احسن درس اتعلمته من بابا ان الناس واطيه ولازم الواحد يمشى مأمِّن ضهره عشان الواحد مش عارف الناس بتضمر ليه ايه فى نفوسهم... نظرية المؤامرة مابتخيبش والنعمه... واحفرلى يا برنس ووسع الحفره عشان تبقى مقاسك... وعلى رأى المثل... امشى فى طريقك عدل يلبس عدوك فى الحيط... والنبى الحاجات دى بتسلِّى اجدع من اللب السودانى... تقعد انت افندى بتلعب اتارى وواحد قاعد يربيلك فى تعبان... يرميه عليك يتقلب بقدرة رب موسى لتعبان بلاستيك... تنظره عليه ينقلب حَنَش يلوش امّه... الضحك بقى انه بيروح يربيلك تعبان تانى!!! الناس مابتحرمّش هىهىهى... وادينا بنتسلى بغباء الآخرين هىهىهى... تلامذه والمصحف...

اكتشفت امبارح بمحض الصدفه ان محمد منير ابتسامته حلوه... ولو شوفتها على بوستر بالحجم الكبير استحاله مابتسمش حتى لو كان ميتلى ميت...

امبارح كان يوم مالوش اى تلاته لازمه فى تاريخ البشريه... لو كان امبارح ماحصلش -يعنى مثلا نمنا اول امبارح صحينا النهارده- حياة ناس كتير كانت هتبقى افضل... بس كان يبقى الخازوق بقى لو صحينا النهارده وحصل النهارده كل اللى حصل امبارح هىهىهىهى

ملحوظة: فى ناس مبتقدرش نعمة الصمت... للأسف

نفسى اعرف ليه معاد نزولى من البيت مش مرتبط بمعاد وصولى الشغل
بقالى 3 ايام بنزل فى 3 مواعيد مختلفه بين كل معاد والتانى نص ساعه وكل يوم بوصل 11 بالظبط!!!
دى مؤامره صهيونيه عشان يتخصملى من المرتب

قليل من الهدوء يرعبنى أحيانا... فلم اعتد على حياة بلا ضجيج ولا على إيقاعات الأيام الهادئة... لذلك فإن الأيام الهادئة تثير فزعى فى الأغلب وتجعلنى فى حالة ترقب لعاصفة وشيكة الهبوب فتبعثر ما لملمته فى أيام الهدوء... لذلك كففت عن ترتيب أى شىء منذ سنين طوال... فالعواصف كفيلة بافساد أى ترتيب مسبق للأشياء... بمرور الوقت اعتدت فوضى العواصف حتى صرت أفتقدها كلما غابت...

-----------------------------

كنت أشعر بإحباط شديد كلما رغبت بشدة فى صنع شيء ما ثم أكتشف غياب أحد مكوناته... إلى أن تجلى لى يوم مثل شعبى عتيق

(الموجود يِسِدّ)

فصرت لا أبحث عن مكونات ما ارغب فى صنعه بل انظر فيما بين يدى وأركِّب منه مايمكن... فصار فيستحيل الإحباط الممكن إلى بهجة خالصة لصنع شىء لم يكن فى الحسبان...
والى الآن لا زالت تدهشنى نتائج التنويعات المحتمله للمكونات مهما كانت محدوده... ومهما بدت غير متناسقة فان المتعه تنشأ من اكتشاف الصلات بين المكونات وخلق صلات جديده...

ليس لمن اعتاد غياب الفرح أن ييأس... فهو وحده... دون غيره... يعلم ان للفرح مواسم، مهما قصرت ستجىء... وللحزن فصول مهما طالت فسترحل...
وليس له أيضا ان يفاجأ بغياب احدهما او مقدم الآخر... فهو وحده... دون غيره... يعلم ان ليس للفرح مقدمات ولا للحزن اشارات... ولكنه... اكثر من غيره... لابد وان يكون قد اعتاد فترات السكون بينهما...
العادة... وحدها العادة... تقتل قسوة الأشياء... فكلما اعتدت على حزنك كلما خفت وطأته... فلا تيأس... فالمواسم مهما طالت او قست عليك... ستمضى كما جائت...
الفرح آت... حتما سيأتِ... مهما أطال الغياب... فلا تيأس...
اثبت... والَتَحِف بحزن مضى واحكم قبضتك على ذكرى فرح أتى... ورحل... وحتما سيعود... فلا تيأس... واثبت... حتى يتحطم الحزن على كتفيك...

