Showing posts with label العمر بعزقة. Show all posts
Showing posts with label العمر بعزقة. Show all posts

22 May 2014

ألين ولا أنكسر ٢

بسم الله خالق الكون ومصرّف الأقدار حملنا الهم فخفّ وإن ثقل...ورفعنا بعونه ظلما فتكأكأ الظلمة علينا يتقاذفونا فلم نجزع...ثبتنا أقدامنا ورفعنا أكفّنا إلى مصرّف الأقدار ومقلب القلوب ودعوناه فهدانا للصمت فامتثلنا...لم نكلّ...ولا لغيره نشكوا

أنا التي وطئني العالم سبع مرات بنعله وفي كل مرة انتصبت واقفة بأمر ربّي...كنخلة كلّما انثنت ألقت ثمارها متخففة حتى إن أفلتوها عادت لتثمر...ألين ولا أنكسر...فإن وطئني العالم لثامنة لأقامني كفّ الرحمن فإنكم لا تعجزونه...لي رب قادر أمره كان مفعولا

وحدي...بلا سند تعرفونه...اتكيء على ما لا تعلمون ليقيم ظهري...للكون رب

16 Jan 2013

للخراف السهول والحمادة للفرس

خلفية:
*الحمادة هي هضبة مغطاة بالصخور الجيرية المسطحة

* لا يعيب الفارس أن يعدد خصائص مهرية ويتحدث عنه كملام، ولكن لقصائد المديح شروطا. مهريك لم يذع صيته في معركة، ولم يشتهر في حفلات الرقص. -من رواية التبر لإبراهيم الكوني

* المهاري البلقاء في إبلنا عمل ستحسدنا عليه كل القبائل. إحياء السلالة البلقاء وحمايتها من الانقراض واجبنا -من رواية التبر لإبراهيم الكوني

* هانيبال ليكتر: وماذا حلّ بالحمل يا كلاريس؟
كلاريس: قتلوه.
ـ من فيلم صمت الحملان

* هانيبال ليكتر: حسنا كلاريس...هل توقفت الحملان عن الصراخ؟
- من فيلم صمت الحملان

* والآن سؤال يتعلق بالإيتيكيت: بينما أمُرّ، هل أواجهك بالمؤخرة أم القضيب؟ ـ من فيلم نادي الشغب

* أولا يجب أن تستسلم...يجب أن تعلم -لا أن تخشى- أنك في يوم ما ستموت ـ من فيلم نادي الشغب

* كل ما تتمنى أن تكون عليه، هذا أنا. مظهري كما تحب أن يكون مظهرك، أضاجع بالطريقة الّتي تتمنى. أنا ذكي...قادر...والأهم من ذلك أنني حر في كل ما لست أنت فيه حر. ـ من فيلم نادي الشغب

* إنه فقط بعد أن نفقد كل شيء يصبح بإمكاننا أن نفعل أي شيء. ـ من فيلم نادي الشغب

* ياشيخ ادعي بجاه الإله وكل مافي العلالي..عن السرير جسمه ارتفع وإمو عم بينادي...ياشيخ شو صار بهالولد...ماعم بيتذكر شو عبد...عاد لوعيو وفتح عيونو صاح: يامّاه ـ من أغنية الممسوس لعزيز مرقة
 -----------------------------
مقدمة:
الفرس البري وحده يمكنه صعود الحمادة تاركا الخراف في السهل القابع أسفلها تلوك العشب...لا الخروف يحقد على الفرس لقدرته هذه، ولا الفرس يعبأ إن حقد عليه الخروف أم لم يحقد...فالأمر بسيط: الفرس يرغب في تسلق الحمادة فيتسلق الفرس الحمادة ويهبط فقط عندما يقرر هو ذلك...لا تسأل الفرس أبدا لماذا يتسلق الحمادة...ولا تسأله لماذا يهبط...فهو لن يكترث لفضولك على أية حال...فالفرس البريّ حر فيما يفعل حتى يقع في الأسر فتبذل الجهود المضنية لاستئناسة. كل جهود استئناس الفرس تذهب سدى ما لم يكن مستأنسه فارس...فالفرس لا يخضع ولا حتى لمثيله...الفرس البريّ لا يخضع إلا لمن يملك قلبا أجرأ من قلبه...للفرس عقل وعزّة لا يدركها إلا من يمتلكها
يمكنك أن تحبس الفرس البريّ...وأن توسعه ضربا...وأن تمنع عنه الطعام...ولكنه لن يخضع وسيتحين الفرص للهرب...لن يتركك تعتلي ظهره ما لم تتحلي بشرف الفرسان...الفارس لن يحبس فرسه ولن يوسعه ضربا ولن يمنع عنه الطعام إلا ليطعمه قوالب السكر من كفّ يده محبة واحتراما..سيحترم نفوره...وسيحترم نضالة ضد محاولات الاستئناس...لن يعاقبه إن رفسه...ولن يغضب إن أوقعه عندما يحاول ركوبه. ولكن سيقارعه العزم بعزم...وسيقابله اصراره باصرار...ويظل الحال هكذا حتى يحترم الفرس الفارس فيسمح له بأن يستقر على ظهره ليصبحا سويا محاربا واحدا...فالفرس البريّ لم يخلق للتنزه في الحقول وإنما خلق ليصعد الحمادات الواحدة تلو الأخرى..الفرس لن يقبل إلا بفارس وليس مجرد راكب خيل

معلوم بالضرورة:
 نحن نعلم جيدا أننا لسنا الفرس...ولم نطمع في أن نكون الفارس...ولكننا ودون أن ندري صرنا نحن الحمادة نفسها...نمتص الدماء الّتي تسيل على أجسادنا في صمت وعِزّة لا يعيها إلا فارس...أو فرس...ليس لقاطع طريق أن يدرك صمود الحمادة في وجه من لا يستحق شرف ارتقائها. كما نعلم أيضا أننا لم نعد نمتلك أي شيء ولا حتى الروح في الجسد...فالموت قد أصبح رفيق درب عندما صارت أرواحنا قرابين يقدمها من يستطيع لمن يريد...ندرك أنك ترى موتنا عبث وأنك لا تدرك أن حياتك هي العبث بعينه. نحن واثقون من أن الامتلاك لعنة تحول المالك لمملوك لما يمتلك...فتخلينا عن أغلب ما نمتلك -طواعية- لكي نتحرر من عبء الامتلاك.



لا نبالي:
عليك أن تدرك تماما أنك لا تقف بشموخ نخلة في وجه الريح، وإنما أنت منبطح تماما. عزيزي...عليك أن تدرك أيضا أن هذا ليس سيء تماما إذا اتبعت نهج الدودة الّتي تلصق بطنها بالأرض وترفع رأسها نحو الأمام حتى تصل لغايتها بغير أن يلحظها أحد. أما عنّا، فنحن وحدنا نسند ظهورنا إلى الحمادة في غير اكتراث حتى يحين وقت المواجهة الجديدة...ربما نزجي أنفسنا برسم وجوه أعدائنا على الرمال كشكل من أشكال الترويح عن النفس.
صدقني...نحن لا نهتم بتاتا بتعليقات الآخرين عن رحلتنا فنحن نعلم أن ذلك لن يفيدنا بشيء...ولن يثنينا عن عزمنا. نحن نستثمر أوقات الهدنة في الراحة من مشقة الرحلة...أو في ممارسة السكون والتأمل في تفاصيل الرحلة وعادة ما يقودنا هذا إلى طريق جديد لصعود الحمادة الذي يعد بالنسبة هدف صعب، هو بالنسبة لنا نزهة يومية نتفنن في ابتداع طرق جديدة له. لذلك نحن لا نبالي بتعليقات الآخرين عن طريقتنا في صعود الحمادة فنحن نعلم لها ألف طريق، ويزيد.
نحن لا نكترث وإن حلّت بنا النوازل...لأننا لا نضني أنفسنا في البحث عن جانب مشرق لكل نازلة نعلم تماما أنه محض خيال...فقط نقلب النازلة على كافة أوجهها حتى نعثر على الوجه الأقل قسوة بينما تضيّع أنت وقتك في البحث عن الجانب المشرق الغير موجود بالأساس.
لا تضع وقتك في اقناع الفرس/الفارس/الحمادة بأنهم على غير طبيعتهم...استثمر وقتك هذا في البحث عن طبيعتك أنت، أو لا تفعل...فعلى كل حال نحن يا عزيزي لا نبالي...هي حياتك...فافسدها بأية طريقة تروق لك...ونحن...لن نبالي إن أنت اخترت أن تكون من أكلة البرسيم...نهتم لك فقط عندما تختار أن تكون من بين فرسان الحمادة...عندها فقط سنحملك على ظهورنا ونصعد بك إلى قمّتها.

17 Dec 2012

فضفضة

من يوم وفاة جدي وانا عندي ١٢ سنه ماعيطتش لحد لما دخلت الجامعه مره واحده...كانت لحظة حسيت فيها بقهر فاق احتمالي...ولما عيطت ساعتها ماسكتش غير بقرص مهديء ونوم...وبكيت مره تانيه في ٥ سنين دراسة جامعية...برده كنت حاسه فيها بقهر فاق احتمالي...وبرده ماسكتنيش غير قرص مهديء ونوم...من ساعتها لحد الثوره بكيت ٣ مرات...مرتين يوم وفاة خالي الأكبر وخالي الأوسط...ومره بعد ما استقليت بحياتي عن أهلي بحوالي شهر...بكيت يومها بهدوء...كانت دموعي بتتزحلق على خدي في سكينه شديده...كانت دموع راحة من قهر كتير عديت بيه ونزلت وقت ما تجاوزت عن الشعور السلبي اللي كان ملازمني حوالي ١٦ سنه من حياتي...دموع التجاوز دي أريح شيء في الوجود

وقت ال ١٨ يوم عيطت كتير وانا ببتسم...يوم ٢٨ وانا شايفه اول واحد بينزل من علي كوبري والمسيره مالياه وانا على آخره ولسه ورايا ناس...بكيت من السعاده وانا بشد في دراع فضل صديقي وبتنطط: "الناس نزلت يا فضل الناس نزلت"...المسيره دي بدأت من امبابه بأقل من ١٠٠ فرد...وكنت بعيط وانا مبتسمه كل مره سمعت فيها اغنيه وطنيه خلال ال ١٨ يوم...مابكيتش خالص يوم موقعة الجمل ولا يوم ٢٨ يناير علي الناس اللي اتعورت وماتت....من بعدها مابكيتش غير بعد ماظهرت جثة زياد بكير (أخو صديقه ليا من أيام الكلية)...ومرة يوم جنازته...ومره يوم وداع شهيد تاني ماعرفوش مشيت في جنازته من القصر العيني وصلينا عليه في التحرير...مكنتش بعيط عليهم...مش فاهمه فعلا يعني ايه اعيط على شهيد...كنت بعيّط على المرمطه اللي اهلهم اتمرمطوها...أهل زياد فضل يجيلهم تليفونات تهديد لحد يوم ماتدفن بإنه لسه حي ولو اتكلموا مش هيشوفوه تاني...والولد التاني كان بيصرف على أهله...كان في عز شبابه وراح من أمه مش فاكره كان مين قتله...اللي قتلونا كتير

من بعد الولد ده مابكيتش تاني غير في جنازة الشيخ عماد عفّت...ماكنتش اعرف الشيخ عماد...مشيت في جنازته وانا مبتسمه وبسبح وبدعي ربنا يحسن خاتمتي...أكبر جنازة شوفتها في حياتي وكنت بستعجب: "عملت إيه يا مولانا عشان تنول البركه دي؟ علّك ولي واحنا مانعرفش"...لحد ماوصلنا المدافن...كان بيني وبين التربه لما اتفحت ناس كتير فمكنتش شايفاها...بس فجأة شميت ريحة جميله اوي ماشميتهاش غير في حلم حلمته بجدي الله يرحمه جوا الكعبة...لما الناس ابتدت تنصرف فضلت اتتبع الريحة...لقيتها طالعه من التربه اللي بيدفنوا فيها الشيخ عماد...سألت الناس مالقيتش حد شاممها غير نواره..قالتلي دي ريحة مسك

طلعت يومها قابلت ناس زمايلي عشان اروح معاهم...واحنا مستنيين تاكسي اتفحت في العياط...مش حزن على شهيد إطلاقا...بس كنت هتجنن...ربنا بيسيبنا عايشين طول ما حياتنا نفع...وبيقبض ارواحنا لما بيشوف ان دورنا انتهى أو بتكون وفاتنا عبره لناس عايشه...السؤال اللي كان مجنني وقتها: أنا دوري إيه؟ إيه اللي مطلوب مني أعمله وعشانه ربنا سايبني عايشه؟...مش متضايقه اني عايشه...ولا عاوزه انتحر...بس كان نفسي أفهم انا مطلوب مني اعمل إيه عشان أعمله؟...تميم البرغوتي كان واقف ورايا وانا بعيط فجأة لقيته بيقولي اكتبي...سألته أكتب إيه؟ قالي ماعرفش اكتبي يمكن كتابتك على البلوج دي هي دورك اللي مفروض تقومي بيه
 
 كتير بحاول أكتب ومابعرفش...اللي متابع البلوج من زمان عارف ان ده شيء غريب اني بقيت أكتب قليل...من بعد الثورة وانا بفقد بالتدريج القدره على الكلام والبكا والكتابه...نزل عليا سهم الله...مخي ماعادش قادر يتعامل مع اللي شافه...لأن كل حاجة مهببة شوفتها ومريت فيها في الفترة دي مكانش بيبقى عندي وقت احس بحاجة او حتى أبكي...واحد وقع...شدي نفسك وخشي الحقي حد تاني جوا وابقي عيطي بعدين...وبعدين ده مجاش بقاله سنه...مخي فرمت نفسه...مسح كل حاجة كأن لم تكن...مابقاش عندي ذكريات متعلقة بأي أحداث...ناس بتقابلني تقولي اتقابلنا وقت ضرب في شالرع...ويحكولي مواقف حصلت بينا...وانا مش فاكره أي حاجة...مخي كبت كل شيء بما فيهم تفاصيلي انا الشخصيه...بقيت زي كائن فضائي هبط عالأرض اول امبارح ماعندوش فكره عن أي حاجة ولا حتى حياته في كوكبه السابق...زي ماكون وقعت في ثقب زمني...المخ مسح مخزون الذكريات والمشاعر فمبقاش في حاجة يسترجعها

بقالي مده بحاول استعيد كل الذكريات ومش عارفه...وطول مانا مش عارفه مش هعرف اكتب...عارفه ان دي فتره وهتعدي طول مانا بحاول أعديها...المحزن أكتر إن ليا صحاب كتير حواليا كده وانا مش عارفه اساعدهم..لأني مش عارفه أعمل كتالوج للخروج من أزمه انا لسه في نصها...شعور غبي بالعجز...ورغبة قوية اني افتكر كل الذكريات المؤلمة عشان أقدر اتعامل معاها وأقدر أكمل حياتي بشكل طبيعي...ولسه مالقيتش سكه واضحة اطلع منها واشاور لصحابي عليها 

