New Test

My results

You scored as Islam. Your beliefs are most similar to those of Islam. Do more research on Islam and possibly consider taking the shahadah and officially becoming a Muslim, if you aren’t already. Despite the actions of some - who go against the teachings of Islam - Islam is a religion of peace; the word “islam” means “peace through submission to God.” “Muslim” means “one who submits to God.” Islam is the third of the three Abrahamic faiths, and it shares much with Judaism in Christianity; its differences are the acceptance of Muhammad as the last and final prophet, and the oneness of God - in other words, that Jesus, though he was a revered prophet, was not in fact God, and only one God exists. Apparently the Taliban could not read (though their name means “students”), because the Qur’an states that men and women are equal as believers, and that all believers should be educated and seek knowledge. Modesty in dress and behavior is required in Islam for both men and women to preserve the values of society and move the emphasis from superificial appearance to intelligence, knowledge, and God. Islam 83% Judaism 71% Buddhism 67% Satanism 54% Paganism 50% Hinduism 38% Christianity 29% atheism 8% agnosticism 4% Which religion is the right one for you? (new version) created with QuizFarm.com

لخبطه

صحيت بدرى بدون اى سبب مفهوم مع انى نايمه متاخر..اكتشفت عقده جديده للاسكوبيدو.. اخترعت شوربه جديده... خناقه لرب السما عشان ولا اى حاجه فقط عشان اليوم داخل بالأمبليز من اولها... نص يوم عمل ممل وسخيف... محاوله للخناق تانى بعد يوم عمل يقرف الكلب الاعور الحزين احبطتها بنجاح.. حيلى مهدود لدرجه انى مش قادره اقوم انط من الشباك

الصديق

هو اللى اما تضيق بيه الدنيا يتصل بيك بعد غياب فقط عشان يقولك وحشتنى يا صاحبى

اللعنه

هي ان توضع في مكان تضطر فيه دوما ان تستجدع لأن الجميع يتمرقع

كان فى واحده بنت

منتصف ليل القاهره.. هكذا يعلن المذيع باذاعه البرنامج الموسيقى وهى جالسه تتصفح بعض مواقع الانترنت سعيده بضفائرها الاربع اللائى يتدلين على جانبى وجهها ومختنقه من الخامسه الجاثمه على قفاها فتلعن للمره الالف الشعر الطويل.. تدرك فجاه انه لم يعد ثمة داع لإطالة شعرها بعد الآن.. فهى انما تركته يتوحش فوق رأسهاحفاظا على وعد قد قطعته على نفسهابان تترك شعرها طويلا من اجله.. صحيح انه لم يطلب منها ذلك ابدا ولكنها فقط ارادت ان تلبى له احدى رغباته الخفيه فهى تعلم انه يحب الاناث ذوات الشعر الطويل... تقز من على كرسيها متجهه الى المرآه تنظر الى شعرها الاسود الفاحم كم هو لامع.. قضت ساعه ونصف فى الصباح قبل ذهابها للعمل فى الحمام اضاعت منهم ساعه كامله فى العنايه بشعرها ثم هرولت مسرعه الى عملها، عندما عادت.. خلعت عنها حجابها ليبدو لها شعرها الاسود الفاحم لامعا.. حلته فانفرط على كتفيها متموجا.. اضحكها ان ترى شعرها هكذا فهو يضفى عليها انوثه لم تعتدها.. قسمته الى خمسه ضفائر على كل جانب لوجهها اثنتين وواحده فى الخلف اعجبها منظرها الطفولى واخذت تغنى امام المرآه.. جيلى كولا على قد سنى.. انا حته منه وهو حته منى.. جيلى كولا على هيئه ازازه.. جيلى كولا ماهياش ازازه.. جيلى كولا.. جيلى كولا.. ضحكت وقفزت امام حاسوبها دون نيه واضحه لعمل شىء محدد سوى اضاعه بعض الوقت حتى انتصف الليل.. تحسست ضفائرها للمرة الاخيره ثم قصتهم الواحده تلو الاخرى.. بعض قصقصات هنا وهناك لكى تهندم شكل شعرها بعدما قصته.. ذهلت من براعتها فى اقص فشعرها يبدو متساو.. هرعت الى الحمام تبلل شعرها واتجهت فورا الى النافذه لتشعر بالهاء يدغدغ فروة رأسها مباشره... يااااااااااااه بقالى زمان اوى ماحسيتش الاحساس ده ييجى من سنتين كده.. اى راجل يحكم على اى ست تطول شعرها لازم يعدموه خنقا بشعره... استمعت الى برنامجها المفضل فى الراديو.. الذى لم يعد مفضلا.. ربما لم يكن مفضلا لها ابدا.. فقط تتابعه لتشعر بانها تفضل شيئا ما

