5 Jul 2005

يابلادى عظيمه باولادك

يا بلادى عظيمه باولادك صناع المجد فى اراضيكي...... دى كانت مقدمه برنامج بييجى على القناه التالته الساعه 6 تقريبا زمان اوى وانا فى ابتدائى كنت بشوفه اما ارجع من المدرسه التيرم التانى عشان كنت ببقى الفتره المسائيه ........ كان تقريبا بييجى يومين ف الاسبوع..... كنت اقعد استناه بس عشان اسمع اغنيه المقدمه واتخيل نفسى ما اكبر وافتح دار النشر والترجمه بتاعتى ويعملوا معايا حوار فى البرنامج واقولهم انا بنت البلد دى وخدمتها ولسه عايزه اخدمها كمان وكمان...... كان نفسى اترجم كل الكتب المهمه اللى فى الدنيا وتتباع طباعه فاخره وبسعر رخيص يادوب بس عشان اغطى تكاليف الطباعه واجور العمال... واما كان حد يقوللى طيب وتكسبى منين كنت اقولهم مانا هتعب واشقى واحوش كل فلوسى عشان اعمل دار النشر ومش عايزه مكتب هاخد مرتب زى اى حد بيشتغل عندى .. وقتها كان بابا يفطس من الضحك ويبوسنى من خدى ويقولى اما نشوف هتعملى ايه يا فلحوسه........ اما بفتكر الكلام ده دلوقتى للاسف مابضحكش زى اما كانوا بيقولولى..... كانوا بيقولولى اما تكبر هتضحكى على افكارك الساذجه دى....... ولا همنى منهم فضت احلم..... كنت عايزه اخش الاول كليه اداب عشان ابقى مترجمه بعدين قلت لا واجب ادرس الطباعه احسن وكنت اسال ماما كليه اي اللى ادرس فيها الطباعه تقولى فنون تطبيقيه......ز عشت عمرى كله بحلم باليوم اللى اخش فيه فنون تطبيقيه ودخلتها ...دخلت فنون تطبيقيه عشان التحق بقسم الطباعه..... فى اول اسبوعين سيبت القسم بلا رجعه وحولت قسم الاعلان بسبب سوء معامله الدكاتره هناك لو كنت كملت انا كنت واثقه تماما انى هترفد من الكليه فى اول صدام مع اى دكتور منهم..... قلت لازم الانسان يكون عنده قدره على التأقلم مع معطيات الواقع باستمرار اهو قسم الاعلان ابن عم قسم الطباعه وحولت اعلان فعلا ونجحت واتخرجت واشتغلت... بس معملتش اى حاجه لسه...... هو انا اينعم بشتغل فى مجله بس وبعدين؟؟؟؟؟؟..... فيدتك يا بلد بإيه؟؟؟؟؟؟؟ ولا حاجه... لا شىء على الاطلاق...... كان فى واحد الله يوجع قلبه قال الطريق الى جهنم محفوف بالنوايا الطيبه...... انا واقفه فى نص الطريق وقرفانه وتعبانه..... مش قادره اكمل وصعبان عليه ارجع كانت النتيجه انى متسمره فى مكانى من ساعه ما اتخرجت لحين اشعار آخر
ويابلادى عظيمه بأولادك اللى بنوا الهرم وماتوا من سبعتلاف سنه... لكن ولادك دلوقتى فى سنوات التيه زى بنى اسرائيل وياعالم سنوات التيه دى تخلص امتى

2 comments:

haisam (jarelkamar) said...

البوست ده انا اللي كاتبه
او كأن انا اللي كاتبه

جيتي ع الجرح و الله

ماعنديش كلام دلوقت اقوله

انتي و انا و غيرنا عايزيين نغير التاريخ

لكن الطريق غير واضح

ما عنديش كلام تاني اقوله

أحمد said...

أنا بقي عايز التاريخ يسبنى في حالى
مشكلتى ان التاريخ مصر يبيض علي و يتدخل في حياتى و يفسدها دائما