في الفتره دي...وتحديدا بعد استشهاد الشيخ عماد أدركت حاجة مهمة جدا...الشهدا حقهم عمره ما هييجي دلوقت...القصاص مش حق الشهدا...القصاص ده حق الناس اللي عايشه واتضرت باستشهاد حبايبهم...لكن الشهدا حقهم هيجي عند الله يوم الحساب مش هنا خالص...وده بالنسبالي مش معناه التقصير في تحقيق القصاص...بالعكس...ده سبب أدعى لتحقيق القصاص: لناس اللي عايشه بتتعذب كل يوم دي ترتاح شويه

اللي قوي الفكره دي كان حلم حلمته بشهيد عمري ماقابلته: أحمد بسيوني...كنت في حلم معديه من حته عمري ماشوفتها في حياتي...سهل كبير مقسوم نصين...نص زرع اخضر والنص التاني اللي كان فيه بسيوني ارض رمليه واسعه اوي...وهو نايم تحت ضليله...مستلقي على الأرض ونايم...عينيه مقفلين بس مفتحين...وجسمه كله سليم...اختلفت انا والناس اللي حواليا...أقولهم نايم...يقولولي مات...وصوت يجيلي من يميني من حد مش شايفاه يقولي عايش...أقول للناس اللي قاعده علي شمالي بتشرب شاي أقولهم عايش ونايم..يقولولي مات...الصوت يجيلي تاني من يميني يقولي عايش...هزيه يمكن يصحى...لقيته مبتسم وبيبصلي وعينيه مقفلين بس انا شايفه نني عينه...جيت أصحية قومت انا من النوم وعلى لساني بقول مع الصوت اللي كان في الحلم: ولا تحسبن الذين قتلوا في سبيل الله أمواتا بل أحياء عند ربهم يرزقون...الحلم ده تعبني فتره في تفسيره...كل اللي قدرت افهمه منه لوحدي بدون مساعده ان الشهيد عايش ومبسوط...لحد اما حد اعرفه نبهني لحاجة مهمه...إن بسيوني كان بيقولي انه في مكان افضل وإن جسمه اللي اتصاب في الدنيا دلوقت سليم بس احنا مش شايفينه وهو شايفنا

من أول يوم لغاية النهارده مابكيتش شهيد...ولا هبكي شهيد...انا ببكي العايشين..الإنسان عمره قصير..ومسيرنا هنحصلهم..قريب أو بعيد مش مهم...المهم اننا هنتقابل 

امبارح اكتشفت ان واحد من اللي راحوا في مجلس الوزرا كنت اعرفه بس ماعرف شاسمه...كنت بقابله وسط صحاب في الميدان...اتقهرت...وبرده ماعرفتش ابكي...هي دمعه واحده يتيمه نزلت من عيني اليمين وانا بقول: بل أحياء عند ربهم يرزقون

حسيت ساعتها ان الدنيا دي سخيفه...سخيفه أوي..مالقيتش حاجة اعملها غير اني اكتب البوست ده...يمكن حد يلاقي فيه تنفيس عن شيء...يكمله حته ناقصه..أو يزيح عنه هم...أو حتى يحسسه إنه مش لوحده...إحنا كتير...وكلنا رايحين...ماحدش قاعد فيها للأبد...وأهي دمعه خدتلها سنه عشان تنزل...يمكن ربنا يفرجها بحبة عياط قريبين يشيلوا عن صدري شوية هم متراكم

16 Dec 2012

ابغي منك الوصل فاقترب نصنع الذكرى

قد صرنا نتقي تلاقي الأعين فنحن لا نعلم أينا سينصرف في الجولة التالية...ولا نعلم لهذه الجولة موعدا...ولكننا نعلم أنها قادمة وستأخذ بعضنا إلى حيث يرونا ولا نراهم...أصبحنا جميعا نبتعد عمّن نحب وندفىء قلوبنا في وجوه الغرباء ونشد عليها ألا تتألم من طول مسافات فرضناها عليها...نحن لا نخشى أن نموت ولكننا نخشي على الرفاق أن يألموا لرحيلنا كما ألمنا لفراق الغرباء

أراهم في أحلامي كل مرة يرحلون فأبغي الوصل فيبتعدون حتي صرت أتألم من الحياة...لم أعلم أبدا أيهم يرحل أولا...ولكني دوما أعرف أن أحدهم راحل...واليوم وقد صار الشك يقين بفقدان عزيز في وقت قريب أركض خلفكم جميعا فلا تعزّوا عليّ الذكرى...فما أنا حيّة إلا لأذكركم ولأشدد من أزر المرابطين

لا أسألكم الإنساحب والتجابن...موتوا أعزّة ولا تعيشوا أذلاء...ولكن أرجوكم...لا تعزّوا عليّ الذكرى ولا تنسوا زيارتي في الأحلام حتى آتيكم...وبلّغوا سلامي للسابقين..صدقوني يا رفاق الأسفلت صداقاتي مع الراحلين بدأت بعد رحيلهم فصاروا صحبة في المنامات بعد أن كانوا غرباء...فأرجوكم لا تغربّوني بينكم وأنا بعد حيّة...لا أسألكم سوى الذكريات

10 Dec 2012

اثبت مكانك

هو: انتي عارفه حل البلد دي إيه يا آنسه؟
أنا: خير؟
هو: حرب أهلية...انا مانزلتش ولا مظاهره من أول ٢٥ يناير ولا حتى مظاهرة سواقين التاكسي مع اني مضرور وكمان انتخبت شفيق عند في الإخوان المسلمين...حلها حرب أهلية ونخلص عليهم
أنا: طيب
هو: انتي شايفه حل تاني
أنا: الحل عند الله...إحنا هنفضل ولا ١٠ سنين كمال عالحال ده الصبر طيب
هو: يعني انتي مش شايفه حد كويس عالساحة دلوقت ينفع؟
أنا: لأ...احنا دلوقت في مرحلة القضاء على ولاد الوسخه كلهم...هيفضل يحكمنا أشكال وسخه لحد ما حد نضيف ياخد خبره ويطلع يسوق
هو: معاكي حق يا أستاذه بس كده كتير
أنا: أمر الله بقى أدينا هنشوف إيه اللي هيحصل ماحدش عارف ربك هيوديها فين
هو: ربنا يحلها من عنده بقى
أنا:يارب

-----------------------

أنا: انتي كويسه؟
هي: لأ
أنا: في إيه خير؟
هي: فلوس الشغل وقفت...الشغل قفل
أنا: مافيش أمل يرجع تاني قريب؟
هي: لأ

-----------------------
مالهاش حل تاني...مرتبي يتقسم على اتنين...نص ليها ونص ليا لحد ما هي تلاقي شغل أو أنا ألاقي شغلانه إضافيه...شغل الكروشيه ممكن يسند برده...طب اللي بياكل رجوع هيعمل إيه لما مايلاقيهوش؟!
-----------------------
صمت
-----------------------
الناس منهارين ضحك وتريقه على تويتر والفيس بوك من القهره...ماعندهمش حلول تانيه...الناس اللي مش هتلاقي تاكل فعلا هتعمل إيه؟

-----------------------
فجأة الريس اللي مضى عالقانون بتاع الضرايب الصبح قرر إنه "يأجل تنفيذه" بالليل...بعدها بأقل من ست ساعات...في حد عبيط في الليله دي وبكل تأكيد ماهوّاش أنا...الفقر جاي جاي مهما اتأجل...والغريب إنها مش فارقه معايا...اللي ماخافش من الموت مش هيخاف من الفقر...طيب الفقير هيعمل إيه؟
-----------------------
غفلقت يا أمّونه من كل النواحي...المشهد ده انا شوفته كتير...كتير أوي...قبل كل بدايه جديده في حياتي الدنيا اتطربقت قبلها تماما...جابت ضرفها...خدت على كده...وعشان كده وقت الأزمة الشديده لما الدنيا بتطربق دايما بنبسط وبسترخي تماما في انتظار البداية الجديدة...بطلت انزعج من النوايب من زمان...بالعكس بقيت بنبسط...حقيقي دلوقت مانفسيش في حاجة...هقعد كده واسترخي تماما عشان استجمع شوية طاقة للبداية الجديدة...هسيب الحاجات كلها تتفاعل مع بعض ومش هتدخل...خليها تطربق وتقع عالجنب اللي يريحها...كالمعتاد يعني...أنا مش سوبر مان ولا حيلتيش غير الصبر...والأمل مابيخلصش...مش هفكر حتى في آليات البقاء لأن البقاء مش مهم...مش ضروري أكون أنا كشخص من الناس اللي هيعدوا من الأزمة للبداية الجديدة...يمكن أروح في معركة...ويمكن أروح وانا في سريري...انا ماعرفش...ومش مهتمه...زي كل نهايه فيها ناس بتروح...ممكن يكون المره دي دوري...ويمكن مايكونش...مش مهم...المهم ان في بداية جديدة جايه بعد الوضع الجحيمي القائم...ومش مهم البداية تكون لحاجة كويسه في حد ذاتها...بس المهم انها هتكون حاجة أفضل
ومن مميزات الوضع الجحيمي القائم إنه بيطرش وساخته عالوش..والوساخة هتتشال وتترمي...وهيفضل الحاجات الأنضف...والوساخه هترجع تاني تطفح عالوش...وتتشال وتترمي...وتفضل الحاجات الأنضف...وهكذا دواليك لحد ما يبقاش عالوش غير حاجات نضيفه في حد ذاتها مش بس زنضف من اللي اتشال واترمى...الوساخه بقى تتشال باستفتاء...بانتخابات..بحرب أهلية...مش هتفرق...مطرح ماترسي دقلها
لحد ما تتشال الوساخة مش محتاجة غير حبة سكون...شوية دفا...ومش ضروري حتى كتف حد اسند راسي عليه...ممكن بس أتني ركبي وأخد رجليا في حضني واسمع مزيكا وأفكر في البداية اللي جاية لحد الوضع الجحيمي ما ينتهي لأنه خارج نطاق سيطرتي...واضحك لوحدي عالأشكال الوسخه اللي بتطفح كل يوم عالوش...وأضحك عالغشاشين والمنافقين وهم بينكشفوا...وابتسم بهدوء وانا شايفه كل الثوابت بتتكسر 
 كل شيء بينتهي...حتى النهاية بتنتهي...وتيجي البداية الجديدة تبدأ ترص ثوابت جديدة...شيء مش سهل....سنتين بحالهم دفعنا فيهم دم كتير واحتمال لسه ندفع دم تاني عشان قوائم الوساخه تتكسر مع ثوابتها...الحلم بيتحقق واحده واحده...وبالتدريج كل الحاجات بتتآكل وبيحل محلها حاجات جديدة...مشفقه جدا على الناس المنهارة ومش واخدين بالهم إن وسط الجحيم في حاجة صغنونه حلوه أوي بتتولد...وافتكر إن الماس بيبقى عليه رايش كتير...والدهب عشان يتشكل لازم ينصهر...الجحيم مطلوب والكوارث إلزامية...وعشان تسلك البلاعة لازم تطلع كل الوساخه اللي في قعر الطرنش

20 Nov 2012

محمد محمود فور داميز

عشان نخلص من الموال الأهطل بتاع كل مره يحصل فيها اشتباكات في محمد محمود ويقعدوا يسألونا إيه اللي وداكوا هناك ومين اللي بدأ الضرب إلخ هذه الأسئلة.

تنويه:
انا هتكلم من منظور شخصي بحت ونظرا لأني مش مهتمه مين شايف الدنيا زيي كده ومين شايفها بشكل تاني فأنا هقفل التعليقات على البوست ده...ممكن صحابي بس يعلقوا على الفيس بوك لما أعمله نووت هناك.

خلفية مهمة:
طول ال ١٨ يوم بتوع اعتصام يناير اللي أدى لإزاحة مبارك أنا شخصيا مكانش عندي سبب محدد لازقني في الميدان بغرا اسود غير إيماني بإني لازم أفضل مع الناس اللي حواليا دي وماينفعش أروح وأسيبهم لأن دول أنضف ناس في البلد...ولنفس السبب مشيت يوم التنحي وانا مش فاهمه ليه إحنا مروحين مع إننا كنا بنهتف "الشعب يريد اسقاط النظام" وأدينا مروحين و"النظام العسكري" لسه ما سقطش داحنا يادوبك شيلنا حسني....روّحت عشان "الناس" مشيوا...طول الـ ١٨ يوم لما كان بيحصل ركود ونحتاس ونبقي مش فاهمين حاجة كان حد بيقولي إحنا هنصعّد إزاي؟ كانت إجابتي دايما ثابته: هنفضل قاعدين لحد أما الأمور تحركنا لوحدها...وده اللي حصل فعلا...فجأه اتنطرنا عند مجلس الوزرا في اعتصام...فجأه بقينا عند ميدان عابدين...وفضلنا نزيد ونزيد لحد ماصلنا للقصر الجمهوري


يوم ٢٨ يناير كانت أول مره في حياتي أمشي في شارع في البلد دي وأنا حاسه إن الأرض اللي بدوس عليها دي ليا فيها حق باعتبار إن دي بلد"ي"...ومشيت شارع طلعت حرب من أوله لآخره وانا بغني الشارع لنا إحنا لوحدنا والناس التانيين دول مش مننا...والناس التانيين دول كانوا ولازالوا بالنسبالي الداخليه قبل أي حد/مؤسسه في النظام...قبل حسني مبارك نفسه

أنا ماعرفش مين علق يافطة المطالب عالعماره الكبيره على مدخل طلعت حرب...مكانش فيها حاجة مضايقاني مع إن مكانش ممكن أفكر في المطالب دي أصلا...كان كل همي إن حسني يمشي بعد ما الداخليه ريحتنا من وشها وطلعت تجري على البلاعه اللي انطرشوا في وشنا منها...كان في اتفاق ضمني إن الهتافات اللي مافيش عليها إجماع مابنرددهاش فالهتاف بيفطس وماحدش بيكرره لأن مافيش عدد كافي وسط الجموع الكبيره بيردد وراه...وإن اليافطه اللي عليها مطالب لو مافيش عليها إجماع بتتقطع...ولو حد اعترض بيعملها تاني...وبتحصل خناقه...وزي ما بيصطلحوا بيحصل...يا بيتفقوا نسيبها...يا بيتفقوا نقطعها...والخناقه تفاصيلها بتتنقل وبتخلص على الاتفاق العام...يا اتقطعت يا اتسابت والكل مرضي في الحالتين