استيقظت فى الصباح التالى متاخره كعادتها فى ايام العطلات.. لم تد مفرا من النهوض من السرير فلابد ان تحتسى كوبا من النسكافيه لتستطيع انا تتنفس بشكل طبيعى.. النسكافيه ده بقى عاده زباله انا لازم ابطله شويه مش شاربه النهارده واصدع بقى مش اشكال بدل ماتود عليه اكتر من كده... فتتمدد فى فراشها مره اخرى لتشاهد فيلما.. بعد ان بنتهى تحضر الهاتف من الحجره المجاوره وتضرب رقما

ايوه يابنتى.. انتى نايمه والا ايه؟؟

اه نايمه

مش هتروحى كتب الكتاب؟

لا مش هينفع عندى امتحان بكره

يادى النيله هو انتى طول السنه دراسه كده!!! ربنا معاكى

يارب ادعيلى احسن انا عكيت فى مادتين

ربنا يقويكى.. سلام

سلام

تنهض متكاسله نحو المطبخ فلا تجد شىء لتاكله.. تفتح علبه تونه وتضيف بعض البصل والطماطم والخل.. اوعى وشك احلى سلطه تونه.. هو انا كلت سلطه تونه بره قبل كده؟ .. تضحك من نفسها فهى لا تعلم مكونات سلطه التونه.. تستحم سريعا هذه المره مستمتعه بطرقات قطرات المياه على فروه راسها مباشره.. تدندن ببعض الالحانا لغير مفهومه.. ترتدى ملابسها وتخرج.. تعود مر ثانيه.. مش احط كحل والا ايه؟.. تخط خطين رفيعين من الكحل.... طيب مممممم حبه بودره بقى وانزل.. تفتح علبه البودره لتجدها تكاد تكون متلئه.. يالهوى هى علبه البوده لسه مليانه.. هو انا ليه مابستعملهاش دى بقالها سنين.. تغلقها وتلقى بها فى سله المهملات خشية ان تكون غير صالحه للستعمال تأخذ حقيبتها وتتجه مباشره الى كتب الكتاب.. يووه كم البلوزه دى واسع اوى هو انا كل ماتحرك دراعى يبان لحد كوعى كده!!!!!.. تتجه لشراء معصم من احد محلات مستلزمات المحجبات..

مفيش غير فيزون يا انسه

طيب ماتشفلى واحد قطن

يغيب داخل المحل قليلا ويعود صفر اليدين

معلش والله مش لاقى

طيب فيزون وامرى لله هات.. بكام؟

اتنين ونص

خد ياعم.. لالا هتعمل ايه ماتلفوش ولا تحطه فى شنطه ان اهاخده كده.. سلامو عليكم

لم يرد عليها التحيه.. اتجهت الى الموقف مهروله فقد اضاعت الكثير من الوقت.. تشعر بان خطوتها اضيق من المعتاد فتلعن تلك الاحذيه ذات الكعوب العاليه بالرغم من ان كعب حذائها لا يتعدى 3.5 سم ولكنها لم تعتد على مثل هذه الاشياء.. اللى اخترع الكعب ده لازم يشنقوه اكيد كان راجل وراجل سادى كمان.. وهى صغيره كانت تتمنى دوما ان تكبر لترتدى حذاء ذو كعب لتستمتع بصوت طقطقاته على السلم اثناء نزولها درجاته وحينما كبرت واصبح لديها حذاء بكعب بعد ان دوت طقطقاته على درجات السلم خلعته لتهبط بقيه الدرجات حافيه وارتدته ثانيه قبل خروجها من العماره فتلعن نفسها طوال الطريق.. مين شار عليه شوره الكعب المهبب ده، ده فضيحه..

تستقل الميكروباص وتنزل امام المسجد الذى سيقام فيه كتب الكتاب ترتقى السلم الى الصاله المخصصه للنساء فتجد المكان مكتظ بهن.. تتجول بين الوجوه علها تتعرف على اى منهم فلم يسعدها الحظ.. تنزوى على كرسى فى احد الاركان واضعه احدى ساقيها على الاخرى فى النتظار صديقتها.. ينظر اليها بقيه النسوه نظرات عدائيه لا تعلم لسها سببا.. فكرت قليلا فاستنتجت ان ذلك بسبب ارتدائها للبنطلون.. ايه الناس المجانين دول بيبصولى كده ليه هو انا داخله الجامع عريانه!!!!!!!! ده بنطلون مش بدلة رقص..

تتذكر ايام ان كانت تذهب الى المسجد لحفظ القرآن وهى صغيره.. كن يجلسن على الارض ليس على كراس كما يحدث الآن.. لا تتذكر بالتحديد لماذا انقطعت عن الذهاب لحفظ القرآن فى المسجد ربما بسبب ان المحفظات تغيرن واتت هوجه جديده فى الدين غريبه عليها لم تستطع ان تقنعها فانقطعت عن الذهاب فهى لا تحب الجلوس على الكراسى فى المسجد..تمت مراسم كتب الكتاب فى هدوء.. ينهينها النسوه اكثر من مره عن اطلاق الزغاريد فى المسجد... مالكم يا جمعه فى ايه مش عروسه دى وعايزه تفرح مالها الزغاريط!!!!! مزعلاكوا ليه..

