الحلو لاجل عيونه... يكرم... والوحش لاجل عيون الحلو... يكرم... والكل لاجل الكل يكرم... الكرم طبع... وحسن الخلق طبع... ماتبدلش طبع حلو بطبع وحش لاجل حد... الدنيا ماشيه تحميل جمايل... والجميل يشيله الكريم... ويعمله الكريم... للكل...
اللئيم سوء الخلق طبعه... لا يعمل جميل في حد ولا يصون جميل اتعمله... ومهما تديله مايشبع... ومهما اخد مايقنع...
خلي دايما خيرك علي الكل ولا تستناش ولا حتي كلمة شكرا، عشان ماتزعلش اما الندل يدوس علي جميلك... ماهو اصل جميلك متعلق في رقبته... لو داس علي جميلك ماتزعلش عشان هو كده داس علي رقبته...

الأرق اختراع مؤذى جدا ومستفز جدا بالذات للناس اللى غاويين نوم زى حالاتى... بتغاظ اوى من نوبات الأرق اللى بتطول... وللأسف بتبان من أولها... بتبدأ بأول ليلة مفيش نوم لحد أدان الفجر... وتانى ليله مفيش نوم خالص... من تالت ليله بقى لحد ماربك يزيح عنى مبنامش اكتر من ساعتين فى الليله الواحده ومبيبقوش قبل ماسمع الفجر بيدن ابدا ومبيبقوش متصلين... وخد عندك بقى جهاز عصبى مستنفر على آخره -لدرجة انى ساعات بحس هيجيلى صرع او مخى هيطق من الجمجمه- وفى نفس الوقت المخ منمل... ببقى ماشيه بين البينين... عينى مفنجله وحواجبى مرفوعه ومع ذلك مش شايفه حاجه... بتبقى حاله اقرب للتتنيح... وكل ما النوبه بتطول فى المده كل اما العصبيه بتزيد والتركيز بيقل وتنميل المخ بيزيد... وطبعا مفيش داعى نجيب سيرة الطنين فى الودان والهلاوس السمعيه والبصريه اللى بتحصل من قة النوم... بعد اول اسبوعين بتبتدى تبقى شبه الأشباح اللى بتطلع فى الافلام... اسبوعين كمان بعدها وممكن تبتدى تعيط عشان بس نفسك تنام ولو ليله واحده وتكمل أرق تانى... ممكن فعلا فى الوقت ده اعمل اى حاجه عشان انام...
نوبة الأرق المره دى شكلها هتشرفنى حبه حلوين... ربنا يستر

الشكوى لغير الله مذله

كان عندى أمل، زى أى بنى آدم اهبل... وكالمعتاد... فوقت على خيبة الأمل ههههههههههههههههه... بس المره دى كانت ملعوبه صح... اشتغالة على مستوى يعنى... ماشى يا دنيا... يانا يانتِ وادينا هنشوف... هاتى آخرك يا دنيا...

فجأة... تلاقى نفسك واقف لوحدك فى وسط الشارع... زى الاهبل تمام... مهما كانت قيمة اللى ساب كفك وانت بتعدى الشارع متبصش وراك... عشان ساعتها انت لوحدك اللى هتتهرس تحت عجلة اول عربية معدية... بص قدامك وعدى الشارع... ماتتخضش... مانت ياما عديت شوارع لوحدك... وياما هتعدى شوارع لوحدك... هو انت صغير على تعدية الشوارع!!!... ايه الجديد يعنى!!!!... المهم بس بعد اما تعدى خلى عندك ذوق واتدور اعمله باى باى قبل ماتمشى...

ليس لى فى نفسى شىء... فالقلب مسكون والعقل يدور فى رحاً أبدية الدوران... فى عزلتى... لا يزورنى أحد سوى طيف بعيون عسلية... له وجه طيب وقلب عاشق ويدين مكتوفتين بخيوط وهمية...

بين الكف والكف يرقد قلب وحيد... يدق بلا طائل... وبين الرأس والقدم يرقد عقل وحيد... يدور فى رحا الوحدة... وبين بداية الليل ونهايته يرقد جسد وحيد... لاشيء يؤنسه سوى تتابع انفاسه الرتيبه...