يوم ٢٨ يناير كانت أول مظاهره انزلها في حياتي...ومكانش عندي رغبه في حاجة غير إن حسني يمشي وكل حاجة تتغير...الداخليه تبطل تموت الناس في الأقسام..والفقرا ياكل كويس..والعيال تتعلم كويس...والعيان يتعالج....إلخ...مكانش عندي أي أهداف شخصيه من أي نوع...كنت بشتغل شغلانه كويسه وبقبض مرتب كويس واللي عاوزاه بعمله واللي بحتاجة بشتريه...على المستوى الفردي مكانش في حاجة ناقصاني...بس كنت مخنوقه إن في ناس كتير مش عارفه تعيش زي مانا عايشه وماشيين راكبهم الهم في الشوارع...مكانش حد بيبتسم...وطول الوقت كان عندي إحساس ان الداخليه راكبه فوق أنفاسي...وللسبب ده مكانش عندي بطاقه لحد سن ٢٧ سنه...كنت دايما بتباهى وسط صحابي إن الدوله ماتعرفش عني حاجة من بعد ماتخرجت عشان ماعنديش بطاقه


باختصار مكانش عندي مطالب واضحة بآليات لتنفيذها ولا بدايل للواقع..أنا كنت نازله عشان أرمي اللي مش عاجبني في الزباله مش أكتر..وكان عندي أمل إن ده هيحصل


محمد محمود صفر:
معظم الناس فاكرين إن حكاية محمد محمود تبدأ في نوفمبر...أحب أقولكم إن قصتنا مع محمد محمود تبدأ ليلة ٢٩ يناير لما كان القناصه بيحشوا رقبة أي حد يعتّب الشارع ده بعد ما اتمرمطوا وانسحبوا لمبنى الوزاره ومش عارفين يطلعوا منه...المصابين كانوا بيتنقلوا للمستشفى الميداني اللي في الشارع الصغير في ضهر كنتاكي

اللي قدرت استوعبه يومها إن الشارع ده الداخليه بتعتبر محمد محمود الخط الحدودي بتاعها

اللي كان بيدخل الشارع ده في الليله دي مكانش عنده هدف غير إنه يدور علي محل يجيب منه أكل...يدخل الحمام...مطالب حياتيه طبيعيه جدا كان بيحاول يلبيها في الشارع ده لأنه كان أقرب شارع لمكان ما هو قاعد...بدون هدف أو مطلب سياسي...وبرده انضرب بالنار

محمد محمود واحد واتنين وتلاته وأربعه وخمسه وعشرين وستين وميّه:
محمد محمود واحد كانت يوم أحداث مسرح البالون....بعد ما الناس انضربت هناك والمعتصمين انضربوا عند ماسبيرو...في المكانين من الداخليه...الناس نزلت تتظاهر عند الداخليه كسلوك طبيعي لأي مواطنين في العالم معترضين على سلوك مؤسسه ما فبينزلوا يتظاهروا ضدها أمام مبناها...ولما ابتدوا يضربوا الناس عند الوزاره لحد ما رجعوهم في محمد محمود برده ناس كتير نزلت...عشان ماحدش عنده استعداد الداخليه تفتري علينا تاني...لأن افتراها ده كان سبب مهم جدا نزّل جموع من البشر من يوم ٢٥ يناير وكل الأيام اللي بعد كده...مكانش معايا سلاح...ولا كنت بعرف أحدف طوب...كنت نازله عشان "الداخلية بتضرب الناس"...وبحاول أساعد باللي أقدر عليه حتى لو كان اني أطبطب على الناس وامسحلهم عينيهم من الغاز وأدق على ضهرهم وأشدهم من إيدهم وهم مش شايفين لحد حته فيها هوا نضيف يتنفسوه...عشان يرجعوا تاني...لأني مابعرفش أعمل زيهم وعاوزاهم يكملوا فبحاول أساعدهم يكملوا...ماكنتش عاوزه أموت...ولا عاوزه حد يموت...بس من يوم ٢٨ يناير وانا بنزل وعارفه إني ممكن أموت...أتصاب بعاهه..أو اتعور وارقد في المستشفى...وبرده كنت بنزل عشان كل ده مش مهم...المهم إن الداخليه تبطل افترا...وكرهي الشديد ليهم منبعه إني بكره الافترا ولأنهم بيكرهوني بدون أسباب شخصيه...بيكرهوني لأني مش بلبس زيهم وبعمل زيهم...ماعنديش أسباب شخصيه...أنا ماليش حد صديق أو قريب الداخلية قتلته أو ضرّته بأي شكل...ولا ضرّوني شخصيا بشكل مباشر

الحكاية ببساطه:
أنا أكره الافترا...الداخليه مفتريه...إذا أنا أكره الداخلية
+
الداخلية بتفتري على الناس اللي مرتباتهم من جيبهم ووظيفتهم تحميهم...أنا بدفع ضرايب فأنا بالتالي بدفع جزء من رواتبهم
+
أنا مش معايا سلاح...مش بعرف زحدف طوب...ماقدرش اسببلهم خساير زي اللي بيسببوها للناس

=

أنا مع أي حد بينزل يواجه الداخليه: دم بدم...رصاص برصاص...حتى لو هموت في سبيل ده لأن مواجهة الظلم فرض عين عليا


مافيش مطالب سياسية واضحة بآليات لتنفيذها ولا بدايل للواقع..أنا كنت نازله عشان أقاوم ما أكره: افترا الداخليه

مواجهات محمد محمود في المرّات اللي بعد كده كلها تنويعات على محمد محمود ١

الأسباب والجدوي والإطار العام:
زي أي مصارع روماني بيترمي في الحلبة قصاد أسد أو مصارع تاني حتى لو غصب ومش بختياره...مهما كان ضعف قوته قصاد قوة الطرف التاني ماعندوش رغبة في الإنسحاب...لأن الانسحاب مالوش معنى: يا هو يموت يا الطرف التاني يموت...يا يتعوروا هم الإتنين وتخلص الجولة وهم مكيّتين...يا إما الخصم ينسحب

أي اتنين بيتخانقوا دايما بيحاولوا يضربوا بعض في نطاق ضعفهم...واللي بيخش خناقه بيهمه همه إنه يضرب مهما انضرب...ولو الخناقه اتفضت بإصابات بدون تراضي أو صلح واضح نفس الخناقه بتتعاد تاني لنفس الأسباب القديمه مضاف إليها خساير الخناقة السابقه كسبب في حد ذاته

المكتسبات:
الداخلية المحصنه بأسوار وسلاح اضطرت تحاصر نفسها بجدران طوب يفصلها عن محمد محمود...خط الداخلية الدفاعي/الحدودي انسحب للشارع الموازي لمحمد محمود وتم إعلانه كمنطقه محرره تخص الناس اللي شاركوا في معارك تحريره

إحنا مين؟
إحنا كل واحد نزل مواجهة مع قوات أمنية في الشارع ده...مالناش اسم ولا شكل ولا كيان ولا لينا مطالب سياسية ولا أهداف عظمى تصب في صالح الوطن والبتنجان ده...إحنا أصلا مانعرفش عن بعض غير إننا بنتقابل هناك بدون اتفاق...كل مره فعلا بنزل بشوف نفس الوشوش بتاعة الناس اللي ماعرفهاش في نفس الأماكن

الخلاصة:
إحنا موتنا واصبنا بعاهات جسدية ونفسيه وانضربنا واتقبض علينا وشمينا غاز لما اتعمينا...والجدران اللي اتبنت حوالين الداخليه فعليا اتبنت على لحمنا وعضمنا ودمنا ودموعنا...ماحناش محتاجين سبب ولا مطلب عشان ننزل ندافع عن الشارع بتاعنا لما الداخلية تحاول تدخله تاني وتفتري فيه على الناس...أي ناس...حتى لو الناس دي مايخصوناش فالشارع ده يخصنا وإحنا مش موافقين إن كائن من كان يسيح فيه دم حد واللي هيحاول يعمل كده أيا كان هو مين هننزله تاني ندافع عن الشارع بتاعنا مهما كان ضعفنا قصاد قوته...إحنا مالناش حاجة في البلد دي غير الشارع ده...دفعنا تمنه بالغالي ومش هنفرط فيه..وانا شخصيا مابيفرقش معايا مين يشتمني أو يخوّني أو يتهمني بالغباء السياسي والمراهقة الفكريه وانعدام الهدف والرؤية وكل الكلام العظيم اللي بيفلقوا دين أبونا تنظير بيه...أنا أصلا طول عمري عايشه بعد الهامش بهامش ول اعمري اهتميت بكلام الناس...أي ناس


فأرجوكم ترحموا أمي العيانه وتبطلوا تسألوني كل مره بيحصل فيها اشتباكات في محمد محمود وبنزل مع الناس اديهم قطن بخل انا بعمل كده ليه

7 Nov 2012

ماتقولش إيه إديتنا مصر وكده

ألوووو....مصر؟ معاكي أمينة زكي من العاصمة...عينة من مخاليق ربنا اللي أنعم بميلادهم على أرضك الكريمة...أحب أديكي نبذة عن نفسي
 إسمي أمينة زكي....هكمل ٣٢ سنه عايشه بنهل من خيرك قبل عيد الثورة (خلينا مؤدبين ونمشيها ثورة) بيومين...تلاته وعشرين يناير يعني..متعلمه في مدارس حكومة...نشأت في حلوان وعيشت فيها ٢٧ سنه...وهنا بقى تكمن المشكلة يا مصر...أي حد بيحكي قصة حياته بيقول "نشأت وترعرعت"..أنا بقى نشأت بس...ماترعرعتش يا مصر

طبعا إنت دلوقت مصدومه يا مصر وقربتي تعيطي (أفضل أظن كده مع إني عارفه إن ده مش صحيح)...أقولك أنا بقى ليه ماترعرعتش...عشان يا مصر حلوان فيها مصانع أسمنت بتطلع عادم منيل بستين نيله دمرلي الجهاز التنفسي وأصابتني بحساسية اسطوريه في الصدر وانا طفله راحت مع البلوغ...وأصابتني بحساسية مزمنه في الجيوب الأنفية أصابتني وانا عندي ١٦ سنه أدت لفقدان تدريجي لحاسة الشم...ده غير بقي سعادتك إن جهازي التنفسي مابقاش يستحمل البرد فطول الشتا عندي كحة مابتروحش والدكاتره بيقولوا ماهياش حساسية...

أقولك بقى اكتشفنا ازاي انها مش حساسية...يوم لما كملت ٢١ سنه يا مصر...يوم عيد ميلادي الواحد وحشرين تحديدا روحت لاستشاري في القصر العيني (واخده بالك من التايتل يا مصر؟) عشان عندي كحه جافه بتقطع صدري ومابتروحش بقالها اكتر من شهر...ست الاستشاري اديتني مضاد حيوي وموسع شعب هوائية صابوني بتسمم دوا في جرعتين...قعدت بعدها اسبوعين يا مصر بتعالج من هرية الجهاز الهضمي من أول فم المعدة لحد القولوني...بس الحمد لله الكحة راحت والدكتور قالي ان دي مش حساسيه..وبالمناسبة صحيح واحد من الأدويه اللي عالجتني من هرية البدن أحد أعراضه الجانبيه "إدرار لبن"...والحمد لله انا اتطمنت على غددي اللبنية يا مصر بعد لما لقطت العرض الجانبي

نرجع بقي تاني لفترة الترعرع يا مصر...معامل تحاليلك يا بلد قررت اني عندي انيميا البحر الأبيض المتوسط وانا عندي أقل من ٧ سنين...وده يعني ممنوع عني الأطعمه اللي فيها "حديد"..ومافيش داعي أحكيلك عاللي كان بيجرالي لما يجيلي أنيميا عادية...كانت بتبقي حوسة حوسة حوسة...عشان دي علاجها حديد ودوكهه بيمنعوا عني بسببها الحديد...أطلقي لخيالك العنان عشان تقدري تفهمي الوضع كان بيبقى شكله إيه

تحبي أحكيلك كمان عن المضاد الحيوي اللي كنت باخده بشكل دوري عشان شرخ في طبلة الأذن برده راح مع البلوغ؟ أحكيلك يا مصر...المضاد الحيوي ده يا غاليه بيبوز الكلى...الكبد...وبعض الأعضاء الأخرى حسب مزاجه يا مصر...انا الحمد لله ربنا رحمني من الأمراض المستعصيه وكان أثر المضاد الحيوي ده إن أسناني تكوينها مش طبيعي ومعدلات تآكلها أسرع بكتير عن معدلات تآكل الأسنان الطبيعيه...ومش عاوزه أحكيلك عن اللي عمله في جدور السنان يا مصر...تقوليش مصبوبه خرسانه!!!!!

ومافيش داعي كمان أحكيلك على النيير ديث إكسبيريانس اللي مريت بيها وانا عندي خمسه وعشرين سنه لما مية المجاري ضربت في محطة مياه الشرب في حلوان ونسيوا يقفلوا الماسوره العموميه اللي بتغذي البيوت قبل مية الشرب المخلوطة بمية الصرف الصحي توصل للبيوت يا مصر...حقيقي كنت هموت لأني كنت قربت أرجع صوابع رجليا من بقي

أما عن المدارس يا عزيزتي...والشغل في القطاع الخاص والعام فيكفيني أقولك إني لولا اني كنت عارفه اني لو اعتمدت علي المدرسة هفشل فشل ذريع كان زماني دلوقت مابعرفش أكتب إسمي...وبعد ماتخرجت وروحت أديكي حقك في تعليمي المجاني واشتغل مدرسه رسم يا حبيبتي كان مرتبي في الشهر مش هيكفي مواصلاتي رايح جاي للمدرسة يا مصر...الحصة كانت بتلاته جنيه وريال (بعد خصم الضرائب) شوفتي الحلاوة يا مصر؟

انا هكمل اتنين وتلاتين سنه يا مصر وماعنديش أوبشن أحصل بيه على معاش غير معاش النقابه اللي مايأكلنيش دلوقت عيش حاف...فتخيلي انتي لما اطلع انا معاش هيبقى عامل إزاي...ماعنديش بيت يلمني ولو إيجار مستقر ماحدش من حقه يرميني في الشوارع لما يجيله مزاج...ماعنديش تأمين صحي...وأبويا وأمي مستورين يا مصر بس مش أغنيا..ولا هيسيبولي ورث يجيبلي بسكليته بعد عمر طويل

وطبعا مش هقول إيه إديتنا مصر...آدي اللي خدته منك...مش هقولك حتى خديه وسيبيني في حالي..ولا هقولك عاوزه تعويض عن الترعرع اللي ماترعرعتوش يا مصر...أنا كل اللي طالباه منك إنك ماتدينيش أكتر من كده...كفايه عليا اللي أخدته منك يا بلد...فلتكتفي بهذا القدر من العطاء يا مصر

5 Aug 2012

قلب معلق بكفوف تلوح بالوداع

أما آن لذلك الكف أن يستريح! فقد ضاق قلبي ذرعا بعناقات ما قبل الرحيل وتلويحات الوداع!