صوت المرأه عوره الرجال يسمعوكى تحت

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! - صمت-

تنصرف عائده الى منزلها.. تبتاع بعض الحناء فى الطريق.. تقرر انها تريد ان تمشى كثيرا لتنفس عن الغضب المعتمل فى داخلها من جراء ما تعانيه من جهل فى كل مكان.. تشعر بالاختناق.. .. تمشى حتى لم تعد تشعر بقدميها فتقرر الذهاب الى المنزل.. تخلع عنها ملابسها فى صمت.. تنظر قليلا الى البنطلون... نسوان مجانين.. تضع ملعقتين من الحناء على كوب من الزبادى وقليل من زيت الزيتون.. تخلطهم جيدا وتضعهم على شعرها، تلفه بفوطه وتنام على امل ان لا تستيقظ مره اخرى

سنه حلوه يا جميييييييييييييييييييييل

دايما يقولك عيد ميلادك الواحد وعشرين فاصل مهم فى حياتك وبتحس بعديه باختلاف كتير... معرفش ليه عدى عليه زيه زى اى عيدميلاد تانى مالوش احساس مختلف.. يعنى انا زى قبله زى بعده.. وكل سنه اقول بقى هو العيد ميلاد ده اللى هيحصل فيه الاختلاف.. ولا حاجه بتحصل.. كل اعياد الميلاد زى بعضها.. معرفش دى حاله خاصه والا لا

Dissapointment

Um 24,

and i still get dissappointed when

i ask my father a question and he replies with

"I Don't Know"

In 1981 (the year az were born)

Ronald Reagan becomes president of the US

Minutes after Ronald Reagan becomes president, Iran releases 52 American hostages that had been held captive for 444 days

President Reagan is shot in the chest by would be assassin John Hinkley

Space shuttle Columbia, the world's first reusable spacecraft, is sent into space

A suspended walkway in the Kansas City Hyatt Regency Hotel collapses, killing 113

A female former lover files a "palimony" suit against tennis star Billie Jean King

President Reagan appoints Sandra Day O'Connor to be the first woman on the Supreme Court

The Pac-Man video game is introduced in the US

Alicia Keys, Elijah Wood, Kelly Rowland, Anna Kournikova, and Britney Spears are born

Los Angeles Dodgers win the World Series

Oakland Raiders win Superbowl XV

New York Islanders win the Stanley Cup

Raiders of the Lost Ark is the top grossing film

"Bette Davis Eyes" by Kim Carnes spends the most time at the top of the US charts

MTV debuts on cable television, playing music videos 24 hours a day

Nice test

Your Blogging Type is Kind and Harmonious

You're an approachable blogger who tends to have many online friends. People new to your blogging circle know they can count on you for support. You tend to mediate fighting and drama. You set a cooperative tone. You have a great eye for design - and your blog tends to be the best looking on the block!

What's Your Blogging Personality?

عجلاتيه اف اخص عليك والنبى يا حزمبل

نجوم اف ام.. هم مسميين نفسهم كده لكنهم فعلا لا يعدوا كونهم حفنه من العجلاتيه مش فاهمين اساسا يعنى ايه راديو ولا يعنى ايه مذيعين راديو... فى احد البرامج الاتسفزازيه دلوقتى شغال على المحطه العجيبه دى بت هبله وواد ممرقع .. غايه فى المرقعه مستضيفين ولامؤاخذه مطربه جميله جدا الفنانه العظيمه النيمه كونيمه اللى اسمها لطيفها.. ولولولولىىىىىىىىىىىىىىىى باركيلى يامه ... الفنانه الجميله.. لطيفه حد جميل اوى من جوه وكل الناس بتموت فيها وفى اغانيها.. يعنى ياخى **** ايه العار ده.. ان اطول عمرى بحب اسمع لطيفه.. بس انا مال اهلى انا بابن اختها اللى بيدرس سلوك الكائنات الفضائيه فى جامعه بامريكا القمح.. الفنانه لطيفه اللى بتسعد ملايين.. يعنى طيب الكلام ده بنسمعه على الفنانين وانصاف الفنانين واشباه الفنانين واللى مالهمش علاقه بالفن كلهم وعمو تانت واونكل بمنيا القمح وخالتو وجدو وستو واحمد ومحسن وعمرو ونوسه ولوزه وتختخ والمغامرين الخمسه والشياطين التلاتاشر بالمعادى.. انا ايه يسعدنى فى لطيفه والا غيرها اساسا؟.. عملت ايه انا مهبب فى عيشتى عشان اقعد اسمع ناس طالعه تتمرقع وعمالين يأنثوا المذكر ويذكروا المؤنث... كلنا دلوقتى ممكن نسمع مشعارف ايه على السايت بتاعت لطيفه" جايز السايت بتاعها خنثى فبيتكلموا عنه بصيغه المؤنث",,, ولطيفه حد مقلوظ اوى " طيب لطيفه مؤنث تبقى حد ليه؟".. ربنا لا تؤاخذنا بما فعل مذيعين نجوم اف ام منا وفينا وعلينا وفى لغتنا العربيه ولهجتنا العاميه وغطينى يامه وصوتى .. نجوم اف اخص دى حد تفقع المراره جدا ( يعنى برده نكلمهم بلغتهم او تقدروا تقولوا تقليد اعمى ).. يعنى انا حد كانت بتحب لطيفه جدا بعد ماسمعت الحلقه دى بقيت حدايه ونفسى اخطف كتاكيت اف ام.. الحلقه عباره عن دعايه لجمعيه لطيفه الخيريه وللسايت بتاع لطيفه هانم كعب الغزال.. بنت قنصل الوز سايبه بلدهم وجايه تعمل جمعيه خيريه لجعانين مصر.. ياويلك يا بلد.. وسالوها ليه بقى عملتى الحركه الجامده ده يا لطيفه.. قالتلهم اصلى غيرت من ريكى مارتن وريتشارد جير عشان بيعملوا اعمال خيريه قلت بقى احنا مش هستنى بقى اما الم الفنانين وتعالوا يا جماعه نعمل راوند والا نعمل عمل خيري بقى فقلت اعمل انا جمعيه لطيفه الخيريه.. وحصلت لطيفه على بتاع سبع القاب فى اقل من نص ساعه.. لطيفه المطربه الخيريه.. ولطيفه مطربه البطيخ الاولى وحاجات كده بقى اللى بيحفظوها للمذيعين ....

