حقيقى نفسى اعرف الخواجه جوجل بيفكر فإيه لما بطلب منه يدورلى على حاجه... يعنى اقوله عايزه صوره لمحمد منير يطلعلى "بشرى في فستنان جميل... كاميرون دياز... أنجيلينا جولى... وجمل بيولد"... اموت واعرف بيجيب نتايج البحث بتاعته دى منين!!!!

من صفعك على خدك الأيمن فأدر له خدك الأيسر.. فللكون رب... ربى هو ربك ورب العالمين... وكما أن خدى الأيمن والأيسر سواء فإن خدى وبطن قدمى سواء... فاصفعنى ماشئت... فخير لى أن ينتقم لى ربى من أن أنتقم لنفسى... ولكن ذاك صعب... فالوجه كريم وبطن القدم أكرم... وكفى أكرم من أن يمس وجهك... وقلبى أكرم من أن يضمر لأحد سوء... والنفس مسكينه يرهقها الألم وغدر الأحبة والأعداء على السواء... والرب رحيم... وقادر... عفو ومنتقم... وأنا آدمية... لا تهن على نفسى... ولا أطيق الانتظار... فيارب رد عنى... فليس لى طاقة علي الانتقام... و نفسى ضعيفة... وكفى يحترق من فرط انتظاره للحظة يرد فيها الصفعة... ونفسى تتألم من حريق الكف والوجه... وليس الوجه كالكف... ولكن الوجه كباطن القدم... فكلهم بعضى... فيارب سلم... قد صار كلي يحترق من فرط غضب أعمى عينى... ولكن بصيرتى لا زال يصلها قبس من نور... فيارب رد عنى بنور بصيرتى ماكتنف نفسى من ظلام الغضب...

اعتقد ان شعار السنه الجايه بتاع ساقية الصاوى هيكون داعية اسلامى لكل مواطن... الغريبه ان ناس زى الرز بتروح الحاجات اللى بيسموها دروس بتاع الناس دى وبيرجعوا زى ماراحوا زى ماجم...

الصبح بدرى... بدرى اوى... بعد الشروق بشوية... السما بره نضيفه لونها لبنى... فيها صحيح حبة هباب من تحت وعلى آخر النهار هتبقى كلها هباب... بس احنا لسه الصبح بدرى... الدنيا ساكته... شوية عصافير بتصوصو... صوت خطو غنم على الاسفلت رايحه ترعى... كلها كام ساعه وانا كمان اروح ارعى... زى الغنم... زى التور مربوط فى ساقيه وعينه متغميه... بس احسن... لما الغمامه تغطى عينى هتكون السما كلها بقت بلون الهباب... وهفضل لوحدى شايفه لون السما اللبنى... فيها حبة هباب صغيرين من تحت بس مش مهم... اللى غما عينيا هيشوف السما بلون الهباب... وانا هشوفها لونها لبنى... هو هيمل من كتر الفرجه عليا وانا بلف... وانا هيفضل عندى امل ابطل لف... ماهو السجان بيزهق اسرع من المسجون... وفىمساجين مبتملش... وفى تيران مابتكلش... وفى بطون مابتشبعش... وفى نفوس ماليها الرضا... وفى نفوس خربانه... وفى قلوب عمرانه... وكل حى متعلق من عرقوبه لا ليه ولا عليه...


----------------------------
لو احمد حداد او عمر طاهر كتبوا الكلام اللى فوق ده بس بدل النقط عملوا انتر هتبقى قصيده... وقصيده عظيمه كمان... ومش هتعجبنى... وهتعجب الناس... وهيقولوا عليا انى مبفهمش فى الشعر عشان مش عاجبانى... هىهىهىهىهىههىهى.... لا مؤاخذه القافيه حكمت...

اعزائى البهايم فى كافة ارجاء بلدى الحبيب... اتقوا شرى... وأخيرا... كتكوا القرف

مش منطقى اطلاقا انى اطلب من واحده مش فاهمه شغلها انها تفهم شغلى... ومش منطقى برده انى اطلب من واحده مش فاهمه حاجه فى اصول العمل انها تتعامل معايا باخلاقيات العمل... فحيث ان هذا هو الحال قد وجدت انه مفيش داعى اهزأها لأنها مش هتفهم انى بهزأها وهبقى حرقت سعرات حراريه على الفاضى فلقيتها مش مستاهله الصراحه... فسيبتها ومشيت... اصل هى مالهاش حل مش هتفهم ولا هتتعلم... هى اخرها تدورلها على راجل يئنيها وتخلفلها عيلين تطلعهم معاتيه وعمار يا مصر...