يارب... هب لى مخلوق من سكر يعجن من احزانى حمائم بيضاء تحط على نافذتى... ثم تطير

تبرعوا لانكاذ عمو ساويريس

من كام يوم لقيت قال ايه خير اللهم اجعله خير مش عارفه كام سخس من المواكيس اللى فى ليستة وش الكتاب قال دخلوا الجروب بتاع مساندة ساويرس فقلت لا حول ولا قوة الا بالله الراجل ينكن جاله الله اكبر المرض الوحش - اللى هو المرض البطال وانت قارينى ياباشا - وبيلموله قرشين بس مهتميتش يعنى... بعدين قال خير اللهم اجعله خير مسكت المجله الكوميديه روزاليوسف -مسلية بشكل عنيف بتضحكنى اكتر من مجلة كاريكاتير بتاعة زمان الا هى راحت فين صحيح المجلة دى!!!- ولقيت فيها خبر بيقول الاخوان المسلمين مش عارفه مقدمين اسمالله على مقامك -افرح بيك كده وانت عريس- مقدمين ياخويه استجواب ولا ابصر ايه كده فى قعدة الشعب عشان يقفلوا اوه تى فى عشان قال اللهم احفظنا عملوا برنامج عن الحجاب وازاى ياخويه يسمحوا بكده والموكوس ساويريس مسيحى... انا قريت الكلمتين دول وركبنى العصبى... يعملوله جروب عالفيس بوك من ورايا ماشى ... ويقفلوله المحطه منغير مايخدوا رأيى معنديش مانع... لكن ياخويه يطلع مسيحى وانا معنديش خبر!!!! الموكوس ولا جابلى سيرة ابدا!!!
وانا قاعده بقرطف -غير بقطف- الميلوخيه -كنت عامله فضلة غيرك ملوخيه بالأنارب للعيال- خطر فى بالى الموضوع كده ومفهمتش يعنى بردك ايه العباره... هو كان يعنى ساويرس هو اللى عمل البرنامج بذات نفسه؟؟؟ ولا كان لامؤاخذه يعنى العيال اللى عملوا البرنامج ده غلطوا فى الحجاب لا سمح الله؟؟؟ يختى لو كات العيال غلت نربيهم ونقفل البرنامج الوحش ده ونخلص... بس لقيت يعنى فكره الابصر اسمه ايه الاستجواب ده يعنى فكره مش بطاله ابدا... فنفضت ايدى مالملوخيه... وسيبت الانارب عالنار... ولبست هدومى وطيران على قعدة الشعب انا كمان اقدم استجواب فى ماريا واستجواب فى روبى واستجواب فى هيفا وهبى عشان هيسقطوا الواد الحيله فى السنويه العامه السنه دى... قطعوا وقطعت سيرتهم نسوان سايبه عايزه حش رقابيها...

رباعيه حلمنتيشى

عود الحبيب اتصلب
واشتد عالهوايل
وفحضنى مال واتلوى
وقلبى انا مايل

-------------------
انا اتحدث العربية بطلاقه نياهاهاها

احذروااااااااا

لا اله الا الله... بالرغم من كل ده فأنا مبسوطه هىهىهىهى... يبدو انى اتهرشت فى مخى يا اما بقيت فلفسوسه زى ارسطو هىهىهى... اصل بجد مش بفهم يعنى ليه الناس يتتقهر عشان ناس تانيه طلعت واطيه... انا بتضايق اه وكل حاجه وبتعصب ودمى بيتحرق بس خلاص مجرد الانفعال الوقتى مابيروح الموضوع بينتهى... مينفعش يعنى اتعقد بقى والكلام ده عشان ناس تانيه طلعوا ولاد كلب ماهم اللى هيخشوا النار اتضايق انا ليه يعنى... والنبى مفيش حاجه تستاهل سدة النفس