معانى

لابد و انك اردت يوما ان تسجد لصوتها..

ده تعبير قريته على بلوج... بغض النظر عن البلوج والبوست عن ايه وعن اى حاجه فى الحياه.. الجمله دى لفتت نظرى جدا.. لسبب بسيط.. لخبطتنى.. هو السجود احتياج؟ رغبه؟ والا اراده؟؟؟؟؟؟؟؟؟؟؟؟؟؟؟؟؟؟.... يعنى هل احنا بنحتاج نسجد؟ والا بنعوز نسجد والا بنختار نسجد؟

انا عن نفسى اعتقد ان السجود التلاته مع بعض لان فى حاجات نفسه جوا البنى ادم لا يشبعها سوى السجود وده اللى بيخلى السجود احتياج لانه بيلبى حاجات مباشره وبمرور الوقت بيتحول لرغبه.. حاجه بنعوزها اوى وبنشتاقلها يمكن الناس تقول مفيش فرق بين الحاجه والرغبه لكن بالنسبالى انا فى... الرغبه اقل عقلانيه ومنطقيه من الحاجه وبتعتمد اكتر على التفضيل الشخصى للافراد.. الواحد بيحتاج ياكل وبيحتاج يشرب " دى الحاجه" لكن بنعوز ملوخيه مش بسله وبنعوز حاجه حلوه وبنعوز حاجه حادقه" دى الرغبه"...... دى تعريفاتى الخاصه ليهم.... والاختيار مش محتاج شرح.. انك تختار تعمل او ماتعملش تختار انك تلبى الحاجه دى او لا.. عشان كده السجود التلاته مع بعض.. حاجه ورغبه واختيار..... بتحتاج تسجد لربنا عشان ترتاح وانت حاسس بنفسك عند اقدامه.. فى السجود بتبقى جوه نفسك اوى متكعور على نفسك زى الجنين فى بطن امه وبتبقى عينيك قريبه اوى من الارض بصوره يصعب معاها التركيز فى اى تفاصيل فيها وبتبقى قريب اوى من صوت انفاسك وداقت قلبك فبتسمع نفسك اوى فبيتضاعف احساسك بالتوحد وعلى قد صفا قلبك بقى على قد مابتحس بربنا قدامك.. عمرك مره سجدت وخفت ترفع راسك احسن تلاقى ربنا قدامك؟؟؟؟؟؟؟؟..... السجود فى حد ذاته رغبه فى التوحد مع الارض، لان وضع السجود جنينى اوى.. شبه وضع الجنين فى بطن امه وبتحس برطوبه الارض او جفافها.. بصلابتها او نداوتها.. على حسب الارض اللى انت ساجد عليها... عشان كده بترتاح.. بتحس انك رجعت لاصلك.. توحدت تانى مع الارض.. .. الحلقه الناقصه بتكتمل.. مابتحسش انك بطولك منغير سند.. لا بتحس انك اتلميت على بقيتك ورجعت تانى حته واحده..