يتعجبون من نحول جسدي وشحوب وجهي وانحنائة كست ظهري...ألم تعلموا أن الفراق يولد حسرة...وكسرة...ويدفن حزنا في مآقي العيون! كم أكره تلك المسافات اللتي تفصلني عن وجوه آنست إليها وأذرع لم اتكيء يوما إلا عليها وأفئدة اتخذت منها يوما مستقر وعيون لا أذكرها إلا بخير..ودمع..وشوق لا ينتهي. بالفراق قد ضاقت دنياي واتسعت زوايا الكون اللتي لا أدركها بنظري المجرد. كم أكره الخرائط والمسافات والحدود وأوراق يملأها الأحبة فيختفوا. فصرت أكره الطائرات والبحار وأطراف الكون اللتي تخفِ عني رفاق الدرب

ويسألونك عن المسافات قل هي أشياء أقطعها كل يوم بلا كلل إلى قدمي من أأتنس بحضوره..حتى إذا فاقت المسافة قدرتي على الهرولة صارت لعناتي عليها تسابيح وردي المقدّس..أما عن الحزن يا رفاق أخبركم أنه لم يعد مقدس..فقد ابتذلته الوداعات حتى أصبح أرخص من أن ينثر تحت أقدام الراحلين...وعندما فقد الحزن معناه...ذبح الكلمات ثم انتحر على بلاط صالات الوداع في المطارات الباردة

أما الرحيل...فهو عادة القلوب الطيبة..وكما أخبرنا الأولون: إن الله إذا اراد نزع خصلة قبض أرواح حامليها...ولأن بلدي ملعونه..فالله ينزع منها الطيبة بإخراج قلوب حامليها من بين ظهرانينا لتسكن بلاد أقل قسوة..وأظل انا هنا في تلك البلدة القاسي أهلها كمعبر للأفئدة الطيبة..تمر عليّ لتسكن قليلا ثم تحمل حقائبها وتنصرف..حاملة معها قطعة من قلبي..دمعة من عيني..وذكرى طيبة تأنس إليها كلما وخزها الحنين.  وأنا..هنا..وحدي..لايؤنسني شيء سوى ارتعادة أطرافي من فرط البرودة اللتي خلفها رحيل أحدهم

لا أعلم كيف احتمل قلبي الحياة بين وداع وآخر...لكنني أشعر به مازال ينبض...صحيح أن النبض خافت والعروق باهتة...لكن الذكرى واضحة جلية كشمس منتصف الظهر..ربما ما أبقى عليه سوى الأمل بلقاء قد لا يجيء أبدا..أو ربما الاحتراق الناتج عن تمزقه من فرط الغضب...لكن على الأرجح أن ما يبقيه حيا تلك اللعنة اللتي القاها عليّ كائن مجهول...لعنة تجعل قلبي معلق في كفوف العابرين يرسمون به الحزن خطوط على جبيني المهتريء

لو أنني فقط كف لكنت لملمتهم من أطراف الدنيا وظللت عليهم ووهبتهم باطني مسكن وجعلت لهم من قلبي مأكل...ولكنني فقط عابرة سبيل...قلب معلق بكفوف تلوح بالوداع...جسد نحيل يهرول بين الفراق واللقاء ككلب حيران أبله يلهث خلف المستحيل ولا يتعلم درسه أبدا

28 Jun 2012

مافيش تعلب…عمل مقلب؟

المشكله اللتي نواجهها منذ مده أننا اكتشفنا تدريجيا (كلٌ حسب وعيه وقدرته على قراءة الواقع وقابليته لتصديق الحقائق): إننا اتعمل فينا مقلب كبير اسمه تنحي مبارك  وتسليم سلطه إدارة البلاد للمجلس الأعلى للقوات المسلحة..لكن للأسف ليس هناك بديل متاح. إذا نظرنا إلى العام ونصف العام الماضيين سنكتشف أن الشعب المصري أوشك على التمرد الكامل على الإنقياد لنظرية عدم الاتساق المعرفي…بالرغم من أنه لم يستطع بعد الإطاحة بنظام مبارك…لكنها نقطه تحسب للشعب وخطوه جيده في الوصول بالثوره لبر الأمان…يمكن المحاولات المستميته للتغلب على فخ عدم الاتساق المعرفي
Cognitive Dissonance
 هي اللي فعلا مخليانا قادرين نصمد لحد دلوقت.


نظرية عدم الاتساق المعرفي هي طريقه لتشكيل وعي الجماهير/الجموع/الشعب…ببساطه النظريه بتقول ان الإنسان عنده ميل طبيعي لبلوغ حالة اتساق معرفي..بمعنى إن رد فعله لما يحدث حوله يكون متسق مع مبادئه. عدم الاتساق المعرفي بيحصل لما مبدأ من ضمن قناعاته بيخالف الواقع نتيجة حاجة حصلت…يعني مثلا: الجيش وظيفته حماية الدوله…"معلومه" لن يختلف عليها اثنين من سكان أرض الكوكب…ثم يحدث أن يتورط أفراد الجيش ومركباتهم في قتل متظاهرين…دي اللحظه اللي بيحصل فيها عدم اتساق معرفي…المعلومه الأصليه "الجيش بيحمي المواطنين" بتتصارع مع الموقف اللي حصل "الجيش بيعتدي على المواطنين"..في المواقف المماثله من يتحكم في الإعلام يحاول السيطره على رد فعل الجماهير..الإنسان مابيكونش عنده حلول كتير للوصول لحالة الاتزان/الاتساق المعرفي
- الإنكار: ده ماحصلش أصلا…الجيش مستحيل يعمل كده…دول إخوان وحماس وكائنات فضائيه لابسين جيش --->الطرفين مجني عليهم
- تبرير الفعل/ مهاجمة الضحية: إيه اللي وداها هناك؟ أكيد المتظاهرين اعتدوا على الجيش الأول---> يستاهلوا
- تعديل القناعات الشخصيه: الجيش اللي بيحمي المواطنين اعتدي عليهم ---> ثم قرار برد فعل ما


أول ما بيحصل موقف زي ده وسائل الإعلام المملوكه للدوله كلها بتتجه نحو مساعده المواطن في إنكار الحدث…ولو فشلوا (بظهور أدله دامغه زي الفيديوهات والصور…الخ)…ساعتها بتبدأ تساعد المواطن علي خداع نفسه بمهاجمة الضحية: تبرير الفعل…وطبعا بيضاف عليهم مجهود مستميت من كل من له مصلحة من السلطه القائمه إنه يتبع نفس المنهج إما الإنكار أو لوم الضحية لتجنب تعديل المواطن لقناعاته مما يستلزم رد فعل (التظاهر أو الاعتصام أو ممارسه العنف بشكل من الأشكال---> ردود فعل ثورية).


ده بالزبط اللي بيحصل من أول يوم…وده بالزبط اللي نجحنا في تجاوزه إلى حد كبير ومابقيناش بننخدع بيه أو على الأقل بنكتشف الخدعة بسرعة…وده أهم مكسب من مكاسب الثوره: السلطه فقدت جزء كبير من قدرتها على تشكيل وعي المواطن وبالتالي فقدت جزء كبير من القدره على التحكم في رد فعله.


يوم ٢٥ يناير ٢٠١٢ بعد عام من الخداع الجمعي بإن: الشعب كره الثوره خلاص وقابل العسكر في سدة الحكم. فوجئنا بكافة المحافظات التي انتفضت ضد مبارك بتهتف في وقت واحد: يسقط يسقط حكم العسكر. من ضمن المحافظات اللي قام فيها مظاهرات حاشده اليوم ده ٤ محافظات لم تتحرك طوال الـ ١٨ يوم، أذكر منهم المنيا وأسيوط.


وبالرغم من أن الكتله الثوريه فقدت جزء كبير من قدرتها على الحشد الجماهيري إلا أن الجماهير أثبتت إنها قادرة على اتخاذ رد الفعل بشكل غير مفهوم: التظاهرات العظيمه في العديد من المحافظات عقب إعلان الحكم التافه ضد مبارك وبراءة مساعدي وزير الداخلية. يومها تظاهر المواطنون في الشوارع دون حاجة إلى الحشد في حين أنه لم يحرك ساكنا عند حل مجلس الشعب الذي فقد ثقة ناخبيه. وظهر فقدان الثقه في الإسلاميين المسيطرين على أغلبية مجلس الشعب في انتخابات الرئاسه حيث فقد الإخوان المسلمون حوالي ٤٠٪ من قدرتهم على الحشد الجماهيري الانتخابي.


والنهارده وإحنا خلاص علي وشك استقبال رئيس جديد بنكتشف إن الشعب قابل علي مضض مرشحي الجولة الثانية. فنسبة كبيرة من الناخبين لا أعرف قدرها ولكني أعلم أنها نسبة يعتد بها: عاصرين على نفسهم ليمون في اختيار أحدهم كرهاً للآخر وليس عن قناعه بمن ينتخبه. والنتيجة إن المواطنين البسطاء بيتناقشوا في صلاحيات الرئيس ومتبرمين من صدور إعلان دستوري مكمل يأتيهم بطرطور في سدة الحكم عوضا عن رئيس خصمت تكاليف الانتخابات اللتي أتت به من جيوبهم.


المحصلة النهائية: الشعب المصري مدرك تماما أن الثورة قامت ضد الحكم العسكري لمصر وليس شخص مبارك ولكنه لم يوفق لإيجاد بديل بعد لأنه يرفض استبدال ثعالب العسكر بثعالب تتحدث بإسم الله أو ثعالب تتحدث بإسم الدولة المدنيه. ولحين إيجاد البديل المناسب سيظل الشعب يكافح بطريقته الثعالب الموجوده على الساحة مهما غيرت أثوابها.


*عنوان المقال مقتبس من أغنيه لفؤاد المهندس من فيلم العتبه جزاز متقمصا شخصية فرافيرو المنقذ يغنينا: مافيش كارثه؟ مافيش نايبه؟ مافيش تعلب..عمل مقلب؟ دانا خالي شغل بقالي يومين.

11 Jun 2012

حوش اللي وقع منك يا كابتن

في ناس بتدخل حياتك وبتحتل مساحة في الهامش العريض بتاع العلاقات في حياتك...ناس مابتشوفهاش كل يوم...ولا بتاكل وتشرب معاهم...بيكونوا في الزاويه البعيده...لما بتتقابلوا مابيكونش بالضروره في بينكم مواقف مهمه...ولما بترغوا مابيكونش بالضروره في حاجات شخصيه...ممكن بس يكونوا ناس بتحب ترغي معاهم لما تكون فاضي وهم متاحين...عادة بيكونوا ظراف كفايه عشان تحتفظ بعلاقه قائمه بينك وبينهم ولو ضعيفه...يمكن تكون دماغهم عاجباك...قعدتهم حلوه....الخ..بس مش دايما الظروف بتجمعكوا

وتروح الأيام وتيجي الأيام والمسافه بينكوا تقصر بدون ترتيب مسبق...من غير اتفاق مابينكم...وتلاقي واحد فيكو بيسأل التاني سؤال عبيط جدا...عن حاجه يمكن ماتكونش مهمه خالص..وإجابه السؤال مش بالضروره تغير حياتك...ولا تنقذك من الوقوع في الهاوية والكلام الكبير ده كلّه...الإجابه بس هتسفخك ييجي تسعين قلم حنين علي سهوه..وإذ بك تفاجأ بتسأل نفسك: أحيييييييييه! هو أنا كنت فين منّي الحبّه دول!

الحبه دول ممكن يكونوا سنه..اتنين...انت وظروفك...وتلاقي فجأه طاقه اتفحتلك يمكن ماتكونش واخد بالك اتردمت امتى ولا إزاي...بس بتكتشف ان في حاجات كتير أوي وقعت منّك...لدرجة ممكن تخليك مش فاهم نفسك أصلا بقيت عامل إزاي دلوقت...وعشان الناس دي عادة بتكون ناس كويسه...هيقعدوا يشاورولك عاللي وقع منك...ويمكن يكونوا كرما كفايه فيلملموه معاك كمان...حته حته...
 
وكل ماهتلاقي حته ناقصه هتروح تسألهم: الحتّه دي فين؟...هيدور معاك عليها برده..ولو لقاها يمكن يوطي يجيبهالك بدل ما يشاورلك عليها...ويحطها مكانها..مش عشان هو ملاك...يمكن عشان في ناس ربنا خلقها عشان تساعد الناس التانيه لما تكون محتاسه...ويمكن عشان تركيب البازل دايما ممتع..ويمكن عشان الاتنين...ويمكن عشان اسباب انت ماعندكش عنها فكره..واحتمال يكون هو كمان ماعندهوش فكره...وهتلاقيه كمان هو أصلا بيلاقي بالصدفه فتافيتك الواقعه منك ويديهالك

يمكن الناس دي ماتبقاش أعز صحابك بعد كده...ويمكن مايبقوش مهمين في حياتك بعدها بسنتين..ويمكن يلاقوا حاجات واقعه منهم وهم بيدوروا معاك عاللي وقع منك...ويمكن مايستفيدوش أي حاجة من مساعدتهم ليك خالص...بس الأكيد ان الناس دي بعد سنين بتفضل محتله مساحة مهمه من الذاكره..بتفضل فاكر إن في يوم من الأيام كنت تايه وحايس وحد وقفك سألك: رايح فين يا كابتن؟ البتاعه دي وقعت منك!

في الحالات دي...من أهم الحاجات اللي بتتعلمها إنك تاخد بالك من نفسك...عشان مافيش حته منك تقع تاني...وبتتعلم برده إن الناس قريبه جدا...ومهمين جدا...مهما كانوا بعاد عنك...وإن ساعات اضعف العلاقات بتيجي عليك بفايده مابتجيش من علاقات تانيه كتير أقوي بمراحل!

