لا الحزن عاد يبكى
ولا الأحلام بتنول
وكيف يا ضروع الموت تحني وتبقي حلّابه
الأبنودى



وبعيدا عن مود الكآبه اللي بيفرض نفسه فرض كدهه اليومين دول لاتزال الحياه حلوه

قال بعض الحكماء:
إذا جالست الجهال فأنصت لهم. وإذا جالست العلماء فأنصت لهم.
فإن في إنصاتك للجهال زيادة في الحلم ، وإن في انصاتك للعلماء زيادة في العلم.

للأسف ماحدش قال شىء عن مخالطة الأغبياء.
وفي هذه الحالة أحب ان ادلى بدلوى في هذا الموضوع...
اذا جالست الأغبياء فلا تعارضهم ولا تنصحهم ولا تتعاطف
فأية كلمة تتفوه بها كن واثق تماما انها ستؤخذ علي غير معناها... فإذا فرضنا انك نصحته بتعديل سلوكه سيتهمك فورا بأنك تسىء إلى سمعته وقد يصل به غباؤه إلى حد أن يقوم بنشر الخبر بين الأصدقاء علما بأتك لم تخبر اى منهم فيكون فى النهاية قد آذى نفسه بشكل مبالغ فيه لأنه نشر زلاته على الملأ علما بأنك كنت تنصحه لكى تكفيه مؤنه الإحراج أمام الآخرين...
الأغبياء وحدهم لا يملكون القدرة على حفظ ماء الوجه

لا يعنيني من العالم سوى كف طيب كوجه ابى... ولا يحملنى علي الصمود سوى قلب صلب كظهر أمى... ولن يأوينى سوي صدر واسع بعرض أحلامى...

يقف وحده في مواجهة العالم... لا يؤنس وحدته سوي ظل قصير القامة... فكن مثله... القادم من العدم... يبحث عن شبر من الأرض ليثبت عليه قدميه... واكتفى -مثله- بظلّك- جدارا تركن إليه كلما أوشكت أن تقع... واحتفظ دوما -مثله- بكف أمك- تحتمي به كلما قست عليك الدنيا... وانظر دوما -مثله- إلى وجه ابيك- ليضىء لك الكوكب كلما أظلم...

٢٠٠٨ باديه بداية مزعجة جدا مما ينذر بعام سعيد... علي الأقل اسعد من ٢٠٠٧ اللي بدأت بداية ظريفة وبقيتها غم... يارب ظنى يصدة ولا تطلعش السنة دي أبشع من اللي قبليها...
انا حاليا متوفية وعاجزة عن العمل عشان الكمبيوتر بتاعي متوفى وعاجز عن العمل... وصدق من سمّى فبراير فقراير

من فتره طلع مصطلح (غطاء الرأس) بيطلقوه على الحجاب... وده كان بيخنقنى التنين عشان انا مش عربيه ايه غطاء الرأس دى انا محجبه مش مغطية شعرى عشان مبلول!!!!
بعدين لما امعنت النظر اكتشفت انه والله معاهم حق يعنى... وان كان تعبير مش دقيق برده لأن حاليا نسبه كبيره جدا من المحجبات مش محجبات هم بس لابسين ايشاربات بتغطى الشعر - أحيانا- او جزء منه -غالبا- بس كان مفروض يسموه غطاء الشعر مش غطاء الرأس... او غطاء شعر الرأس لمزيد من الدقه

اتصدمت من فتره صدمتين اقوى من بعض

اول صدمة كانت فى صديقة عمرى اللى معايا من أولى ابتدائى من أول يوم... كنت كل اما ابقى فى اقصى حالات الضيق وانشغال البال الاقى البنت بترنلى يا اما بتبعتلى رسايل بقى جامده كانت بتفرق معايا جدا فى الأوقات دى.... وانا كنت فاكره انها حاسه بيا بقى والحركات دى لحد اما اكتشفت مؤخرا انها كانت بترنلى عشان موبايلى الاهبل اللوك بتاعه بيتفتح (متفعص فى الشنطه وبيعوم فيها فكل الزراير بتاعته بينداس عليها وخد عندك بقى) وبيبعت رسايل فاضيه وهى اول اسم عندى فى الفون بوك فكانت كل الرسال الفاضيه بتروحلها عشان كده بترنلى... وكانت الصدمه الأولى...

الصدمه التانيه كانت فى سواقين التاكسيات... انا مبركبش كتير تاكسيات عشان بيتنا مش بعيد من مطرح ما بنزل من الميكروباص... لما بتاخر واخد تاكسى للبيت... اسمع صوت التاكسى وهو لسه موتوره داير وماتحركش من مكانه واول مادخل باب العماره يمشى... كنت بحسب السواقين بيبقوا واقفين لحد ما يتطمنوا عليا لحد ما فى مره اتدورت... اكتشفت ان السواق لا مستنينى ولا نيله بسلامته بيحط جوز اللحاليح اللى لطشهم منى وسط فلوسه ومشى... وكانت الصدمه الثانيه...