عاهره

عاهره انا من قديم الازل.. ليس لانى احب ذلك ولكن لانى لا اعرف اية حرفه اخرى سوى البغاء.. لم يكن فهمى قادر على استيعاب المناهج التعليميه فى المدارس وليس ابى بالرجل الثرى الذى.. عفوا .. فحتى لا اتهمه بما لا اعلم .. لعله يكن ثريا فانا لا اعرف لى اب فأمى ايضا كانت بغى.. فنحن عائله تحترف تلك المهنه.. كمن يحترفون اى مهنه فى الحياه.. لم افهم يوما لماذا يزدرينى المجتمع؟.. من هو المجتمع؟؟ اهم من يسبوننى وامثالى فى النهار على صفحات الجرائد ويرتمون بين افخاذى فى آخر الليل؟ ام هم من يحاولون نهش جسدى كل يوم؟ ام هن النساء اللواتى يدعين العفاف لانهن عشيقات فى السر يمارسن البغاء بدون ثمن؟.. اى منا اشرف؟ انا ام هن؟.. انا امارس البغاء لانى لا اعرف سبيل آخر لكسب العيش غيره فلا انا حاصله على شهاده ولا امتلك اية موهبه ولا اتميز بأية شىء سوى جسدى .. فهو رأس مالى الذى اتاجر به وموهبتى التى اجيد استغلالها.. لم يكن لى يوما زوجا او حبيبا او حتى عشيقا فالكل بالنسبه لى سواء... اكل عيش يعنى... يلعننى الكثير منهم بعد ان يضاجعونى.. وكم منهم حذرونى من جهنم.. ودوما تاخذنى الحيره من تحذيراتهم.. هى يعنى الرجاله ي.... وانا اخش النار وهم يخشوا الجنه.. .. ...

ابت المومس ان اكمل الحديث عن لسانها بالفصحى وسالتنى ان انقل الكلام التالى عن لسانها بالعاميه... طب وانا ذنبى ايه يعنى وانا كنت عرفت اشتغل حاجه تانيه وقلت لا!!! ماهى البلد ماليانه رجاله... وطول مافيها رجاله يعنى لازم يبقى فيها مومسات.. هى الدنيا كده وانا ذنبى ايه ان جه بختى فى قسمتى دى ماهو ربنا خلقنا دكر ونتايه وطول مافى دكر يعنى هيعوز النتايه.. قالولى اتعلمى حرفه تكسبى منها عيش.. رحت اشتغل بيوميه فى مصنع وانا عندى 18 سنه ملاحظ المشغل كان قارفنى اكمنى كنت احلى بت فيهم وكان عاوزنى فى الحرام مع انه كان راجل متجوز وعنده بنات من دورى.. طيب هو انا يعنى مكتوب عليه اشقا واتعب بالنهار فى المصنع عشان ابقى برده مومس!!!!!!.. قلت ملعون ابو دى شغلانه.. وسيبتها ورحت مصنع تانى.. وكل مصنع فيه ملاحظ وكل ملاحظ عاوزنى فى الحرام وان مكنش الملاحظ يبقى المدير والا الغفير والله ماعرف يبقوا ايه اهم كلهم رجاله وكلهم عايزين حرام.... كان يعنى حد طلبنى فى الحلال وانا قلت لا...كل الناس عارفه ان امى مومس وعشان كده كانوا بيعوزونى فى الحرام .. وعشان كده انا ورثت المهنه على امى واخواتى برده ورثوها عن امى.. دى نصيبه اهيه دى.. هو سى المجتمع بتاعكوا ده يخلينى اشتغل زى امى بالعافيه بعدين يرجع يشتمنى انا وامى مش هم اللى خلونا نشتغل كده!!!!!! ماهى امى برده وليه غلبانه ومكسوره الجناح ولاكانتش تعرف تعمل حاجه تانيه غير شغلانتها دى والناس هى اللى علمتهالها يعنى هى كانت تعرف منين ماهى كانت مولوده مغمضه زى كل البنات بس امى مكانش ليها ضهر يسندها ويحميها.. غيرها بقى لقيت ضهر تتسند عليه يحميها اما حد يبصلها ويعوزها فى الحرام تلاقى الف يد تتمد على خلقته.. لكن انا اما كانوا يعوزونى فى الحرام واقول لا كانت الايدين تتمد على خلقتى انا