6 Jun 2012

فتله على فتله..ودوباره فوق دوباره تبقى نسيج

إنني قررت أن أدخل في حرب مع القبح، ولا رجعة عن هذا القرار
فإذا لم استطع إيقاف جيش الروم، أو زحف التتار
وإذا لم استطع أن أقتل الوحش.. فحسبي.. أنني أحدثت ثقباً في الجدار
نزار قباني                                        

كان عندي اجنده صغيره بجمع فيها أي كلام بيعجبني...منهم الأبيات اللي فوق دي...من الكلمات اللي علّمتني من مساهمة البني آدم في أي حاجة مش ضروري تكون مباشره وكبيره...ساعات بيكون مجهود متكرر بيتكركب فوق بعضه يشكل فرق بعد مده طويله...زي غرز الكروشيه اللي أمي قعدت سنين ترصّهم جنب بعض لحد ما عملت منهم ستاير لكل ضلفة زجاج بلكونه أو شباك موجود في بيتنا....بيتنا كان ٤ أوض ومطبخ وصاله وحمامين...وكل حيّز من دول ليه منفذ هواء واحد على الأقل بضلفتين

بابايا بعد ما  بطل الكفاح المباشر ضد نظام الحكم القائم أيام عبد الناصر نفّض إيديه تماما وكرس وقته للحياه الطبيعيه...بيت وعيال وساعات شغل...وبعدين اتفرّغ للآخر للعباده عشان عياله كبروا ومابقاش عند حاجة تانيه كبيره يعملها...لما كنت بسأل بابا هو ليه ماسابش البلد...وليه بطل الكفاح المباشر...قالّي إنه بقى لوحده ماعندوش حد مؤمن باللي هو مومن بيه فمضطر يكافح لوحده...وإن تمسكه بحقه كفرد هو ده كفاحة الفردي...وإنه يخلّف عيال يربيهم كويس ينقلّهم مبادئه ده جزء مهم جدا من الكفاح الفردي...بابا علمني انا واخواتي الاتنين (ولدين بالمناسبه انا بنت وحيده والصغيره كمان) إن إحنا مانسيبش حقنا...حتى لو حقنا ده شلن في أجره ميكروباص هتتاخد مننا غصب...كل واحد فينا وهو بيدافع لوحده عن حقه لوحده بيعلّم الناس اللي حواليه هي كمان ماتسيبش حقها...ناس هتتعلّم وناس هتتريق علينا...عادي...بابا علّمنا برده إن مالناش دعوه بالناس رأيهم إيه أدام إحنا عارفين إننا بنعمل الصح...والصح هو أي حاجة مش حرام...والدفاع عن الحقوق الفرديه كفاح مقدّس...ومساعده الناس التانيه انها تاخد حقها كفاح مقدّس...حتى لو كان الحق ده درجة نقصت غلط في ورقة زميلتي لو أخدتها تبقي هي الأولى على الفصل وأبقى أنا التانيه

الناس اللي كانت بتنزل مظاهرات بعدد قليل على سلالم نقابة الصحفيين...وفي الجامعه...وفي حتت تانيه كتير...بأعداد قليله ومتنطوره...بمرور السنين كتروا واتلملموا..وفي الآخر بقت ثوره على نظام قعد يظلم كتير...والظلم اتراكم...لما أصبح فوق الاحتمال..والصمت على الظلم اتراكم لحد  ماتحوّل غضب مكتوم...والغضب المكتوم اتراكم لحد ما أصبح ثوره علي نظام فاسد تعمّد إنه يحافظ علي جهل وفقر ومرض الشعب...وبرده كان حريص على إنه يخلّي الخوف يتراكم...وفضل الخوف يتراكم لحد ما بقي هو كمان غضب...صحيح إن تراكم الجهل أوشك يؤدي إن نفس النظام ده يرجع تاني...بس مش مهم...الفشل برده خبره بتتراكم...هتفشل مره...والتانيه...ويمكن التالته زي الثوره الفرنسيه...بس في كل فشل بتكتسب خبره..الخبره التراكميه دي هي اللي هتعلّي الوعيّ وتقلل الجهل شويه بشويه...practice makes perfect

أنا لسه بشتغل كروشيه...ولسه ماعنديش ستعداد أسيب البلد وأطفش واتوقف عن المساهمة التراكمية في التغيير...طول الوقت كان عندي فرص اسيب البلد وأمشي...وعارفه إني كنت هنجح برّه بالمفهوم العام: هعمل فلوس كتير ومش بعيد أبدا إني كنت اتشهر...بس كل مرّه كان بيجيلي فرص كنت بسأل نفسي: انا هستفيد فلوس وعيشه مرتاحة، هفيد البلد التانيه دي بإيه؟؟؟؟؟؟؟ ولا حاجة...البلاد التانيه دي مش محتاجاني...ولا شعوبهم محتاجة مساهمتي...لو أنا سافرت مين هيقول لصبي القهوجي اللي معظم الزباين بيتعاملوا معاه على إنه كم مهمل: تسلم إيدك، لما يحطلي الطلبات؟...دلوقت مابقيتش أنا لوحدي اللي بقوله تسلم إيدك...لو أنا مشيت الناس للي بتاخد بالها من العيال الصغيرين وقت الاشتباكات مع الداخليه هينقصوا واحد...والله أعلم ساعتها العيال دي هينقص منها كام واحد عشان مالقاش حد يشده من ايده وهو مش شايف وسط الغاز طلّعه يشم هوا عشان مايتخنقش...كام واحد لفّ واتدور يدخل تاني يثبت ويثبت اللي حواليه وينقذ ناس من ضرب خرطوش أو رصص حيّ وقت اشتباك...لمجرد إنه لقى بنت مافهاش ضربة كفّ...ماتعرفهوش ولا يعرفها...بس واقفه مستنياه على بعد ناصيه توطي تربطله رباط جزمته عشان هو بيكح من الغاز ومش شايف وكان هيتكفي على وشه بسبب الرباط المفكوك...فحس إن وجوده في المكان ده مهم...وإنه لازم يكمّل...وإنه لو جراله حاجة هيلاقي حد يلحقه قبل ما يجراله حاجة أكبر ممكن تكلّفه حياته كلها...لو أنا مشيت...الناس اللي بتطبطب على كتوف الناس وتقولهم: انتوا صح...كمّلوا...مش مهم نتكعبل كام مرّه المهم إننا نقوم ونكمّل...الناس دي هتنقص واحد..الواحد ده لو نقص ماعرفش كام واحد هيفقد الأمل عشان الواحد ده يأس وراح يدوّر على مصلحته...صحيح حقّه يعمل كده وماحدش يقدر يلومه...بس أنا ماعرفش زعمل كده...ماتربيتش على كده

الأنبيا والرسل نزلت عليهم الرسالات كأفراد...وبعضهم زي سيدنا نوح أول من كفر بكلامه أقرب الناس ليه...وبعضهم زي سيدنا موسى زكتر ناس تعبوه هم الناس المؤمنين بيه..صحيح إننا مش أنبيا ولا رسل...بس إحنا برده مش بننشر رساله سماويه...إحنا بنساعد ناس تانيه مانعرفهاش إنهم يعيشوا في بلد تعاملهم زي أي بلد كويسه ما بتعامل شعوبها...بنساعدهم يستردوا حقهم في الحياة الكريمه...لا أكثر ولا أقل...صحيح إنهم بيطهقونا على ما يفهموا إننا عاوزين مصلحتهم مش العكس...بس المعرفه برده تراكمية

أنا فرد تافه جدا...ومابعملش حاجة مهمه بنفسي ماحدش تاني مايقدرش يعملها...بس أيا كانت الحاجة التافهه اللي بعملها دي فهي بتساعد ناس تانيه بتعمل حاجة مهمّه جدا بنفسها إنها تكمّل وتفضل تعملها..وأنا والناس دي مساهماتنا تراكميه...بتضم علينا ناس تانيه من وقت للتاني...ناس بتيجي تعمل زيي حاجات تافهه لناس تانيه بتعمل حاجات أهم محتاجين الحاجات التافهه دي عشان يقدروا يكموا...كلنا مش عارفين ده هياخد وقت أد إيه...بس ماظنّش إنها فارقه طول ما في ناس بعدينا بتكمّل...وناس حوالينا بتنضم...بس الأكيد إن في حاجات بتتغير بمرور الوقت...زي ما نقطه الميه لما تنزل وري نقطه تانيه على صخره بتدوّب منها حته مابتتكونش تاني...نقطه وري نقطه..سنه وري سنه...نقط الميّه التافهه دي...بتعمل حفره كبيره في الصخره الجامده...عشان كده أنا مش همشي من البلد دي غير عشان أتفسّح وأرجع تاني أكمّل حفر

6 Mar 2012

الحقائق المفجعة

طول الوقت واحنا بنراوغ انفسنا...مش عايزين ننطق الحقيقه اللي احنا عارفينها كويس....عشان الحقيقه مش هتكتمل إلا لما ننطقها...وساعتها بس هنحس بالفجيعة

طول الوقت وانا بتكلم عن مينا...بس أبدا لم استخدم مفردة لغوية تفيد معنى الموت...قبل مينا...بعد مينا...يوم مينا...حاولت مره إقول قبل استشهاد مينا...اتلجلجت كتير اتلعثمت في نطق كلمه "استشهد"...مكنتش فعلا عارفه انطقها! ولا حد فينا كان قادر يسعها من التاني...كل ماتيجي سيرته عينينا تزوغ من بعض واحنا بنتكلم...مع اننا بنكون بنحكي ذكريات مبهجة...يمكن عشان كده تحديدا مابنقدرش نستحمل اننا نقول ان نسمع: قبل مينا ما يتقتل....بعد مينا ماتقتل...يوم لما مينا اتقتل

مراوغتنا وتجنبنا لاستخدام المفردات عمره ما بينفي حقيقه ان مينا مات...مات مقتول...مينا مات بقتول برصاص الجيش بتاعنا اللي جزء من ضرايبنا بيتصرف على تسليحة...الرصاصه اللي فرتكت رئة مينا وكبده انا مشاركة في فلوسها...الحقيقه دي كانت كفيله اني افقد ادني رغبه في الشغل لفتره...عشان مش عايزه ادفع ضرايب...ومش عايزه حد تاني يتقتل برصاص فلوسه من جيبي...بس الحل مش اني ابطل اشتغل...الحل اني مامسكش السلاح لناس ماتعرفش قيمة أرواح الناس...والأهم من ده ان اللي قتل لازم يتحاسب

مينا اتقتل يوم أحداث ماسبيرو...مات برصاصه فرتكت اعضاؤه الداخلية...الطريقه اللي مات بيها مكانتش ابشع ميته في اليوم ده...على الأقل مينا كانت جثته سليمه ظاهريا مكانش فيها عضو ناقص او مفصول زي كتير غيره من اللي دهستهم المدرعات يومها...الي حصل كان مأسوي ومفجع بكل المقاييس..بس إحنا للأسف مكانش عندنا وقت نحزن بشكل كافي...ماعرفناش نزعل ف يمحمد محمود...وبقينا زي الميتين مش حاسين بأي حاجة...في حاجة ماتت فينا في ماسبيرو وحاجة تانيه ماتت في محمد محمود...يمكن الأفضل اننا نحاول دلوقت نحزن الحزن اللي ماحزناهوش عشان مانطقش من جنابنا....وأول خطوه نعملها إننا لازم نقر بالحقيقة...

مينا صديقي مات مقتول برصاص الجيش اللي جزء من ضرايبي بيروح لتسليحة!

6 Feb 2012

يانجيب حقهم...ونحقق حلمهم...يانموت زيهم...واللي بعدنا هيكمل

عندما تتوقفون عن التفكير بأنفسكم كعبيد سيستحيل على أي شخص أن يستعبدكم
- المهاتما غاندي
جيل الثورة....ذلك الجيل اللذي محى كل الخطوط الحمراء فصارت الدنيا براحا لم يكفيه....أول ما محى هذا الجيل هو تعريف الجيل ذاته...فالجيل مدته عشر سنوات...أما جيل الثورة فقوامه اطفال من سن العاشره ويمتد ليشمل رجالا ونساءا تخطوا الثلاثين ببضعة أعوام...وثان ما محى هذا الجيل هو الخطوط الفاصلة بين الطبقات الاجتماعية..ففتيات ونساء الطبقة العليا يحتضنّ أطفال الشوارع ويتلقين منهم دروسا في الصبر والصمود أمام  قسوة العالم...وفتية ورجال الطبقة العليا يقفوا جنبا إلى جنب مع أبناد الطبقات الأفقرليقدموا لهم المعونة التكنولوجية وبعض فلسفات الثورات ويتلقوا منهم دروس في التصرف بما تقع عليه الأعين لمواجهة أي سلاح...وثالث خط محوناه هو الخط الفاصل بين الذكر والأنثى في ثقافتنا العتيقة...فلم يعد ذكور الصف الأول يخشين على إناث الصف الأول وقد صرنا نتبادل الخبرات...لما ييجي عليك الغاز اكتم نفسك واجري واطلع بره كح وبربر في الهوا النضيف...الضرب جوا شديد يا أبله خدي بالك لو ضربوا خرطوش تديله ضهرك وتميلي لقدام عشان مايجيش في وشك...ورابع خط محوناه هو الخوف من الآخرين...لم نعد نخش من الحديث إلى الغرباء

وقبل كل ذلك تمرد هذا الجيل على السلطة الأبوية...فمنذ نعومة الأظافر عشقنا كلمتين: ليه؟..لأ...فاحتار فينا الآباء فنحن لم نرتضي التفسيرات الساذجة والتبريرات الواهية فصرنا نبحث عن إجابة ترضينا لكل: ليه؟ فاعتدنا على قول: لأ..فرفضنا كل مالم نفهم وبحثنا حتى فهمنا قليلا فصرنا نشفق على الآباء بدلا من أن نخشاهم كالأجيال السابقة

جيل الثوره لا يضم كل من هو بين العاشره وبضع وثلاثون...ولكن جيل الثوره اللذي اقصده هو تلك الكتلة اللتي تمثل النواه المحركة للثورة...هؤلاء تجدهم في المسيرات الصغيره اللتي تجول الشوارع تهتف ضد السلطه الأبوية للدولة...وتراهم في عروض كاذبون اللتي تفضح كذب السلطة المسلحة الحاكمة...وتراهم في الاعتصامات ضد قع السلطة المسلحة الحاكمة يخدمون الجميع

هذا الجيل تجمعه الغربة في وطن محتل  وغضب على طغاة يجلسون على كراسي الحكم وهم على مشارف القبور لا يمكنهم استيعاب هتافنا: يا نجيب حقهم يانموت زيهم...فيظلوا يفعلون ما يستطيعون ليجعلونا: نموت زيهم...بينما نحن نفعل المستحيل لكي: نجيب حقهم...ونحقق حلمهم...فهدفنا الرئيسي هو تحقيق حلم من قتلوا إلى جوارنا وأمام أعيننا...ومن أصيبوا بين ظهرانينا...نحن ندرك تماما مدى عجزهم أمام فهم تلك الحقيقة...ندرك تماما أنهم عاجزين عن فهم عشقنا للحياة لهذا فإن تضحيتنا بأرواحنا في سبيل استعادة حق من قتل أو أصيب منّا ليست رغبة في الموت ولكنها رغبة في الحياة...وتلك الرغبة في الحياة هي كل ما نملك لذلك فهي أقصى ما يمكن أن ندفعه كثمن لاسترداد حقوق إخوتنا في الغربة اللي ماصدقنا لقيناهم!

