرنى ببنت اخويا عامله زيك كده....... والحفله بدت واتسلطنت بقى انا وعمكوا سيد وايدينا اتهرت تسقيف..... اكتر حاجه استمتعت بيها فى الحفله دى كانت القعده مع الراجل الطيب ده....... واصر انه يقول للولد بتاع حجز التذاكر انى بنت اخته وماياخدش منى تذاكر تانى اما اجى ويدخلنى ببلاش " المفروض هم ليهم نسبه دعوات مجانيه للحفلات بس هو مايعرفش حد يدخله "... والعجيبه انى مشيت وهو ماعرفش اسمى الا انه شدد عليه وقالى اى يوم تيجى قولى بس ان اعايزه اخش لخالى سيد وانا اجى ادخلك ببلاش من على البوابه الكبيره واى حفله كمان تحبى تخشيها........ الجمعه الجايه بامر الله هيبقى فى حفله ...... يمكن مقدرش اقعد لآخرها بس والله هروح لاجل اشوف الراجل الطيب ده بجد وحشنى وشه الطيب..ز بقالى زمان اوى ماقعدتش ربعت وحكيت مع حد قلبه ابيض كده... تسلم يا عم سيد ليه ولعيالك


16 comments:

أنا said...

مينفعش اجي معاكي..ونقلهم احنا الاتنين اننا جاين لعم سعيد!؟

AZ said...

تنور والله بس هتستحمل تقعد علي الشلته؟

أنا said...

شكرا علي ذوقك بس يا ستي مش مهم الشلته المهم تمن التذكره
وعموما ابقي اجيب شلتتي معاي

mostafa said...

علي فكره انا كنت في الجنينه النهارده مع صديقتي الامريكيه " بيني وبينك احسن يقولوا ان انا ليبرالي " وعمك سعيد بيسلم عليكي وعلشان انتي حبيتي الجنينه اوي كده هتكون جزء من التحليل اللي هعملوا في البلوج بتاعي ان شاء الله
اتمني يعجبك

AZ said...

انا رايحاله الجمعه الجايه خصوصى بأمر الله :)
ايوه يا عم حلل كده وورينا الابداعات ....... كان الله فى العون .... الى الامااااااااام يا روميل

El Masry said...

LOL..ana mosh sa3eed :) but I think I'll hgave to use that name soon ;) ;)

ana mosh sa3eed

Anonymous said...

3la fekra gaw el 7afalat de gameel awy, we bravo 3leeky enek a3dty 3la el shalta ganb el ragel el tayb dah begad ana 7ases gedan be estmta3ek be el 7afla we za3lan gedan enny makontsh fe el kahera 3shan a7dar el 7aflat deh.begad ya ba7'tek. (Ahmed).

AZ said...

m3lesh b2a ya ahmed tet3wad fi wa7da tanya this week on thursday elsa3a 9.00 we fi on friday bass bet3t el 5amees a7la
:)

AZ said...

ana mosh sa3eed care for what u wish u might regrette it ;)

Omar said...

الناس اللي زى عم سعيد كتير قوي، بس الفكرة مين اللي ممكن يصدقوه ويتواصلوا معاه على طبيعتهم البكر دي زى ما عم سعيد عمل معاكي، لقطة جميلة
تسجيل الحفلة في الطريق هى وحفلة البرامكة، عذراً لضيق الوقت، وشكراً على شوية البهجة اللي عملتيهم بتعليقاتك اللطيفة على مدونتي المتواضعة

AZ said...

خد وقتك المهم ماتطنش بس وياسيدى التعليقات واجب على كل مدون
فرض عين (;

Lasto-adri *Blue* said...

أنا بحب الوشوش المصرية دى .. هم دول مصر بجد يا إيه زى..
سلميلى عليه المرة اللى جايا.. وقولوله واحدة مصرية تانية بتقلك.. ربنا يخليك لينا يا راجل يا طيب..
وإبقى قوليلى أروح معاكى

AZ said...

انا ياستى رايحه الجمعه القادمه بامر الله هقضى اليوم هناك كله تنورينى يا ستى والله

سامية said...

AZ hanem!

أولاً أنا سعيدة جداً انك اتبسطي في الحفلة ثانياً: عندك مانع أطبع التدوينة وأوريهاله؟

في حاجه بس صغيرة كدة حغيرها -بعد إذنك طبعاً- هو اسمه عم "سيد" مش سعيد وهو فعلاً راجل طيب جداً وكل العاملين في المورد بيحبوه جداً

AZ said...

وريهاله يا ستي وماله وقوليله اني جاياله قريب :)

راضى said...

على ورق الفل دلعنى

فكرتنى بالخالدة
علمنى العوم والنبى يا احمد