نسايم

حضرت النهارده امسيه فى ساقيه الصاوىلفرقه صغنونه اسمها الجميزه.. معرفش هم موهوبين والا لا... بس كل اللى اعرفه انهم ناس طيبين بيحبوا بعض.. الأمسيه كانت عباره عن قعده على الواسع شويه.. شويه ناس بتحب بعض بيقولوا شعر وبيغنوا وناس تانيه بيحبوهم قاعدين بيسمعوهم.. وكلهم ناس معرفهمش.. بس بعد اول عشر دقايق لقيتنى فى كوكب تانى مش داريه بالناس اللى حواليه.. كأنى قاعده مع الناس الطيبه اللى بتغنى دول لوحدى.. كان شاب منهم اسمر ماسك رق فإيده بينقر عليه وجمبه الحاج احمد مصطفى بيعزف على الناى باحتراف ومزاج" اثار فيه اشجانى وفكرنى بعقله الناى الملعونه بتاعتى اللى مش راضيه تطلع صوت اما هتجننى".. وجمبه شاب تانى بيعزف على العود... وجمبه نسمه.. روح.. مش اكتر من روح بريئه ماسكه عود واسمها عمر.. عمر بيلحن.. بيكتب شعر.. وبيعزف عود.. تشوفه وهو بيعزف تستغرب ازاى الضربات الناعمه دى عى الاوتار بتطلع صوت من كتر خفتها.. وفوق ده كله عمر بيغنى.. صوت رخيم دافى تحسه طالع من قلبك وداخل لقلبك.. وجمبه طفلين :) هم مش صغيرين اوى بس تحسهم اطفال من براءه ابتساماتهم.. وبنوته بتغنى.. صوتها اكتر من رائع تحس انك عايزها تفضلى تغنى ماتسكتش... وشاب تانى مونولوجيست درجه اولى ليه حضور عالى جدا.. وكان فى عمك ناصر بيكتب شعر.. وصوته قوى اما بيغنى... .. كان مفروض امشى 9.30 ماقدرتش امشى قبل الحفله ماتخلص " وطبعا اتاخرت على معاد روجعى البيت وعمكوا الحاج صوته جاب لآخر الشارع وربنا يستر ومايحبسنيش فى البيت شهر والا حاجه"....... اكتر حاجه علقت معايا غنوه غناها عمر.. الغنوه الوحيده اللى غناها.. كلمات واحد معرفوش ولا عمرى سمعت عنه قبل كده بس عجبتنى.. احساسها عالى اوى.. بعد ماعمر خلص الغنوه عمكوا ناصر قال فلان اللى كتب الغنوه " وقال اسم الولد بس انا ذاكرتى بطيخ فى الاسماء بنسى اوام".... وشكر الولد اللى كتب الغنوه عشان جه بالرغم من انه حصله ظروف منعته انه ييجى فى معاده وحيينا الولد.. وطلب منه يجكيلنا حكايه عبده.. الابن الشرعى للسيده ام عبده... وطلع على المسرح واحد.. قلقان.. حيران.. شكله مصرى.. اسمر ولابس كاسكيت.. فكرنى بأغنيه لفيروز بتقول يا عاقد الحاجبين على الجبين اللجين.. واللجين هى الفضه الدايبه.. معرفش الفضه الدايبه بيبقى لونها ايه بس بيتهيألى ان لونه هو ده اللجين... حسيته بيجرى من حاجات موتراه.. عينيه مش بترسى فى مكان واحد.. مع انه حاول يخفى توتره على قد ماقدر.. .. معرفش قدر والا انا اللى كان بيتهيالى انه متوتر.. بنى ادم غريب.. شكله صغير مع ان شكله كبير.. تحسه مش زينا طينه معجونه بميه.. تحسه فضه معجونه بدموع وآهات وألام.. معرفش جايين منين واستخبوا كلهم فى عينيه.. عينين قلقانه فيها تحدى وتصميم .. كان واقف صالب طوله بس كنت حاسه انه هيقع من احمال على كتافه ماحدش شايفها.. يقع فى حجر امه يبكى لحد مايهدا تمسح على جبينه وتحكيله حواديت لحد ماينام.. فى عينيه حواديت وآلام ومزيكا ومواويل.. شوارع وسكك وكتب واغانى وكلام..شفت فى عينه حاجه بتلمع معرفش دمعه والا نجمه والا مجرد انعكاس لمصباح اضاءه.. معرفش ايه حكايه عينين الناس معايا.. يمكن يكون كل كلامى ده كلام فاضى وانا اللى غاويه األف حواديت لكل عينين اشوفها الله اعلم... لانى عمرى ماهعلم لانى معتقدش هشوفه تانى.. ولو شفته يمكن معرفوش ولا حتى فاكره اسمه.. دنيا دايره مش كده؟

انت مش كبرت على الحاجات دى بقى؟

فجاه تلاقى اهلك اتخذوا قرار جديد بيقول انك كبرت زى مابياخدوا كل القرارات فى الدنيا بدالك عشان انت لسه صغير.. وتلاقى نفسك فجاه عيب تركب عجله عشان كبرت وعيب تركب مرجيحه عشان كبرت وازاى تشوف افلام كارتون عشان انت كبرت.. طيب اما انا كبرت مش تسيبونى بقى اقرر ايه اللى من حقى اعمله وماعملوش.. انا كبرت وعايز اركب مرجيحه وعجله حد شريكى!!!!!!!