هؤلاء الواقفون على حافة القبور يظنون أنهم يدفنونا مكانهم في قبورهم لينجوا هم من الموت...ولأنهم يضحوا بنا من أجل ذواتهم فهم غير قادرين على فهم استبسالنا في محاولة تحقيق حلم آخرين قتلوا وأصيبوا ولا نعرفهم ولكنا ننعرف ما يريدون...لأن هؤلاء العجائز غير قادرين على إدراك أي شيء يقع خارج نطاق رغباتهم الخاصة ومصالحهم المشتركة


لذلك...في النهاية...سننتصر

28 Jan 2012

٢٨ يناير ٢٠١١ -الجزء الثاني

المهم..بعد ما لقيتكرسي اام عليه ف يهشام مبارك...لقيت مصري وشاهر بيصحوني...في اه يا جدعان؟ قالولي هننزل نروح نشوف البنات اللي سيبناهم في البيت الصبح مابيردوش على التليفون...قلتلهم يمكن التليفون فيه مشكله ولا ناموا ولا نزلوا ماتقلقوش..هممابيردوش عالتليفون من الصبح ما روحنا امبابه حاولنا نكلمكوا هناك ماحدش رد وانتوا كنتوا موجودين...التليفون فيه مشكله...ودول مافيش مصمممين ينزلوا وياخدوني معاهم عشان اطلع اشوف البنات عشان الوقت متزخر...كانت الساهع وقتها حوالي اتنين بالليل...مكنتش مطمئنه للنزله دي وقلبي مش مرتاح...نزتل معاهم على مضمم...الدنيا كانت بتندع علي خفيف كده..فين وفين علي مالقينا تاكسي...قالنا هنزلكوا في احمد عرابي وانتوا تتصرفوا من هناك...قلناله ماشي...ركبنا...نزلنا أحمد عرابي وشاهر واقف بيحاسب لقيته دوشه وضرب نار وناس كتير جايه بتجري من اخر الشارع...قلت للعيال نطوا في التاكسي برسعه...انا نطيت...ومصري نط ورايا والتاكسي ابتدي يتحرك وشاهر مالحقش يركب...انا ومصري قعدنا نصرخ شاهر شاهر استني عايزينه...التاكسي هدي شويه مصري نط وانا مالحقتش انط وسواق التاكسي طلع يجري عشان الناس قربت اوي والراجل قالي انا آسف ده اكل عيشي لو جراله حاجة هشحت هنزلك قدام شويه...قلتله طيب

السواق نزلني في اول شارع جانبي يمين...ولقيت ضرب النار جاي لحد عندنا قدام....كانت مدرعه جيش ماشيه بتضرب نار ف يالهوا وبتجري الناس وقولهم حظر تجول الساعه اتنين وكله يروح...لعنت أبوهم علي قطع الخلف! حاولت اطلع للشارع الرئيسي عشان ادور عالعيال اللي كانوا معايا لقيت الناس لسه بتجري في وشي...فقولت هلف من وري...لقيت الشوارع ضلمه اوي وفاضيه خالص...وفي واحد شكله غريب قعد يبصلي كده فانا خوفت وقلت الشارع الئيسي أضمن وسط الناس أحسن...جيت داخله ابص عالعيال لقيت في خناقه وبوليكه...وناس بشوم وسنج ومطاوي واقفين عالرصيف التاني وحاجات غريبه كده كان في خناقه....ماعرفتش اوصل للعيال...لقيت واحد راجل كبير في السن عنده بتاع خمسين سنه كده بس عفي ومربي شنبه شكله غريب كده وعامل زي اللطزانه ومعاه شومه جاي عليا وبيقولي انتي رايحة فين خشي جوا اجري في ضرب بره امشي...فجريت وقعدت ابص ورايا اول مالقيته مشي للشارع الرئيسي تاني رجعت...شويه ولقيتناس داخلين عليا كلهم معاهم شوم وسنح ومطاوي وانا واقفه عامله زي الخلّه ام من غير زتونه حتى! ماعييش ورقه في ايدي حتى! والتليفونات مش شغاله ومش عارفه اعمل ايه! انتوا مين! قالولي انتي اللي مين وايه جايبك هنا! الحمد لله مكانش معايا شنطه والفاني باك بتاعتي كان مغطي عليها الجاكت والكوفيه...فعملتلهم فيلم اني كنت في الشغل...ومكانش في انترنت ومكنتش اعرف حاجة طلعت لقيت زحمه والنسا بتضرب بعض وانا اتكعبلت ووقعت وشنطتي ضاعت مني في الزحمة مش معايا فلوس ولا عارفه اروح...وروحت لصحبتي واخواتها نزلوا يوصلوني حصل القلق وتوهت منهم وعايزه اروح...فصعبت عليهم وقالولي ماتخافيش احنا صحاب المحلات هنا مش هنضرك احنا نازلين نحمي محلاتنا عشان في ناس بتهجم عليها في القلق ده...وقفولي تاكسي مشي بيا بالزبط ناصيتين وراح منزلني في شارع جانبي وقالي مش هقدر اوصلك اكتر من كده شوفي تاكسي تاني

نزلت يا مومن في الشارع ده لقيت واحد مبرشم في وشي ومعاه شومه وواقف يتطوح والكلام ملغفن في بقه...وانتي مين وايه جايبك...روحت ضاربه عليه نفس الفيلم الأمريكاني تاني راح موقفلي تاكسي عشان اروح...سواق التاكسي سألني نفس الأسئلة ضربت عليه نفس الفيلم...كنت شايله خمسه جنيه في كل فرده شراب...وسواق التاكسي كان عارف اني مش معايا فلوس بس ركبني...لو مكانش طلع ثورجي مكنتش اديتله فلوس الصراحة...المهم الراجل طلع بيا علي وسط البلد يرجعني تاني هشام مبارك وطبعا هو فاهم انه موديني عند صحبتي...شاف العيال من فوق كوبري اكتوبر وهم واقفين بيكنسوا الكوبري قعد يدعييلهم شوتي يا أبل الرجاله...شباب زي الورد ربنا يحميهم هزموا الداخليه وادوهم بالجزمه .... الراجل طلع ثورجي فشخ فانبسطت بيه جدا...شويه ولقي ٣ ولاد لعي الكوبري بيوقفوه قالي عندك مانع يا ابله نركب الشباب دول...قالي دول من الثوار وتلاقيهم علي رجلهم من الصبح وعازين يروحوا...قلتله طبعا ركبهم...نزلت انا ركبت قدام وهم ركبوا ورى وانا عامله فيها من بنها والراجل عمال يسزلهم ع التفاصيل وهم مبسوطين بقي وعمالين يتفشخروا باللي حصل والسواق يقوله عاش يا رجاله  :D
انبسطت من الراجل الصراحة وظرفته الفلوس اللي في الشراب كلها بس هو مارضيش ياخد غير خمسه جنيه بس قالي خلي الخمسه التانيه معاكي يمكن تحتاجيها لحد ماتروحي بيتك بالسلامة...استجدعته فشخ

رجعت هشام مبارك...الناس هناك اول ماشافوني اتسرعوا! انتي راجعه تاني! ولوحدك! حصل ايه! طبعا انا وشي كان اصفر زي الكركم من الخضه بعد اللي شوفته قعدت حكيتلهم ماتوا من الضحك وفضولي كرسي عشان انام...ونمت عشان اروح تاني يم بدري الشغل

٢٨ يناير ٢٠١١ -الجزء الأول

صحيت الصبح بدري من نومة الوداع باعتبارها النومة الأخيرة...اتجمع الأحباب وقعدنا نشوف هنطلع من انهي مظاهرة...كله تمم علي حاجته...معاه البطاقه..وازازه ميه متدوب فيها دوا حموضه...وازازه خل..واللي محتاج ادويه خاصه كانت معاه...بس انا مكانش معايا دوا الحساسية...اتفقنا هنطلع كلنا من مظاهرة غير معلن عنها في امبابه لزنها هتكون محتاجة الدعم..وكتبنا رقم التليفون الأرضي لبيت صديقتنا علي دراعاتنا عشان لو جرالنا حاجة يكلموها...نزلنا من العماره اتنين اتنين..أول اتنين نزلوا كان انا وواحده صحبتي ذات خبره شويه في المظاهرات...مزلنا لقينا بوكس بوليس في وشنا....كملنا طريقنا...وقررنا مش هنحذر العيال اللي فوق غير بعد مانوصل امبابه عشان لو البوكس دا جايلنا احنا اول اتنين هنتمسك...ولما اتنين يفلتوا احسن مانتمسك كلنا...الواحد بيفرق

وصلنا امبابه انا وصحبتي...عملنا نفسنا بندور في السوق على مفرش سرير لجواز عروسه...ونخش نقلب في مفارش السرير وده بكام لو سمحت...ووريني اللي هناك ده...وطبعا صحبتي ماعجبهاش ولا مفرش سرير...وبعد ساعه من اللف في السوق والناس عماله تبصلنا باستغراب ابتدينا نتخانق انا وهي خناقه حوالين ان ملعون ابو جوازتك دي يا شيخة مطلعه عيني بقالك ساعه علي مفرش سرير! مكانش مفرش سرير ده يختي!...وقفنا اشترينا كتابين من واحد بيبع كتب من علي الرصيف..وهي اشترت حرنكش...كانت نفسها هفاها علي حرنكش :D

شويه وشوفنا حد من المنظمين للمظاهرة...مشينا وراه لحد المسجد...فضلنا واقفين مستنينهم يخلصوا صلاه الجمعه...خلصت الصلاه وبدأ الهتاف...كنا حوالي خمسين واحد بالكتير...قعدنا نلف نهتف لما حسنا اتنبح...والناس واقفه علي الارصفه تتفرج علينا...لم نتعرض لمضايقات اطلاقا في امبابه...نهتف ونلف ونلف ونهتف...وانا وأبو الفضل عمالين نصرخ في الناس اللي واقفين عل يالرصيف: تعالوا...خايفين من إيه!...وازداد الحماس وتأجج الهتاف...كان معانا ولد هتيف برنس السنين...كان بيهتف هتافات عظيمه...وقفناش شويه في النص...مستنيين مظاهره امبابه المعلن عنها تنضم لينا...لقيناهم اتاخروا...وجالنا واحد من هناك بيقولنا المظاهرة متحاصره والأمن المركزي بيفشخها والعيال واقفين هناك بيدوحروا مع الأمن المركزي بيضربوا وينضربوا عشان مايوصلولناش...وكانت الرساله اخلعوا انتوا بالمظاهرة  واحنا معطلين الأمن المركزي هناك...انا كنت ماشي في ديل المظاهره ولحماس بالهتاف واخدني ومش مركزه في الأعداد...لد ما وصلنا لكوبري ناهيه...جايه بطلع الكوبري...لقيت اول صف بينزل من على أول الكوبري الناية التانيه...ببص ورايا لقيت المظاهره لس ممتده لحد ناصيه ورايا...بقيت واقف علي الكوبري بعيط...الناس نزلت يا فضل! الناس نزلت يا فضل! وأعيط وانا مبتسمه زي المجانين مش مصدقه حجم المظاهرة!

فضلنا ماشين لحد المهندسين...جينا نطلع كوبري اكتوبر من هناك...ضربوا علينا اول قنبلتين غاز...ماحسيتش بمشاكل الصراحة كان شه الغاز اللي بيترمي علينا ايام الكليه كنت بعدي من فوقه زي البخور ولا بيفرق معايا...دخلنا يمين من جوا المهندسين وفضل ناس كتير واقعين مننا عند الكوبري...والهتيف اللي معانا مابقاش معانا معرفش راح فين...عقبال ماوصلنا لنص المهندسين من جوا...لقيت مظاهره حجمها كبير جايه من عند مطلع الكوبري اللي افترقنا عنده...علي راسهم الولد الهتّيف اللي كان مزبطنا من أول اليوم...فرحت بيه أوي الولد ده وقعدت ادعيله...وكل ده وانا كنت فاكره انو يا كبدي احنا مظاهره صغيره...لحد ما وصلنا لعند كوبري قصر النيل...وببص ورايا مش شايفه آخر المظاهره......الناس وصلت لحد الشارع اللي فيه المصل واللقاح ومعرفش واقفين فين آخرهم...في السكه انضملنا حوالي مظاهرتين او تلاته...كل مظاهر بتنضم بتتقابل بالتصفير والهتاف...لحد ماوصلنا أول كوبري الجلاء عند قسم الدقي...ريحة الغاز في الارض كانت بشعه...العيال كانوا مشيليني علي ضهري شنطه صغيره فيها غاز وخل وميه وعصير وقطن اضافي غير اللي معاهم...شويه وانضمتلنا مظاهره جايه من ناحية الجيزة كده...قعدنا نزق وننضرب من الزمن المركزي لحد ماعدينا كوبري الجلاء ووصلنا لكوبري قصر النيل اللذي بدا منيعا يصعب اختراقه...انضرب علينا غاز ابشع من الأولاني...انا عندي حساسية من الفلفل لو حرّاق...بعد اول قنبله غاز لساني التهب في ظرف ٣ دقايق حسيت بالالتهاب داخل على الحلق وابتديت اتنفس بضعوبه...واحنا ماشيين قابلنا واحد ماشي لوحده...انا معرفوش...قلناله يمشي معانا مايمشي لوحده عشان مايجرالوش حاجة يمشي في مجموعة أفضل...لما تعبت احتجت اجري علي صيدليه والولد ده جه معايا وبقيه صحابي كملوا

روحت الصيدليه اخدت دوا الحساسية...والصيدلاني قالي اشربي لبن عشان يهدي الالتهاب اسرع مع الدوا...وانا مابطيقش اللبن...بس شربت علبه لبن صغيره بالكامل لأول مرة في حياتي...كلمت ابويا اخدت منه رقم عمي اللي ساكن في الدقي عشان لو احتجت ابات عنده...ابويا ماسألنيش ايه اللي نزلني...وماسألنيش اذا كنت في المظاهره ولا لأ...وكذلك عمي...ومجابوش سيره لحد...في تضامن خفي مش عارفه ولا هم ماجاش في بالهم اني نازله المظاهره بمزاجي وفهموا اني اتحشرت بالصدفه...المهم رتبت مع عمي اني ممكن ابات عنده بالليل لو ماعرفتش اروح...الولد اللي كان معايا اسمه أمير زكي...شويه وانضملنا اتنين يعرف واحد فيهم اسمه معاذ...وفضلت لحد آخر اليوم انا وأمير ومعاذ وواحد صاحب معاذ...كانت زل مره في حياتي اقابلهم...صليت المغرب قاعده علي الرصيف...بساعد الناس التعبانه من الغاز بالحاجة اللي معايا....القطره والخل والبيبسي...مكناش عارفني نوصل لقدام ول اعارفين ايه بيحصل قدام...بعدين قصر النيل اتفتح...طلعت اجري ف الشاع اصرخ في الناس علي الميداااااااااان قصر النيل اتفتح...كله علي الميدااااااااااااااان

