28 May 2011

رسايل ٢٧ مايو ٢٠١١

إلى كل واحد او هيئة أو جهة أو كائن أرضي أو فضائي حاول يخوف الناس عشان ماتنزلش امبارح…كل بعضك إحنا مابنخافش ومابنتهددش وعارفين إحنا عايزين إيه وبإذن الله هناخده يعني هناخده…الشعب لا يريد ولكنه يأمر، وإنما يقول: أريد، من باب التأدب في الخطاب مش أكتر

١- رسالة إلى المجلس العسكري:

متشكرين جدا على الشرطه العسكريه اللي اساءت معاملتنا في كل حته…مش محتاجينها..احنا بنعرف نحمي نفسنا…ركز مع المنشآت الحيويه وسيب للداخلية شغلها…يا تخليها تشتغل عدل يا تسيبنا احنا نصطفل مع بعضينا… وماتقلقش احنا بلغنا الحلم والحمد لله وامبارح كان أكبر دليل على ذلك

ملحوظة: الإنكار مش هينفعك…لو انت مش عارف الناس كانت قد ايه في القاهره واسكندريه والمنصوره والمحله وسينا والسويس والاسماعيليه وبورسعيد… من الأفضل ماتعلقش بدل ماتقول اننا كنا قليلين عشان ده بيدينا إيحاء انك كنت بتتفرج علي مظاهرات تأييدك في الحسين

٢- رسالة إلى الداخلية:

متشكرين جدا…بس مافيش داعي تاخدوا مرتبات ادام مش عيزين تشتغلوا…يا تنزلوا تشتغلوا بما يرضي الله وتحترموا أفراد الشعب اللي بيصرف عليكوا، يا تسيبوا الخدمه وتتكلوا علي الله وتقلعوا البدلة واحنا هنروح نلبسها ونعمل الصح

٣- رسالة إلى السياسيين:

متشكرين جدا…احنا بنعرف نفكر ونقرر ونطلب…مش مستنينكم تملّونا أي حاجه…اللي ما بيعبرش عن مطالبنا يخليه في بيته أحسن زي إمبارح كده…وياريت لو سمحتوا تبطلوا تبيعولنا أوهام…وياريت لو سمحتوا تبطلوا تمصلحوا علينا وتفرضوا مطالب وهميه لم يتم إعلانها في المظاهرات…مطالبنا كانت على يفط متعلقه في الميدان وهتافات بنرددها…عيب اوي تطلعوا من الميدان تحرفوا المطالب على هواكم…إحنا بننزل عشان مطالبنا إحنا مش عشان نحققلكوا مصالحكوا الشخصية..فيا تبطلوا تحطوا على لسانا كلام إحنا ما قولناهوش يا تشوفولكوا حاجه تانيه تعملوها

٤- إلى الإعلام

ماعنديش حاجه اقولهالكم غير اتقوا الله يا جبنا

٥- إلى ربات البيوت

اللي مانزلش من بيته وشاف بعينه يقعد ساكت أحسن بدل ما يقعد يحلل وينظر وهو مش عارف حاجه عشان بيبقى شكله أهبل جدا

٦- إلى الإخوان المسلمون:

من وضع نفسه فوق قدره، وضع الناس دون قدره. الكدب مالوش رجلين والكداب بيخش النار. قلتوا مش نازلين يبقي عيب اوي تبعتولنا ناس تقولنا روحوا…كان شكل جواسيسكم أهبل أوي في الميدان…وطبعا لا أقصد شباب الإخوان الجدعان اللي حسهم اتنبح في الهتافات إمبارح..دول حته مننا حتي لو منتمين للإخوان لكنهم حبايب بلدهم وولاد بلدهم

٧- إلى المعتز بالله عبد الفتاح:

تاني مره ما تبقاش تقول كلام انت مش قده…لا إنت ولا غيرك هيهددنا ولا يسحب مننا حقوقنا في التظاهر والإعتصام…ولو انت شايف ان الحكومه عشان تبقي قويه تدي الشعب بالجزمه لو فتح بقه يبقى فعلا مافيش فرق بين أقطاي وأيبك وآخرتك مش هتختلف كتير عن اخرتهم…ربنا كبير

٨- إلى كل واحد عامل فيها سياسي وبيطلع في التليفزيون والجرايد يتكلم بإسمنا:

ماتزعلش لما حد من الناس ييجي يتكلم معاك…التناكة آخرتها وحشه والأيام بيننا

٩- إلى البلطجية:

ماجيتوش ليه؟ والنبي وحشتنا قعدتكوا…اليوم من غيركوا بيبقي مافهوش سسبينس

١٠- إلى كل من كان امبارح في الشارع ينادى بحقه:

بحبك في الله…تحيا مصر يا عم

7 comments:

new said...

