6 Jul 2005

واحد معدى

كنت بشوفه وانا اولى اعدادى مكنتش اعرف هو ساكن فين....... كنت بقابله كتير اوى...... واحد معرفوش زى كل الناس الل معرفهاش بس كنت دايما استغرب انى بشوفه كتير ولا عمرى شفته نازل ولا طالع ولا باخد بالى هو جه امتى ولا اختفى من الشارع امتي........... فجأه بلاقيه وفجاه بيستخبى........ اما دخلت ثانوى بطلت اشوفه عشان عزلنا..... فى الجامعه رجعت بيتنا القديم تانى ........ رجعت اشوفه تانى وان كان مش بنفس الكتره...... بقيت اقابله فى المواصلات كتير والعجيب انى لو ركبت من الجيزه الاقيه لو ركبت من التحرير الاقيه لو جيت نازله العباسيه برده اقابله فى الميكروباص!!!!!!!........مره غيرت رأيى وركبت المترو كنت هقع من الضحك اما لقيته راكب معايا نفس العربيه وماسك المصحف فى ايده بيقرا..... شفته مره الصبح وانا رايحه الكليه نازل من بيتهم.... انبسطت اوى اني عرفت بيتهم فين....... اتخرجت... واشتغلت..... وبقيت مابشوفهوش تقريبا وان كان كتير اوى كان بييجى على بالى....... كنت اقعد اسال نفسى يا ترى بيشتغل ايه وعنده اخوات والا لا واسئله كتير تانيه مالهاش اجابات....... هو كمان بقى يلاحظنى..ز مع اننا بقينا نشوف بعض اقل بس لسه فاكرنى وانا لسه فاكراه.. اما بيشوفنى بيعقد حواجبه اوى كده عشان يفتكر شافنى فين قبل كده ببقى عايزه اضحك......... رمضان اللى فات وانا نازله بعد الفطار شفته نازل من بيتهم وجمبه بنوته زى القمر ماشاءالله عليها وماسكين ايد بعض وهو ماشى جمبها نافخ صدره ووشه منور ومبتسم ابتساه واسعه اوىىىىىىىىىىىىىىىىىىىى وآخر انشكاح........... ولقيتهم لابسين دبل ...... انبسطت اوى وكنت عايزه اروح اباركلهم بعدين لقيت شكلى هيبقى اهبل اوى....... واحده رايحه بتبارك لاتنين ماتعرفهمش على خطوبتهم........ بقالى كتير اوى ماشفتوش...... اكيد طبعا زمانه بقى اتجوز وسكن فى حته تانيه........ بس لسه بييجى على بالى ونفسى اعرف عامل ايه دلوقتى مع انى برده لسه معرفوش

7 comments:

S H E B A K said...

جميل ان ناس مايعرفوش بعض يبتسموا لمجرد انهم شافوا بعض قبل كده
أحساس جميل بالأداميه
طبعا لو كنتى باركتلهم كان هايكون شئ غريب لكن أكيد كان هيكون شئ مفرح جدا ليكى و ليهم

أنا said...

أحساسها عالي قوي

Ghada said...

يا بنتي إنتي هايلة بمنتهى البساطة!!
عندك مانع لو نزلنا الموضوع ده في بلوج مصر مش كده؟
moshkeda.blogspot.com?

الحقيقة أنا نفسي توافقي!
مكانها هيكون هنا:
http://moshkeda.blogspot.com/2005/07/blog-post.html

مستنياكيييي
:)
واوعي تبطلي كتابة!

AZ said...

اه اتفضلى طبعاً انشريها مطرح مايعجبك

Mr-Biboooo said...

كان ليا واحدة صاحبتى كانت دايما تقول الدنيا عاملة زى الكاميرا و عشان كده لازم نعيش بنبتسم

ولما قريت البوست ده حسيت فعلا انها كاميرا و ان احنا البوم صور فيه حاجات كتير حلوه000بس مركونة
يوووووووه قابتى عليا المواجع منك لله

MoonLightShadow said...

I like that :)

Anonymous said...

ana geit hena sodfa...bas begad begd sodfa tganen.

betfakareeni be Bahaa Taher awwi fi ktabtek..

keep going :)