تنفيس اخير
يلعن أبو الشغل مع النسوان بالذات لو مش فاهمين فى شغلهم

ناس راكبين المكروباص والسواق مضاعف الاجرة... أمين شرطة وقف المكروباص (امبارح قبل مرسوم التعريفه الجديده للاجره ماينزل) وسأل الناس الراجل مغللى عليكم الأجرة... الركاب كلها فى نفس واحد (لأأأأأأأأأ)....

طلاق تلاته الحكومه لو جابت الشعب ده حرقوه فى افران غاز زى ماهتلر عمل فى الناس اللى مش ألمان ماهيعمل حاجه... ولا انا هبقى زعلانه... حقيقى... احنا نستاهل...

ناس راكبين مكروباص غير الاولانى فى مكان مختلف ... والسواق مغلى الاجره لـ 75 قرش بدل 50 قرش ... أمين شرطة وقف المكروباص وسأل الناس دافعين اجره كام... واده قالت 75 قرش... راح امين الشرطه قاله اركن على جنب... راح بقيةالركاب قالوله احنا دافعين 50 قرش... طبعا 13 راكب بيقولوا نص جنيه وواحده بتقول 75 يبقى فى الاغلب الست عندها شيزوفرينيا بارانويا... فطبعا امين الشرطه ساب السواق يمشى... اللقطه بقى الىل بعد كده هى اللى تفطس من الضحك... واحد من الركاب بيتخانق مع الست بعد المكروباص ما مشى قالها لما انتى مش عاجبك الاجره دفعتى ليه... الست قلتله عشان عايزه اروح شغلى زى مانت عايز تروح شغلك...

الموقف فى حد ذاته محزن ويغيظ... بس فطسنى من الضحك عشان افتكرت نكته قديمه من ايام ثانوى... كانت وقتها دعابه... كمان شهرين هتبقى امر واقع...

بيقولك الريس قال لرئيس الوزرا يعمله قرارات ظالمه يقوم هو يلغيها تقوم الناس تحبه عشان حس كده ان شعبيته معادتش زى زمان... فرئيس الوزرا فرض رسم طلوع الدائرى عشره جنيه... الناس سكتت... فالريس قاله طب شوفلى حاجه اجمد شويه احسن دى مفرقتش معاهم... فراح رئيس الوزرا فرض رسم نزولمن على الدائرى 10 جنيه فوق الاعشره الاولانيين... الناس بتدفع وهى ساكته ولا حد اشتكى... فالريس قاله وبعدين لأ شوفلى حاجه تقطم وسطهم تخليهم يضجوا مينفعش كده... فراح فرض رسوم مرور من على الدايرى عشره فوق العشرين القدام... الناس بتدفع ولا حدش بيفتح بقه... عشره طالع وعشره نازل وعشره وهم معديين... فقاله لا بقى انت شوفلى حاجه تخليهم يا ينطقوا يا تجيب اجلهم... فرا ح رئيس الوزرا معين ناس تقف على الكوبرى تضرب الناس على قفاها عربيه عربيه.... والناس ماشتكتش... الريس قلقل وقالك لأ رئيس الوزرا شكله بيزاولنى ان الازم انزل اتفقد املكان بنفسى اشوفى كلامه صح ولا امريكانى... لبس الريس وراح الدائرى متنكر ولقى الناس بتدفع الفلوس وواقفين طوابير عشان يتضربوا على قفاهم... فراح قرب على واحد وسأله شكلك كده متضايق... قاله اه شويه... قاله ان االريس قولى اعملك ايه... قاله ياريت بس لو تزودا عدد الناس اللى بتضرب شويه احسن احنا كده بنتعطل...
بمبارابارم بم بم

شىء يفطس من الضحك انك تفتح بروفايل بتاع شخص وتلاقى معندوش حاجه يقولها عن ذاته عشان الناس تاخد فكره عنه (كبنى ادم) غير انه دكر

sex: Male

من ضمن اسمه ووظيفته واهتماماته والحاجات اللى بيحبها والحاجات اللى بيكرهها مبيهمهوش الناس تعرف عنه غير انه دكر!!!! ده الانطباع اللى عايز الناس تاخده عنه... انه بسلامته دكر... طالع لأبوه مش طالع ولا مؤاخذه للست أمه... اييييييييييييييييه رجاله اخر زمن!!!!... دكر... هىهىهىهى... فرحان يا مرسى ان عندك شنب؟؟؟ طب مالصرصار عنده شنب.. بص يا مرسى روح اقف فى البلكونه وقول اناعندى شنب احسن الجيران اشتكوا... بيقولوا بقالنا زمان ماشوفناش الاستاذ مرسى واقف فى البلكونه بيقول هيييييييييييه انا عندى شنب...