هقول ايه بس... انا كنت بحسبك اتاريك اتاريك

All the good comes to those who flush (the toilet)

يعنى كل الحاجات الكويسه بتيجى للناس اللى بتشد السيفون
واحب اضيف (وبتحط مزيل عرق) جنب (بتشد السيفون)

أبتلع ادمعى فى صمت فليس لى حق هنا فى البكاء... ولا هناك... قد ضاقت بى كل الصدور... حتى صدرى لم يعد يتسع لى... ويوما ما جسدى ايضا سيلفظنى... لا يصاحبنى فى وحدتى سوى الصمت... وبضعة احرف اسكبها هنا فى صمت...
الغضب... والدموع... والصمت... ابشع ثلاث عادات تمارسها قبل النوم... فهنيئا لشياطين الأحلام الليله فلهم احلامى غذاء... وصباح الغد سيرتعون فى دمى... ولينسحق العالم تحت اضراسى التى تسحق نفسها ليلا فى محاولة بالئسة لابتلاع الصمت او الدموع او الغضب...

امي سألتني من فتره مين ساركوزي ده قلتلها مخرج لاتيني الأصل... كان ساعتها كاتبين مقال طويل عريض عنه وعن السيكوسيكو وانا ما اخدتش فى بالى ومقريتش ولا امي قرت المقال عشان كان العنوان ليه علاقه بانه جه مع السيكوسيكو -يادى الأضاشه ياولاد- وكمان -ياللهول- باتوا سوي سوي في الأوتيل يا خبيبي... الوضع مش ان امي ساذجه ولكن الوضع ان الست المسكينه مجاش فى بالها انه ساركوزي قايمه عليه الدنيا عشان جه مصر زياره مع السيكوسيكو وهو راجل سياسي مش جاي في مهمة رسمية... طبعا انا مكنتش اعرف وقتها مين ساركوزي اساسا بس عامة ماما عارفه كل الشخصيات السياسيه المعاصره فلما بتسالني علي حد عادة بيبقي يا ممثل يا مخرج يا مغني مشافتهمش قبل كده وساركوزي لا شكله ممثل ولا مغني يبقي اكيد مخرج... وعادة لما بتسالني علي فيلم ما ده اخراج مين بقولها فطين عبدالوهاب حتي لو فيلم اجنبي هيهيهيهي... اكيد بتهزأ بعدها -نياهاهاها- بس هعمل ايه بقي امي مابتقدرش تتحمل دعاباتي السمجه -هع هع هع-... المهم بقي اني برضه مش فاهمه الناس ليه متضايقه ان ساركوزى دخل مصر مع السيكوسيكو وبات معاها فى الأوتيل... هو بس أحب اسأل يعني هو عدم اللامؤاخذه السواح اللي فى بلدنا حد بيسأل اي سخس فيهم اللي معاك دي مراتك ولا السيكوسيكو؟؟؟ ولا هي يعني المزه في إيد ساركوزي عجبه!!!!!

"اقرأ ما يلي وستري ان كان الشيطان قادرا علي ايقاف هذا الامر"

هو ليه الناس دايما متخيله ان الشياطين هى اللى بتسيرنا؟؟؟ هم معندهمش فكره ان النفس البشريه ابشع الف مره من ابليس؟؟؟... ابليس بيغويك وانت تقول اه او لا... لكن اللى نفسه متسلطه عليه ده ملوش حل بقى غير معجزه من السماء... انا ضد المد الدينى المزيف اللى احنا عايشين فيه اليومين دول ده... عشان ده مش هيخلى الناس ترجع لدينها قد ما هيخلى الناس تطلع منه...

احساس زى الزفت انك تكتشف انك بقيت عديم القلب وماعدش عندك ادنى قدره على التعاط مع الآخرين!!!! هو انا بقيت زباله كده امتى!!

امبارح ياخويه... بفتح الميل بتاعى... ودى حاجه محصلتش من يجى اسبوعين... اتلاقى فى النص ميل بيقولى " لو انت مسلم ادخل"... معرفش ليه افتكرت جمله كنت بسمعها فى الخناقات وانا صغيره " لو كنت راجل من ضهر راجل انزلى وانا اربيك"... وطبعا اتقلتلت من الضحك ومادخلتش وانتهى الامر انى رميت الميل من غير مابص فيه عشان كنت كل اما ادخل اشوفه افطس من الضحك...