ابتدينا نتقدم لقدام وريحة الغاز مبهدلانا...وعيني كانت هتتفرتك لأني عندي مشاكل في القنوات الدمعيه الدموع مش بتنزل بسهوله فاستعضت عن دموعي بالقطره لحد اما اتعودت عليها...وقنابل الغاز بتطير يمين وشمال والشغل كله نواحي المجمع طالع من هناك كافه انواع الرصاص اللي اعرفها واللي ماعرفهاش...فضلنا نكر ونفر...ونطلع لقدام ونرجع لورى والناس عامله نباتشيات بشكل تلقائي...كل حبه بيروحوا يريحوا لما يلاقوا مجموعه كبيره راجعه ترتاح تسيب اللي فإيدها وتقوم تسد مكانها...بدون اتفاق...وكلهم مايعرفوش بعض...بعد ما شوفت المنظر كان عندي قناعة تامه ان صحابي اللي كاناومعايا الصبح ماتوا...لحد اما اقبلت اول حد فيهم...شاهر عياد...اتطمنت عليه انه عايش وانه شاف اتنين من زمايلنا اللي كانوا معانا الصبح...بعدها بشوي قابلت المصري...وطمني علي بقية الشباب...كله بخير وكله كويس...البنات روحت والولاد راحوا يوصلوهم...كله بخير وكله عايش والحمد لله

فضلت واقفه في المنطقه اللي على اول كوبري قصر النيل من ناحية التحرير حوالي ٣ ساعات...مش عارفه اتحرك لقدام اكتر من كده عشان كل ماجي داخله الاي ناس جايه متبهدله منا لغاز مش شايفه وماشيه تحسس...معاذ وصاحبه يمسكوهم...احطلهم قطره...واحطلهم خل في الكوفيه...اول ما يلاقوا نفسهم شايفين...بيرجعوا تاني! من غير ما ياخدوا حتي نفسهم!...شوفت كافه اطياف البشر...مسلمين ومسيحيين...اغنيا وفقرا...شيوعيين وليبراليين وغير مسيسين اصلا...كل حاجة...ناس اعرفهم وناس معرفهمش...شوفت ناس كتير اوي كنت بحطلهم قطرا وخل...وكلهم بيتدوروا ويرجعوا علي مكان الضرب ماحدش فهيم كان بيروح ولا بيمشي...وأول ما يتضرب علينا غاز والاقي ناس بتجري من علي كوبري قصر النيل الاقي مافيش حاجة تستدعي الفرار اقف انده عليهم: ارجاااااااااااااع....ارجاااااااااااااااااااع...يقفوا...يبصوا وراهم...يلاقوا بنت واقفه بتقولهم ارجع...يقوموا راجعين تاني جري...وكان واقف ورايا حوالي ٥ بنات اخوانيات كل ماقول ارجع الاقيهم واقفين بيغنوا علي صقفه واحدة: اللي عايز التحرير ما يسيبش ميدان التحرير...وانا اصرخ ارجع ارجع...والناس ترجع..وتروح عند المجمع...وماشوفهمش تاني...الحه اللي عند شارع القصري العيني ووري المجمع كانت ساحة وغي...ماعرفتش اشوفها...مكنتش عارف اوصل خناك عشان كان في ناس كتير اوي محتاجة خل وبيبسي وقطره...
 
شوي وقالونا في حظر تجول والجيش نازل والقلش ده كله...كنا بنسمع وقتها ان في خلافات مابين الجيش والحكومه عن كيفيه إدارة الموقف...ان بيتقال في التليفزيون الكلام ده...وكان في كلام يادر كده ان الجيش رافض يضرب نار ورافض يتحرك غير لما سامي عنان يرجع من امريكا...قلنا برده مش هنمشي بلا حظر تجول بلا بطيخ...اول دفعه ععربيات جيش نزلت كانت مدرعه وعربيتين جيب...هللنا وقعنا نهتف الله اكبر والجيش نزل بعد ساعات من المناديه واحد اتنين الجيش المصري فين...اكتشفنا ان العربيات اللي نزلت من الجيش كانت بتدخل ذخيرة للأمن المركزي عشان يضربونا! اتجننا! العيال حرقوا عربيه جيب...ومدرعه جيش...ومنعوا عربيات الاسعاف عشان هي كمان كانت بتدخل ذخيره وقنابل غاز للأمن المركزي...
 
 
لما التعب هدني...وانا علي رجلي من ١٠ الصبح...والساه وقتها كانت عدت عشره بالليل...معاذ كان عايز يصلي العشا...وقف يصلي وانا وامير قعدنا علي الرض...انا فردت طولي ونمت...والغاز معب يالدنيا....والناس بتجري من فوقيا عادي جدا :D

شويه والعيال صحوني عشان يشوفولي حته انام فيها...ونا كنت عايزه ادخل الحمام...قلت هدخل الحمام في هشام مبارك وارجع تاني علي الميدان...حولنا ندور في السكه علي مكان فيه حمام...مالقيناش...فاطرينا نوصل لهشام مبارك...في السكه...كان في مبنى كده مش عارفه هيئة إيه...العال قالولي حاولي تدخلي الحمام هناك...حاولوا يمسكونا...مكناش عارفين هم عايزي يسلمونا ول اعايزين يعملوا فينا ايه...بس جرينا....وطلعوا ورانا بس كانوا بكروش ماعرفوش يجروا ورانا الحمد لله...كنا ماشيين في طلعت حرب...قمة الشعور بالطمأنينه والشوارع خالية من الداخلية...كنت ماشية أغني: الشارع لنا...إحنا لوحدنا...والناس التانيين..دول مش مننا

كانت خلاص الأمور هديت والداخلية اختفت..وانا في السكه لهشام مبارك قابلت خالد عبدالحميد واحمد غربيه...كنت بتنطط من السعادة انهم لسه عايشين....كانوا هم كمان مبسوطين...كلنا كنا مبسوطين بالرغم من اللي شوفناه...وصلت هشام مبارك...دخلت الحمام...ورجلي كانت متفرتكه..العيال قالولي هننزل نجيب اكل وراجعين...وقبل ما ينزلوا قالولي خلكي هنا نامي واحنا هننزل ونجيلك الصبح...انا كنت مت خلاص ومش قادره اتحرك والضرب كان وقف فقولتلهم ماشي...الصبح نتقابل

٢٦ و ٢٧ يناير ٢٠١١

كنت بايته في هشام مبارك علي كرسي متغطيه بالشال بتاعي...يومها جه أحمد غربية متعور في كف إيده ومارضيش حد يساعده..هو هيساعد نفسه ويحط التلج لنفسه...يومها لما شافني اذبهل جدا...مكانش متوقع يشوفني نازله مظاهره وقاعده في هشام مبارك :)

نمت سته وصحيت تمانيه ونص...كنت مقرره اروح شغلي بدري عشان انزل اشوف الناس وهي رايحة اشغالها...الناس كانت ماشيه في شوارع وسط البلد مبتسمه...لأول مره في حياتي كنت بشوف الناس ماشيه في اشوارع مبتسمه...عرفت ساعتها اننا هنكمل...مافيش رجوع خلاص...كان الناس بيعدوا من جنب عربيات الأمن المركزي يقوموا شادين صدورهم وفاردين ضهورهم ويبتسموا في رد فعل طبيعي وتلقائي جدا

الناس كانت مبسوطه

روحت شغلي وخلصت علي قدر استطاعتي بسرعه عشان ارجع تاني هشام مبارك...مكانوش بيرضوا يخلوني انزل الميدان...كانوا بيقولولي مش هتعرفي تدخلي من الكردون اللي عاملاه الداخليه حوالين الناس...بعد ماطلعنا من الميدان اكتشفت انالكلام ده قلش جدا وكان ممكن اروح عادي..بس اهو اللي حصل مكانش عندي فكره..المهم طول اليوم الصبح فضت شغاله نقل أخبار وتصحيح أخبار لحد اما خلصت شغلي ورجعت تاني هشام مبارك...نفس اللي حصل اليوم اللي قبله...بس يوم ٢٦ كان اول اصابات عنيفه تيجي...ناس مبطوحة وناس رجلها مشروخة او مكسوره...الاصابات ابتدت تزداد عنف...وكان في ناس محتاجة غرز ومعونه طبيه متخصصه...معادش ينفع نعالجهم احنا لأن الموضوع معادش حته تلج وتطهير جرح سطحي

الناس يومها صمدت في الشارع عدد ساعات أطول...كان أول ظهور للألتراس...بعد الداخليه ماضربت الناس وطلعت تطاردهم في اشوارع المحيطه بالتحرير لحد رمسيس وشبرا....حصلت ملاحم في شبرا والمناطق المحيطه بالميدان...النس كانت بتشوف العيال بتي كاناو ساعات بيتضامنا ونيزلوا معاهم وساعات يهربوهم ويخبوهم في بيوتهم في صمت...والداخليه دخلت قفلت شوارع بحالها وقبضت علي ناس كتير اليوم ده برده...بس عدد الناس اللي نزلوا كانا اكتر من اليوم اللي قبليه...وفضلت المطاردات ف يالشوارع لسته الصبح...بعد ما الداخليه طلعت تجري ورى البشر...فجأ لقينا الالتراس في الميدان لوحدهم هههههههههههه اول ماعرفوا ان الداخليه ضربت الخلق تاني راحم نازلين...قعدوا يهتفوا في الميدان وماحدش جاه جنبهم عشان الداخليه كانت بتجري ورى الخلق في مناطق تانيه...جالنا يومها ناس مسروعه لأن ابتدي يكون في ضرب نار حي...مجاش حد متصاب...بس الناس طلعت تري يومها من السيده زينب من ضرب نار حي

يوم سبعه وعشرين برده كان نفس الكلام...بس ماعرفتش يومها اروح هشام مبارك...كان في قلق وقالولي ماتجيش بيحاولوا يقبضوا على يا حد طالع ماتجيش..فمروحتش...طلعت علي واحده صحبتي عشان ننزل سوى يوم ٢٨ الصبح ننزل المظاهرات مع بعض واحنا عارفين بعد اللي حصل يوم ٢٧ كان غباوه...وعارفين ان يوم ٢٨ في الاغلب هنموت...كان معانا واحده صحبتنا برده بايته عندها عشان ننزل سوي مع بعض احنا التلاته...بعد مده مش بنام غير ساعتين في اليوم ان اكنت محتاجة انام...هم قاللي احنا ش هنعرف ننام...قلتلهم انا لازم انام...مش طالبه معايا اموت عشان مفرهده من قله النوم أحب انام وأموت وانا فايقه كده عيني في عين اللي بيضرب عليا الرصاصة

نمت ٨ ساعات زي الطوبة...نوم عميق فشخ...وكنت عاملة حسابي ان احتمال دي تكون آخر مره انام فيها وأصحى من النوم

٢٥ يناير ٢٠١١

من يوم ٢٠ يناير تقريبا كان عندي تخوف شديد من يوم ٢٥ يناير لأنه مكانش مفهوم بالنسبالي ايه اللي هيحصل فيه...فقررت اني هحتفل بعيد ميلادي ٣ أيام على التوالي لزني مكنتش عارفه ايه اللي هيحصل...أهو تبقى آخر ذكرياتي حاجة مبهجة...وقد كان واحتفلت بيه ٢١ و ٢٢ و٢٣ يناير...يوم ٢٤ كنت بغلي خلاص من تجاهل الحكومه وصمتها الرهيب أمام الحالات المتكررة للانتحار حرقا

عمري مانزلت مظاهرات...وكنت بتريق علي مظاهرات الإخوان بتاعه فلسطين وانا في الجامعه...مكنتش بفهم يعني ايه بيقولوا يا فلسطين يا فلسطين ونص سكان مصر مش لاقيين اللضا...عشان تحرروا فلسطين لازم تحرروا مصر الأول مش تهتفوا داخل اسوار الجامعه يا فلسطين...وأيام حرب العراق كان نفسي اروح هناك اتطوع...لحد اما الهلال الأحمر فتحوا باب التطوع...كنت عايزه اتطوع كحائط بشري حتى مش فارقه...اموت هناك احسن ماعيش هنا في القرف ده...مع اني كنت ضد السفر بره مصر تماما...حتى بعد ماتخرجت لما دكتور عندي في الجامعه حاول يقنعني اني اسافر بره اكمل تعليمي...قلتله لو ماعرفتش اتعلم هنا زي بره يبقي مالوش عازه العلام ده..هطلع بره اعمل ايه؟ قرشين لنفسي؟ طيب وبقية الناس اللي مش قادره تسافر؟

عمري ماكنت مناضلة سياسي...وبطلت اقرا جرايد من سن عشر سنين تقريبا...وبطلت اتفرج علي أخبار عشان كنت بتعب نفسيا من كتر الملل...وتكرار النصب العلني...بطلت اتفرج علي تليفيزيون خالص من الإعدادية تريبا وبقيت اسمع البرنامج الثقافي والبرنامج الموسيقي في الراديو...بس كنت واعيه تماما لكل القرف اللي حوالينا...ولما كملت ١٦ سنه كنت عايزه اطلع بطاقه عشان اقدر اطلع بطاقه انتخابيه واختار عضو في مجلس الشعب بدل سيد مشعل اللي بيكسب كل سنه بالغصب...أبويا صدمني يومها في مشاعري...وشرحلي عملية التزوير...كان أول مره أحس اني عديمه القيمه في البلد دي....عشان مش من حقي اختار البقف اللي بيتكلم بلساني في مجلس الشعب...وكان تاني قفا اخدته لما اكتشفت ان حسني مبارك هيمسك بعده جمال مبارك...ولما سألت ابويا طب واحنا هنسكت؟ قالي هنعمل ايه؟ قلتله ماعرفش...وسكت...وطال السكات...

