4 May 2005

نهلولتى

فى ناس يدوك وناس ياخدوا منك وناس يدوك وياخدوا منك......... اتعودت طول عمرى ان الناس تريح عليه وتركن بعشم وقلب جامد ...... عمر ماقبلت حد وحسيت انى ممكن اقدر اركن عليه ولو لثوانى....... اكيد بثق فى ناس وبحب ناس وبرتاح لناس لكن مفيش حد اتسند عليه........ العجيبه ان نهله فى اقل من اسبوع لقيت نفسى على اتم استعداد انى مش اركن عليها بس..... ده انا ممكن اترمى فى حضنها وقت زنقه واقولها الحقينى وانا واثقه ومتأكده انها هتلحقنى...... بنى ادمه فوق العاده... قدره عجيبه على العطاء لاى حد فى اى وقت ودون سبب او هدف او غايه..... بتدى وبس....... بتخلينى اصدق لوتسو اما قال " احب العالم كانه نفسك عندها فقط تستطيع ان ترعى كل الاشياء"..... نهله كده....ز بتحب العالم كانه نفسها عشان كده بتعرف تراعى كل الناس والحاجات كانهم حته منها مع انها يمكن تكون ماتعرفهمش اساسا........ بنت عامله زى الفل...... كل ورده وليها عطر..... والناس زى الورد كل واحد ليه تأثير عليك زى تاثير عطر الورده........ فى ناس زى القرنفل بيخترقوك بوجودهم ويفرضوا نفسهم بقوه زى عطر القرنفل ماتلاقيه ملى مناخيرك فى ثوانى ........ وفى ناس زى الفل........ وجودهم مابيفرضش نفسه .... بيتسرب جواك وتلاقيه فجاه مالى المكان ويمتعك بطريقه احتلاله للهوا...... اصعب شىء هو احتلال الهوا......... نهله زى الفل....... بتتسحب جواك بشكل غير عادى بدون ماتزعجك


5 comments:

wa7ed mn masr said...

وصفك للناس اللي زي الفل : زي الفل.. إحتلنى

MoonLightShadow said...

These people you are describing ya AZ are very hard to find. Once you find them, never give them up, coz if you did, you might not find them again.

unknown said...

جميل الفل
وفيه ميزه تانيه غير الرائحه العطره
الفل ابيض يبعث على الهدوء والراحه والطمأنينه والنقاء
لو كنت زهره لوددت أن أكون ياسمين
لووووووووووووووووول
لو أنت زهره كنت تحبى تبقى إيه ؟

AZ said...

كنت احب ابقى زنبق
الزنبق راقى
هادى
دافى
مريح

Muhammad Aladdin said...

"زى عطر القرنفل ماتلاقيه ملى مناخيرك فى ثوانى"
مناخيرك؟ يا بنت الملافظ سعد
:P
بس بجد انتي محظوظة بيهم.. لاقيتي الجنة الصغنتوتة اللي مستخبية جوا الأرض

علاء