بخصوص الشعب يأمر

ارجو قراءة

http://kenanaonline.com/users/mohamedesmatfarag/topics/85326/posts/234572

وهذا
ممكن تبدئي به

http://kenanaonline.com/users/mohamedesmatfarag/topics/85326/posts/234534

وهذا

http://kenanaonline.com/users/mohamedesmatfarag/posts/233716


وهذا عن الثورة الثانية..كتبته في مارس
ممكن تبدئي به

http://kenanaonline.com/users/mohamedesmatfarag/topics/84296/posts/230083

وعذرا لطول المقالات..لكن للضرورة احكام
تحياتي

new said...

تعليقي على رسائل حضرتك:
أولا
كل الرسائل آلمتني ..والله..أنا حزين. حزين ان هذا الكلام يأتي اليوم اللي نكتبه فيه..كان نفسي يكون كلام تاني يكون فخر لنا وﻷولادنا مع بعدنا. كان نفسي كلمة ايد واحدة تتجسد فعلا ونكمل ما بدأناه
معلهش..لكل أجل كتاب..والخير جاي ان شاء الله

ثانيا:
مصر محظوظة ان المدونين النشطين زي حضرتك غاية في الادب بهذا الشكل: متشكرين متشكرين..وانا عارف كم الغيظ اللي بداخلك
ابناء مصر لا يتغيروا

ثالثا
احلى رسالتين:

٩- إلى البلطجية:
ماجيتوش ليه؟ والنبي وحشتنا قعدتكوا…اليوم من غيركوا بيبقي مافهوش سسبينس

ضحكتني جدا!! صحيح والله!! هي كل القصة ان مافيش بزنس. ما فيش حد جه طلبهم..بس هما تحت الطلب واماكنهم معروفة.. وهايفضلوا شغالين لغاية ما الثورة تنجح..نعم، لما "البلطجية" دول تعلن مصر انها دولة خالية من البلطجة، تبقى الثورة نجحت..قبل كده.. لا أظن

١٠- إلى كل من كان امبارح في الشارع ينادى بحقه:

بحبك في الله…تحيا مصر يا عم

فعلا لا اعلم لماذا كانت تغمرني انا ايضا عاطفة محبة تجاه الموجودين!؟ أكثر من أي وقت مضى؟
هل ربما ﻷنني أحسست أنهم بدون أهداف سياسية مرحلية، وخرجوا متحدين الكيانين الأكبر في مصر: المجلس والاخوان، من أجل الوطن وفقط؟
متحدين هنا مش معناها السيء، ولكن معانا الحسن: تحدي الحظر لحق منا لحقوق، بل واجب من الواجبات، بل فرض وطني من الفروض
لا يصلح ان يوضع تحت وصاية احد ايا كان

هل ﻷني وجدت كمية كبيرة من غير المحجبات، ثم كمية كبيرة من المنتقبات والملتحين، ثم كثيرا من الشخصيات المشهورة في الثورة تسير هكذا .. بمفردهم..دون مجموعات ولا حد يحميهم ولا شيء: المستشار الخضيري..المستشار زكريا عبد العزيز .. د. احمد السيد النجار..م/ ممدوح حمزة .. ناس كتيرة تمنيت التعارف عليهم من زمن
وطبعا لافتات ائتلاف شباب الثورة التي افتقدناها وافتقدناهم كثيرا
فعلا كان يوما سعيدا
غير ان ربنا رحم الناس من الحر القاتل..طول اليوم!

ياترى هل فيه حد سمع الملايين امبارح قالت ايه؟ وللا ما حدش عايز يسمع؟ او سمع لكنه لا يريد ان يفهم؟
اتمنى ان نرى غدا جديدا مختلفا ان شاء الله

AHMED SAMIR said...

كلام جميل و كلام معقول ماقدرش اقول حاجة عنه
الشرطة لابد من وقفة جادة معها
انا عن نفسي احملها مسئولية كل العك اللي بيحصل دة

Mohamed kharoub said...

اكتر حاجة ضايقتني فعلا اني رجعت من التحرير لقيت المصلحجي اليوم كاتبة اهم المطالب الدستور أولا و تأجيل الانتخابات مع ان مفيش نفر قال تاجل الانتخابات و كان فغيه ناس رافعة يفط و بتنادي بالدستور اولا و ده كان رأيهم الشخصي و اظن من حقهم يعبروا عنه .... الاعلام كله تابع لرجال اعمال زي سزيرس و البدوي وحسن راتب و غيرهم و علشان كده بيقولنا كلام لمصالحه و اللي عاملين فيها سياسيين و هما كدابين و بيستغلونا و يطلبوا علي قفانا ... انا دمي محروق فعلا و مش عارف ايه الحل مننزلش يعني ولا ايه

سامية جاهين said...

يسلم فُمك يا شيخة! :) سبحان الله ده احنا قايلين تقريبا نفس الكلام مع بعض الاختلافات وكل واحد بطريقته طبعا.
تعظيم سلام وانا كمان باحبك في الله!

AZ said...

@samia
اكتشفت كده برده لما قريت البوست بتاعك الصبح :D

KEBLAWYAT said...

٥"- إلى ربات البيوت

اللي مانزلش من بيته وشاف بعينه يقعد ساكت أحسن بدل ما يقعد يحلل وينظر وهو مش عارف حاجه عشان بيبقى شكله أهبل جدا"

thumbs up