بعد ماتخرجت من الجامعة واشتغلت ابتديت اتعرف علي ناس ليها نشاطات سياسيه...بس انا مكنتش مع اي حد منهم...عشا انا مش في الاتجاه السياسي بتاع اي حد منهم...ولأني كنت بخاف على أبويا...أبويا معتقل سياسي قديم من أيام عبد الناصر هو وعمي اللي من سنه...ولحد من ٣ او ٤ سنين فاتوا كانوا بيستعدوا عمي كل سنه لأمن الدوله مره في السنه يشربوا معاه شاي ويروحوه بيته معزز مكرم...بس الشده دي في حد ذاتها سخيفه...مكانوش صحيح بيجيبوه من البيت...كانوا بيستدعوه...بس انا مكنتش بحب ده أبدا...كنت ببقي مستفزه جدا من الموقف...ومكنتش عايزه ابويا يتعرض لده...ولا هو كان عايز...عشان كده ماكنتش بحب ادخل في حاجة ممكن تخليهم يستعدوا أبويا ولو نص ساعه يشربوا معاه شاي

يوم فض اعتصام القضاه كان اول غضب عارم احس بيه...واول شعور مباشر بالمهانة...ازاي القضاه يتعلم فيهم كده! يعني ايه قاضي يتضرب! مكانش مفهوم أبدا بالنسبالي ولا مقبول علي الإطلاق...كنت وقتها كمان خايفه جدا علي صحابي اللي هناك في الاعتصام...واتقبض فعلا علي ناس منهم...كانت حاجة تقرف وظلم صارخ علي كل المستويات

يوم اضراب سته ابريل انا مكنتش مقتنعه ان في حاجة هتحصل...الجو بالرغم من كده كان مشحون جدا...وكنت قلقانه اوي علي الناس...ا مكانش فارق معايا...بس كنت خايفه عل يصحابي...كان في عدد غير طبيعي من عربيات الأمن المركزي عند جامعه القاهره شوفته وانا رايحة الشغل...يومها قررت امشي من الجيزه لحد شغلي في الدقي عشان اتفقد الأوضاع...عقبال ما وصلت الشغل كانوا ابتدوا يقبضوا علي الناس اللي معديه من عند الجامعه ويوقفوهم يسألوهم علي بطايقهم...على بالليل كانت الدنيا ولعت في المحلة...وكنت سعيده بيهم أوي وهم بيقطعوا صور حسني مبارك..كنت فخوره أوي يومها بجذوري المحلاوية حيث ان امي من المحلة...وكنت سعيده ان كل ده حصل في ميدان الشون..أكبر ميدان في المحلة :)
الانتخابات الأخيره قبل ٢٠١١ كنت عايشه لوحدي...وكنت مذهولة ان الناس سكتت على التزوير الفج بالمنظر ده...كان عندي احباط غير عادي...على شهر يوليه ٢٠١١ كنت قاعده بتكلم مع واحد زميل ليا من أيام الكليه هنضرشق من جنابنا...البلد وصلت للقاع في كل حاجة...الناس والأكل والرب والخدمات وكافة شيء...وماكناش عارفين ازاي كل ده هيتحل...كان آخر كلامنا اني قلتله ماينفعش الأمور تفضل كده...أكيد في حاجة هتحصل...لازم في حاجة تحصل...منطق الحياة بيقول كده...بعدها بفتره قليله عملت صورة البروفايل بتاعتي علي الفيس بوك علم مصر مكتوب عليه بح...كله يروح بيته...كنايه عن ان معادش في بلد خلاص...مافيش دولة...وقد كان :)


آخر كام يوم قبل ٢٥ يناير كان ف يفلايرات بتتوزع في دار السلام وشبرا بتدعو ليوم ٢٥...وكنت مرعوبه تماما من الفكره...انها تتحول لثورة جياع تنزل تكسر وتسرق وتنهب وتروح بيوتها وخلاص على كده كان نفسي الناس من كافه الطبقات تنزل..مش سكان المناطق الفقيره فقط...يوم ٢٤ كنت مقرره ان لو الناس نزلت من بيوتها انا هنزل معاهم أيا كانت التداعيات...وزي ما هيعملوا هعمل...حتي لو سكان المناطق الفقيره بس هم اللي نزلوا برده هنزل معاهم...دول اللي انا مستنياهم طولعمري ينزلوا الشارع يهتفوا عشان انزل معاهم...مش المسيسين...وكنت حالفه ان لو حصل زي كل مره نزل خمسين ولا ١٠٠ واحد يهتفوا علي سلم النقابه يتضربوا ويروحوا المغرب اني مش هقعد في البلد دي تاني لأن شعبها مايستحقش يعيش عيشة كريمة ولا يستحق اني افضل عايشه معاه

يوم ٢٥ كان عندي شغل...كانت البنت اللي بتراجع المجله لغويا جايه تخلص شغلها ولاز اكون قاعده معاها لحد ماتخلص...أول مظاهره نزلت لسه فاكره تعليق مالك مصطفى عليها: ايه ده! ايه المظاهره دي مين طلعها! دي مكانش مترتب ليها!...اعتها انشكحت اوي وعرفت ان خلاص...الشعب نازل يقف في وش السلطة...وقومت زي الباروده بلف في المكتب وبنط علي كتاف البنت عشان تخلص عشان انزل...الكلام ده في دخلة مديري ودار بينا الحوار التالي
بيقولي هتنزلي تروحي فين!
التحرير الناس متجهه علي هناك
هتنزلي تعملي ايه؟ 
ماعرفش...زي ما هيعملوا هعمل
انتي مجنونه! افرضي اتضربتي عصايه ولا شومه علي دماغك واتعورتي ولا اتكسرتي؟
هم يعني اللي هيتضربوا ويتعوروا دول انا احسن منهم؟ انا نازله وسط الناس واللي يجرى علهيم يجري عليا!
 بلاش جنان انتي مافكيش نفس للكلام ده
 خلاص مش هنزل معاهم هنزل اتفرج
 تتفرجي علي ايه؟
 هتفرج على الناس بتعمل ايه في التحرير
يابنتي بلاش هبل هتاخدي في الرجلين!
طب خلاص هنزل أجيب بسبوسه من عند العبد أجيبلك معايا؟

كانت النتيجة انه اتشل مني ومشي :D...شويه والبنت خلصت...وانا كنت قاعده عامله وحدة اخباره علي الفيس بوك وتويتر...كنت اعرف ناس كتير ثقات في مناطق متفرقه بيكتبوا علي تويتر اللي بيحصل وانا عماله انقل الاخبار للفيس بوك...وعماله اصحح اي معلومه غلط بلاقيها في اي حته...لحد ما لقيت ان هشام مبارك طالبين معونه غذائية للناس اللي في التحرير لزوم الإعاشه...خدت العنوان وخلصت شغلي وروحت البيت

امي كلمتني ولا تلاتين مره يومها عايزه تطمن...اقولها يا ستي مدينه نصر سيس مافهاش حاجة دول عالم صايصه ماتقلقيش انا كويسه وهخلص شغلي واروح...قالتلي طيب كلميني لما تروحي...انا كنت مقرره النزول للتحرير بأي تمن...وكان قدامي حاجة منا لاتنين...يا اقول لأمي ونقعد نتخانق في التليفون وانزل...يا اما ماقلوش لحد خالص وانزل من سكات...فلقيت انه الافضل اني انزل من سكات...روحت البيت غيرت هدومي...ولبست هدوم تدفي كفاية عشان لو الوقت اتأخر لحد بالليل..وركنت الشنطه بتاعتي ولبست كوتشي واخدت شنطه وسط فيها المستلزمات الزوليه...شاحن عشان لو بيت في الشارع...ادويه القولون والحساسية...البطاقه عشان لو مت يلاقوا عنوا يودوا عليه الجثة...وخدت كل الفلوس اللي حيلتي ونزلت علي هشام مبارك
جيبت كل الأكل اللي ربنا قدرني عليه ومكنتش قادره اشيله حتى ان كم مهول من سندوتشات الفول والطعمية..البواب شالهم وطلعهم...وانا دخلت عرفتهم بنفسي وفضل قاعده...قلتلهم عايزه اتطوع اساعد ف ياي حاجة...قالولي خلكي قاعده ولما تلاقي حاجة ممكن تعمليها اعمليها...فضلت قاعده...وكنت ابتديت ازهق...اتعرفت علي كام حد من هناك...لحد اما جه معاد فض المظاهرات...وبدأت اللوثه العقلية...اللي جاي متعور...واللي جاي صوته رايح...وكم غير طبيعي من التليفونات عن معتقلين ومفقودين...كنت بعمل اللي اقدر عليه حتى ولو كان اني اعمل للناس شاي وينسون عشان زورهم واطهر الجروح السطحية...كان الشاش والقطن خلصانين...نزلت حطيت آخر فلوس معايا جيبت بيهم قطن وشاش من الصيدلية...مديري كلمني وانا ف يالشارع ساعتها...قالي تخصلي وتروحي علي طول ماتتجننيش وتنزلي التحرير...قتله حاضر...قفلت السكه وطلعت هشام مبارك تاني اديتهم الحاجة وفضل اساعد باللي ربنا يقدرني عليه

لحد الساعه ٦ الصبح كان بيجيلنا ناس لسه كانت بتجري من الأمن المركزي..نضفت ونمت ساعتين عشان اروح الشغل

26 Jan 2012

مابين العسكر والإخوان

ايه الوضع دلوقت؟  سؤال ماظنش حد عنده ليه إجابه محددة...مقابلتش حد مهما بلغ علمه واتسعت ثقافته قادر يدي إجابة شافية للسؤال ده...لكن بشوية مذاكره بسيطة وحبة مراجعة للتاريخ نقدر نحط احتمالات ونقيمها

الإخوان دلوقت هم أكبر كتله سياسيه تقدر توصل للحكم...والعسكر لسه متشبثين بالحكم ومن الواضح جدا ان في صفقات بتتم بينهم في الخفاء...هل الإخوان بيحبوا العسكر؟ لأ طبعا ولأسباب كتير ومعروفه مافيش داعي نسهب في شرحها بس كفاية أقولكوا ان الإخوان اتلسعوا من العسكر كتير...اختاروا في البدايه المواجهة بالسلاح...وبعد ما قلم عبد الناصر اظافرهم وحلت الجماعة جناحها العسكري اتخذت مسلك آخر...مسلك آخر لإيه؟ لهدفهم الأسساسي: الانفراد بالحكم

مأزق العسكر حاليا برده واضح جدا من فتره بس مش عارف انتوا واخدين بالكم ولا لأ....هدف العسكر هو البقاء في السلطه بشكل غير مباشر بتهربهم من محاسبه القادة الحاليين وضمان وضع مميز للقوات المسلحة كسلطه  رابعه تقدر تقيل أي حاكم لاحق. وده إزاى بقى ان شاء الله؟؟؟؟؟؟؟؟؟؟؟ أقولكوا انا ازاي...فاكرين انتوا وثيقه السلمي اللي هفت علينا فجأه؟ وفاكرين ان اول مسوده ليها رفضها العسكر وطلع ممدوح شاهين في خبر ٤ من ٥ او ٦ أسطر في جرنان الشروق بيطالب بمادتين واحده منهم تعفي القوات المسلحة من ادراج تفاصيل ميزانيتها في الموازنه العامه للدوله على أن تدرج كرقم مجمل...والماده التانيه اللي بتحول القوات المسلحة ضامن للديموقراطيه في مصر وتطيح بأي حاكم مايلتزمش بيها؟..لو مش فاكرين اديكوا عرفتوا....وأفكركوا كمان ان ممدوح شاهين طالب بيهم أكتر من مره  في كذا لقاء مع القوي السياسيه أعلنت تفاصيلهم للشعب

يعني دلوقتي الوضع ان العسكر عايزين يفضلوا في الحكم من وراء ستار لحماية مصالحهم الشخصية والحفاظ علي امتيازات افراد المؤسسة...ايه مصالحهم الشخصية؟؟؟؟؟؟؟؟؟؟ الرد بسيط جدا برده وكلنا عارفينه بس مش كل الناس بتركز وبتربط الحاجات ببعضيها...لو بصينا هنلاقي ان الحمد لله المصانع الحربية بتاعتنا عندها مصانع بتعمل حلل وسخانات وبوتاجازات...وإن أكتر من نصف دخل قناة السويوس بيروح للمؤسسة العسكرية (أومال انتوا فاكرين عبد الناصر أممها ليه؟ عشان سواد عيون الشعب؟)...وإن المؤسسة العسكرية عندها مزارع خضار ومواشي ومصانع مية معدنية...ومعاها كارت بلانش تسيطر علي اي أرض فضاء مملوكة للدولة...يعني المؤسسة العسكرية مؤسسة منتجة وعندها مشاريع بتحقق أرباح...ودي مش أسرار حربية لأن إحنا اللي بنشتر المنتجات دي مش حد تاني...ده مش وضع طبيعي لمؤسسات العسكريه...المؤسسات العسكرية مهامها محددة ومعروفه ومش منها التصنيع والإنتاج ولا منها برده صناعة القرار السياسي المتعلق بالشؤون الداخلية للدول...وكل ده احنا لسه ماتكلمناش عن الامتيازات الي بيحصل عليها أفراد المؤسسة وبالأخص ذوي الرتب العليا...ولا لسه اتكلمنا عن امتيازات الأفراد المتقاعدين...طبعا زي ماحنا عارفين ان العسكري المتقاعد لو محبوب من القياده العليا بيكون مكافئته على إخلاصه ولاؤه ليهم (مش للدوله ولا الشعب ولا المؤسسة) بإنه ياخد منصب إداري مدني يعني يمسك مؤسسة أو هيئة تابعه للدولة...وبصوا شوفوا كده  المحافظين مثلا بييجوا منين؟ نصهم يا لواءات جيش يا داخلية

الطبيعي ان مجلس الشعب بيراقب على ميزانية المؤسسة العسكرية لأنها بتاخد جزء من ميزانية الدوله...وفي حال ما بيكون عندها مشاريع بتتربح منها طبيعي برده انه بيراقب علي ارباح المشاريع دي ويعرف اتصرف منها إيه لخدمة المؤسسة والباقي بيروح فين... وده باختصار شديد اللي العسكر مش عايزينه....مش عايزين حد يسألهم انتوا ليه دولة داخل الدوله....ولا عايزي حد يسألهم ازاي عندكوا مشاريع انتاجية...ولا عايزين حد يسألهم ارباح المشاريع دي بتروح في جيب مين...ولا عايزين حد يلغيلهم الامتيازات اللي بيحصلوا عليها زي تقلد مناصب في الدولة بالتعيين على رؤوس المؤسسات

السؤال دلوقت هو بالنسبه لكتله بتسعى للانفراد بالسلطة هتقبل شريك دايم بشكل دستوري بالموافقة على تمرير المادتين إياهم كمادتين في الدستور تحفظلهم الإمتيازات بتاعتهم بشكل دستوري من خلال مجلس الشعب اللي الإخوان بيمثلوا فيه ٤٥٪؟

لغاية دلوقت مافيش حد عنده غير احتمال من اتنين: تحالف اخواني عسكري بوجه ليبرالي بضمانة أمريكية...أو  رفض تمرير المادتين دول مع اعطاء ضمانه لقيادات العسكر الحاليين انهم مش هيتحاسبوا.

أنا شخصيا برجح الاحتمال التاني...لأنه مش منطقي يكون في كتله هدفها الأساسي الانفراد بالحكم تقبل شريك دائم بشكل دستوري يجعله قادر علي الإطاحة بيها من رأس السلطة في أي وقت مهما كانت الضمانات...لكن ممكن يقبلوه كشريك مؤقت تنتهي امتيازاته بانتهاء بقاء الأفراد اللي ابرموا الاتفاق على قيد الحياة

المضحك في الأمر بقي ان لا العسكر ولا الإخوان ولا أمريكا حاطين الشعب في حساباتهم...لو في حد فيهم بيفهم وعنده مخ هيكون دلوقت قاعد فاتح بقه من الأعداد الغفيرة اللي نزلت امبارح لإسقاط حكم العسكر ومطالبتهم بتسليم السلطه لمجلس الشعب ضاربا بكل مخططاتهم عرض الحائط

الشعب امبارح ضرب مفك في كل حسابات العسكر والإخوان وأمريكا....وربنا يزيدهم عمى وميكونوش مدركين لذلك :)