من اول ماتحجبت منعونى اركب عجله بس كنت بنزل العب فى الشارع عادى يعنى بعدين منعونى كمان من اللعب فى الشارع... دلوقتى بقى عندى 24 سنه ومحجبه واول مابشوف مرجيحه بنط فيها واتمرجح واما بروح فى اى حته فيها عجل بركب عجل وباكل غزل البنات اما بروح جنينه الحيوانات وعندى مسدس ميه واللعبه اللى فيها ميه وصابون وبتطلع بقاليل وبعرف اعمل بيها اشكال كمان وباكل مصاصه وابص فى المرايه على لسانى احمريكا والا لا.. وبقعد على حجر بابا وخيلانى واعمامى وعماتى واى حد عايزه اقعد على حجره وفى العيد بجيب بومب وصواريخ وبجيب ساعات بلالين وطراطير وعندى فانوس بشمعه " اتكسر من قريب للاسف بس هجيب غيره" وبعض صحابى فى ايدهم واعملهم ساعه وبعمل شعرى زعرورتين وعندى على الكمبيوتر توم اند جيرى وبطوط وافلام كارتون قد كده وبسمع اغانى اطفال لغايه دلوقتى ولسه حافظه ابريق الشاى ابريق الشاى وبقلد كوكى كاك وبحب الناس تحكيلى حواديت .. هى امى اينعم بتشعر بالحسره كل مابتشوفنى ووالدى مقتنع تماما انى كائن فضائى بس هم متقبلين حريتى الشخصيه ومابيتضايقوش اما حد من الجيران يشوفنى وانا بلعب بالبقاليل وبجرى ورى القطه بتاعتى عشان تلعب معايا.. فطظ فيك ايها المجتمع الكابت لطفوله افراده انا عندى 24 سنه اينعم وبشتغل ده صحيح بس مش هكبت رغباتى فى انى امارس حاجات بحبها لمجرد ان المجتمع شايف انها حاجات عيالى.. شايفنى عيله؟؟؟ طظظظظظظظظظظظظظظظظظظ انا عيله وانتوا لاااااااااااااااااااااااااه............ لسانى احمريكا؟؟؟؟؟؟؟؟؟؟؟؟؟؟

ماما نجوى يا مام انجوى.. نعمين يا عيون ماما نجوى

زمان واحنا صغيرين كانت برامج الاطفال اسلوبها كوميدى اوى كان بيثير ضحكى كطفله.. ماما ساميه وماما نجوى دول كانوا بيستخدموا عرايس عشان يعلمونا الكخ والدح طبعا ماما ساميه معاها كرمبه وماما نجوى معاها بقلظ.. وكل حلقه اقعد استنى اسمع المصيبه اللى عملها بقلظ واللى عملتها كرمبه عشان اقعد اضحك على ماما ساميه وماما نجوى وهم مكبوسين.. كنت دايما بشوف دى برامج كوميديه مش عشان اتعلم منه احاجه فقط عشان اشوف فيها توم وجيرى وفقره السيرك وا لاحاجه..... ... كان فى بقى برنامجين تانيين كنت بحترمهم اوى سينيما الاطفال بتاع ماما عفاف وبرنامج بابا ماجد كانوا بيكلمونا كاننا ناس بتفهم، ماما عفاف كانت بتجيب افلام حلوه جدا ... كل اما بسمع شريط لعمرو خالد بضحك وبفتكر بقلظ وماما نجوى واللى يفطس من الضحك ان لسه الناس بيعجبها الطريقه دى اعتقد عشان اتعودوا عليها منذ الطفوله... وعلى راى صفاء ابو السعود" ياصحابى وصحباتى هنا ومحلك سر.. بصوا وشوفوا حاجاتى انما ايه فى السررررررررر ... عندى صابونه شقيه.. مكاره ولعبيه .. اما بغسل ايدى بتزفلط فى الميه.. واما بغسل وشى.. بتشعوطلى عينيه.. اه منك يا صابونه يا شقيه يا مجنونه.. بتقلى وتقلى ام اهتبقى ملى"..

المراه السخان

وانا بقرا عند الواد شباك عن ان كل حاجه بتمشى معاه بالمعكوس افتكرت حاجه غريبه حصلتلى مالهاش علاقه بالموضوع... من كام شهر كده السخان بتاعنا كان بايز واتصلح.. ودخلت استحمى لا بيه ولا عليه واخدت حمايتى بالتمام والكمال وقفلت الدوش وبنشف شعرى بقى عشان البس سمعت اصوات غريبه..... بتدور لقيتها طالعه من السخان الذى تحول فجاه الى وابور الساعه 12 وياوابور يا مولع حط الفحم ... وطلع دخان وشميت ريحه شياط مابقيتش عارفه اعمل ايه والاصوات بتعلى قلت هينفجر... طيب مانا مش هطلع كده يامولاى كما خلقتنى طيب اهبب ايه ياخراشى اللى اختشوا ماتواااااااااااا قلت مابدهاش قفزت على ماسوره السخان قفلت محبس الغاز والميه ولبست هدومى " طبعا لبستها على اللحم ماحدش واخد باله" وطلعت جرىىىىى يا باباااااااااااااااااااااااااااااااااااااااااا السخان هينفجررررررررررر...... طبعت اعلنت حالة الطوارىء فى المنزل ومنع اهل البيت من الاستحمام لحين وصول رجل الاصلاحات فىالصباح الباكر.. شرف الموكوس وفحص السخان ووجد انه بصحه جيده وتمام التمام ومافيهوش الهوا.. طيب يا عم ده كان بيطلع دخان وريحه شياط!!!!!!!.. قال معرفش انا شايفه قدامى اهه سليم مفيهوش حاجه.... والمضحك فى الامر ان السخان لغايه دلوقتى شغال عادى جدا ولا كأن فى حاجه حصلت....... ومش قادره لغايه دلوقتى اعرف ايه سر الشياط اللى ريحته عبقت الحمام دى... جايز كان عفريت شقى حب يهزر معايا..... طبع صحابى اكلونى تريقه اما بقولهم لو كان انفجر فى وشى كان زمانى دلوقتى شبه قطع غيار السخان...... فسمونى المراه السخان

