3 Jun 2005

سلمى

واحده من أعز صحباتى عندها بنوته زى القمر اسمها سلمى.. البنوته دى عمرها 8 شهور.... شفتها اول يوم اما اتولدت..... كنا فى رمضان وكان يوم فى وسط الاسبوع اول ماعرفت ان صحبتى ولدت نزلت تانى من بيتنا لحد مدينه نصر مع انى كنت لسه داخله من الباب جايه من مدينه نصر...... بس مقدرتش استنى لحد ماتروح....... كنت اول حد يشيلها بعد والدها وخالتها وجدتها..... وفضلت اكلمها كتير اوى وهى نايمه :) احم معلش هايفه انا شويه مع العيال اهى اهى..... شفتها بعد كده مرتين .. مره وهى عندها 3 شهور ومره وهى عندها 5 شهور... ماشفتهاش تنى غير من اسبوعين وهى عندها 7 شهور...... البنت بكايه جدا كأى طفل فى سنها ومبتاخدش على الاغراب بسرعه... ولو هى قاعده بتلعب مع باباها وشافت مامتها لو ما حدش شالها وداها لمامتها تبكى..... انا اول مادخلت كانت بتعيط عشان مامتها قامت تفتح الباب وبعدين دخلت المطبخ وانا دخلت الاوده للبنوته.. سكتت..... شيلتها ماعيطتش.... مامتها جت فضلت قاعده فى حجرى تلعب منغير ماتعيط......... انشغلت عنها شويه راحت شاده وشى عشان ابصلها وضحكتلى وراحت راميه نفسها فى حضنى وفضلت سانده راسها على صدرى شويه .... اول مادورت وشى عنها راحت قايمه تانى وشدت وشى.... امها بقت تضرب كف على كف تقولى بنتى عملها ماعملت كده مع حد...... المهم انا شويه ومشيت....... بعدها باسبوع رحتلها تانى بس بدرى شويه..... البنت مابطلتش لعب معايا..... ونامت فى حجرى مرتين... كانوا اربع ساعات من الجنه..... كنت حاسه نفسى فى دنيا تايه تماما.. الاطفال شىء غير عادى...... اروع شىء فى الوجود ان طفله فى سن سلمى كده تنام فى حجرى..... احساس يضاهى احساسى وانا شايفه شغلى مطبوع ومتعلق فى مكان ما والناس تقول الله حلو..... احلى من احساسى اما اتخرجت... واحلى من الحب..... احلى من كل حاجه فى الدنيا..... البنت نامت فى حجرى.. نقلتنى لدنيا تانيه تماما.... قبل ماتنام قعدت على بطنى وقعدت تتفحص فيه.. مابقيتش عارفه مين فينا اللى بيلعب بالتانى..... قعدت تستكشف دماغى زى ماتكون لعبه جديده.. طبعا الامر مايسلمش من انها عضتنى فى وشى ولعبت فى عينى البخت فى خلال طلعاتها الاستكشافيه... بس الغريبه انى ماكنتش بتضايق بالعكس كنت بفطس من الضحك..... دى اول طفله فى حياتى اشوفها وهى لسه عمرها ساعتين.... واول طفله تاخد عليه كده... هى حكايه يمكن تكون تافهه شويه.. بس بجد لو حد فيكم جرب الاحساس ده فيوم من الايام هيعرف انا ليه حكيت علىا لموقف ده


And here is the rest of it.

4 comments:

Ahmad El-Saeed said...

ya ba7'tek ... ana kan nefsy 6ol 3omry yekon leya o7't so3'ayara 3ashan a33od al3ab ma3aha keda ... we lazem bent kaman , law kam wad kot 7a3azzebo ... heeeh .. yalla naseeb ba2a ... 3o2bal matshely bentek ya AZ ensha2allah , we sa3etha ba2a ana elly hagy al3ab ma3aha :-)

freedom said...

بجد حلو قوى الاحساس ده
شكرا انك حكتيه

Anonymous said...

جميل قوي الكلام بتاعك ربنا اعطاكي موهبة خاصة تسلمي
انت وسلمي
اميل

Nefsy said...

a7la e7sas 7asetoh fe 7ayaty kolaha lama sa7bty da7'lt el kolya ma3 maia banota s03'tra 3ndha sana wa7da we el banot awel mashftny gret 3alya ma3 en de tany mara tshofny bas we etrmet fe 7odny we l3bt ma3a ana bas .... begad el atfal dol mlyka
7abet kalameh awe awe