اللى اخد منك الفيل... قادر يرجعهولك

نزله معويه... وماله... اتنصب عليا فى كبشة فلوس... شغال وماشى الحال... كله كويس... "لو يعلم الله فى قلوبكم خيرا يؤتكم خيرا مما أخذ منكم" وكله ف ميزان حسناتى بقى.. ماهو اصل انا مينفعش اخد كل حاجه يعنى... ومابحبش الحاجات اللى تيجى بالساهل... وعامة عيد ميلادى قرب، فاضل شهر وشويه وحاليا انا بستعد نفسيا لهذا اليوم المهيب فمعنديش استعداد اكتئب دلوقتى خالص بالذات انى ماقصرتش بشىء... ونظرا لان موضوع ال "سبا" انضرب بالجزمه عشان الفلوس اللى اتلهفت منى وفى الاغلب كمان مش هيبقى معايا فلوس اجيبلى هديه زى كل سنه... بس يمكن يجيلى غيرها قبل عيد ميلادى ربنا قادر على كل شىء... ولو مجاليش مش مهم برده... الخطط البديله دايما موجوده... يعنى نهار اما تزنق اوى يعنى هقضيها صعلكه فى الحسين طول اليوم وبالليل اقابل العيال واهى ساعة بقرب الحبيب ابرك من عشره... ويمكن يكون فى حفلة حلوه ولا حاجه فى اى داهيه احضرها واروح... مين عارف... يمكن اورث عمى اللى فى البرازيل واقضى عيد ميلادى فى دولة اوروبيه نياهاهاها... مع انى كنت عاشمانه فى كمبيوتر ابل.. بس يالله يمكن كنت اجيبه ويولع فى وشى واتقهر... كده افضل... الفلوس اللى كنت هجيبه بيها راحت ومتقهرتش... ومين عارف يمكن الناس ضميرها يصحى فجأه ويرجعولى فلوسى... هىهىهى جميل التفاؤل.... قال ضميرهم يصحى قال طب والله عجبتنى ييجى منى ههههههههههههه

ياست ازهاااااااااااااااار... ابعتيلنا تاكسى من على الناصيه... ولو فيات يكون احسن
--------
عبدالفتاح القصرى - شمشون ولبلب

وكمان هعمل بوليصه تأمين ضد التعرض للنصب من صحاب الشغل نيااههاهاا

انا خلاص عرفت السر
انا مكتوب على اورتى بلغة اهل الارض " شغلنى دلوقتى وادفع يوم القيامه" عشان كده كل اما بشتغل عندحد من سكان كوكب الارض بيلهف فلوسى ولا يدفعليش
والله ناس كويسين... كتر خيرهم

نفسى فى عقد ياسمين احطه جنبى على المخده... على قد ما دى امنيه بسيطه... على قد ما تحقيقها دلوقتى صعب جدا... عشان الساعه دلوقتى داخله على نص الليل واقرب مكان بيتباع فيه اعقاد ياسمين يبعد عنى ساعه ونص ومش هيبقى حد من بياعين الياسمين سهران لحد الوقت ده... ساعات كتير اوى بنندهش لما نطلب من ربنا حاجات بسيطه اوى وماتتحققش... ونتضايق اوى انها ماتحققتش... مع ان اسباب عدم تحقيق الطلب بيبقى بديهى جدا فى معظم الاحيان... بس رغبتنا فى الاشياء عادة مابتعمينا عن سبب حصولنا عليها او عدمه... ويمكن ساعات بتيجى بس متاخر ولاسباب فى الاغلب منطقية جدا بس بنكون احنا زهقنا ومشينا... انا مبطيقش استنى حد.. ولو حد ادانى معاد واتاخر خمس دقايق ببقى متعفرته... لكن ربنا مبيتأخرش... ولا بيقدم عن معاده... بيعمل الحاجه فى وقتها المظبوط... عشان كده لما بطلب حاجه من ربنا... مش بستناها... بكمل حياتى... وربنا بيبعتها فى الوقت الصح... يا اما مابيبعتهاش اطلاقا عشان ماليش خير فيها... ماتعطلش نفسك عشان حاجه عايزها... عشان لما ماتجيش ماتقعدش تندب حظك على العمر اللى ضيعته مستنى... كل ميسر لما خلق له... اسعى فى ايسر الطرق ادام مش حرام وربك هيسهلها لو تليقلك... واللى انت عايزه هيجرى وراك ولو فريت منه لو ليك نصيب فيه... بس اسعى... والباقى على الله...

لو أن للصبر ذراعان يحملانى!!!