ممكن اسألك سؤال؟

اتفضل اسأل

هو انتى وسط افكارك دى بتفكرى انك انثى ومحتاجه تتجوزى؟

لا

انا برده كنت بقول كده

وهو انا لازم اتجوز وخلاص؟

اى انثى محتاجه لضهر تستخبى جواه

انا محتاجه لضهر اتسند عليه وحضن استخبى جواه وقلب انام على صوت دقاته كل ليله وعقل يحتوينى كلى على بعضى

ايه ده مين معايا!!!!!!! انتى ده والا حد غيرك بيقول كده

لا انا

امال ليه مش عايزه تتجوزى؟

عشان كل الولاد دلوقتى عندهم كل الاعضاء لكن لا تقوم بالوظائف السابق ذكرها اعلاه

سهل اوى انك تلاقى حد عنده قلب وحضن

نسيت اهم حاجه" العقل اللى يحتوينى"

انتى عايزه واحد صايع حياه عشان يعرف يحتويكى

الورد له اوان والفل له اوان وقت ماييجى النصيب ماحدش بيقدر يقول لا ماينفعش اتجوز لمجرد الجواز وضل راجل ولا ضل حيطه

ثم تفرعت المناقشه لنقاط اخرى لا علاقة لها بالحوار السابق

مواسم

لحد سن 10 سنين_ ادى بوسه لعمو وخدى احمد العبوا فى اودتك وريله العروسه الجديده بتاعتك

سن 10-12 سنه_ البنت كبرت واتدورت وخراط البنات خرطها ماعادش ينفع تلعب مع احمد- احمد كان بيقولك ايه فى التليفون؟

من سن 12-16 سنه_ او احمد جه مع مامته وباباه تانى تخشى اودتك وماتطلعيش منها غير عشان تسلمى عليهم وتدخلى الشاى- لو حد عاكسك فى الشارع اوعى تردى عليه

سن الجامعه_ اوعى تكلمى زمايلك الولاد- اوىع تقفى فى الشباك- انتى ازاى تخرجى بكحل فى عينك!!!!!!!! ممنوع تلبسى حاجه ضيقه كده وانتى خارجه انتى مابقيتيش صغيره- ماتتاخريش بره البيت عن الساعه 9

بعد التخرج_ احمد جاى مع مامته وباباه النهارده يتغدوا عندنا- حطى فى وشك شويه الوان وبلاش اللبس المقفول ده هو احمد غريب!! ده انتوا متربيين مع بعض

من سن 25 سنه فما فوق_ يا خايبه طيرتى احمد من ايدك يابنتى اتلحلحى شويه انتى هتفضلى خيبه كده لحد امتى دايما لابسه هدو مقفوله ولا بتحطى اى الوان فى وشك اما بقيتى عامله زى الراجل هيجيلك عرسان اازاى كده يابنتى

حالة توتر

كلما رأيتها اجدها متوتره... تقضم اظافرها او تنفث دخان سيجارتها بسرعه لتلقط منها نفسا آخر قبل ان تفر منها السيجاره.. دوما تتحرك بسرعه وعنف تعبيرا عن احتراقها الداخلى.. تتعاقب فى عينيها انفعالات شتى، غضب، تصميم، حيره، تتخليهم نظرات استنجاد وصرخات عاليه تطلب النجده كانما تستغيث منها عيناها لفرط ماتعانى من تلك الانفعالات العنيفه.. تجلس امام حاسوبها فى محاوله لاقناع نفسها بانها مشغوله عن افكارها التى تسبب لها التوتر.. تفضحها ساقها اليمنى التى تهتز بعنف فى ايقاع متسارع واظافرها التى لم تبرح مكانها بين اسنانها.. وحدها فى الغرفه مع الحاسوب.. لم اتمالك نفسى من ان اسالها عن سبب توترها الدائم.. وبرغم من اننا لم نكن يوما صديقتين الا اننا ندخل فى محادثه طويله .. فاجدنى اتحدث معها فى ادق تفاصيل شخصيتها واصف لها مشاكلها وانصحها كيف تتعامل معها وكأننى امها التى ولدتها وربتها وارضعتها من ثديها.. تسقط بيننا كل الحواجز لاراها كائن متعب خائر القوى تحتاج الى الراحه من دور الام لكل من حولها.. وأرى رغم كل محاولاتها لأن تبدو صلبه انثى ارق من اية انثى رايتها من قبل ..

عفوا.. ليس هناك نهايه فالأحداث لم تنتهى بعد