بالأمس... حلمت بانه نبت لى فى باطن كفى الايسر فم... كان منمنما فى بداية الحلم، ثم اخذ يلتهمنى ويكبر حجمه كأنما يتغذى عليّ. ثم نبت لى فى باطن كفى الايمن عين كبيره تنفث نارا من بؤبؤها... كلما احرقتنى ازداد لهيبها اتساعا بينما لايزال الفم الذى نبت فى كفى الايسر يلتهمنى... وظل الحال هكذا حتى لم يتبقى منى سوى العين المحرقه والفم الملتهم اللذان اخذا يتصارعان... فالتهم الم العين التى لفظت آخر انفاسها المحرقه فى قلب الفلم فقتلته محترقا... وفى النهاية لم يتبقى منى شىء سوى حفنة من الرماد

ايام زمان لما كانت المزيكا بتتسمع علي اسطوانات الجرامافون كانت الاسطوانه لما بتتشرخ والإبرة بتقع في الشرخ كانت تفضل الحته المتسجله في منطقه الشرخ تشتغل باستمرار.. لووب يعني تخلص تعيد من الاول وانت وحظك كلمه او كلمتين... مع اني مش اسطوانة مزيكا مشروخه شغاله في جرامافون بس ساعات بعمل كده... الاقي كلمه او بالكتير كمتين من اغنيه معلقين في مخي وعماله اقولهم اخلصهم اعيد من الأول لحد اما حد ينقذني ويشيل الاسطوانة من الشرخ اللي في الذاكرة... دلوقتي بقت الأيام عامله زي يوم واحد وقعت ابرة الزمن في الشرخ بتاعه يخلص يعيد من الأول ومفيش حد بينقذني ويشيل الإبره من الشرخ

ليس بنبي فعهد الأنبياء انقضى... وليس بوليّ... لا يأتيه وحي ولا إلهام... هو فقط يملك قلبا ابيض وعيون طفولية... لذلك يجب ان تخشاه كثيرا... فأنت تعلم تمام العلم أنه لا يوجد ملائكة بين ظهراني سكان الأرض.... فضّل عليه متجهم الوجه عابس النظرات ذو العيون الخبيثة.... فيهوذا كان صبوح الوجه مليح القد بادي الطيبة وكوازيمودو كان ذو حدب بادي القبح

خناقات ازواج اليومين دول

الزوج: كل يوم بانجو كل يوم بانجو!!!
الزوجه: (بلوعة وحسرة وتضرع) ده حشيش افغانى من الاصلى يا حبيبى
الزوج: (وقد استشاط غضبا بقى اكتر من الاول) كل يوم افغانى كل يوم افغانى دى بقيت عيشة تقصر العمر

لولولللىىىىىىىىىىىى

اخونا سنابشوتس قفل التلعيقات... والله فرحتله جدا عشان التعليقات عنده كانت وصلت لنقطه مزريه مؤخرا وبهذه المناسبه اجاوب على التاج اللى حدفهولى

أحب شخص لقلبك فى الدنيا ؟
الناس عندى مقسومين 3 اقسام
احب شخص عندى فى الدنيا
ابغض شخص عندى فى الدنيا
ناس لسه معرفهمش


انسان مستعد تضحي بحياتك – ركز فى كلمة حياتك - عشانه؟
هو انا مفيش حد ممكن اضحى بحياتى عشانه لكن فى مواقف ممكن اضحى فيها بحياتى وممكن يكون نتيجة التضحيه دى ان حد تانى ميموتش بس فعلا مش هبقى بعمل كده فداءا لشخص تانى... الحكايه ببساطه انه مينفعش حد يموت بدل حد.. وعلى فكره حياتى مش ممتعه اوى عشان اتمسك بيها فاى حد عايزنى اضحى عشانه يدينى ميسد مش هتاخر



انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك ؟
هو عادة انا بوصل للمرحلة دى بدون كره حقيقى فمش قادره اتخيل لو كرهت حد لدرجة الجنون ممكن اعمل فيه ايه هىهىهى




ما هو اسم أجمل كتاب كتبه بشر قرأته ومحتفظ به حتى الان ؟ انت متعلق بيه وبتقرأه كل فترة ؟
مفيش كتاب محدد.. فى كتب كتير بقراها اكتر من مره ومش دايما بدافع الحب او الاعجاب.. لو فى روايه عملت تاثير فى حياتى فهى روايه قريتها وانا عندى 12 سنه تقريبا
mistress wilding
للكاتب رفايل ساباتينى... مش لانها رواية خارقه هى بس اوحتلى بفكره اتخذتها حلم لحياتى



اهم جهاز منزلى انت متعلق بيه او بتستخدمه كتير؟
مسعد (الكمبيوتر بتاعى)



شىء تحس بالراحة النفسية عندما تنظر اليه؟
الوشوش السمرا اللى مسام بشرتها ضيقه... جامع البنات من جوه، ده بالنسبالى زى المية المقدسه معرفش ليه بياخدنى من جوه فمين كده



مكان تحس فيه بالحنين الى شىء لا تدرى ماهو و ذكريات جارفة الى لاشىء؟
المتحف الاسلامى... المدافن بالذات لو مدافن ناس اعرفهم




اجمل مدينة زرتها داخل مصر؟
ربنا حليم ستار



أجمل مكان طبيعي رأيته داخل مصر؟
راس القرد فى حديكة الحيوان



شخصية كارتونية بتحبها؟
دونالد دك - كورتى البعبع (المارد وشوشنى من فيلم شركة المرعبين المحدوده) - موشو (التنين بتاع فيلم مولان)



نوع هاتفك المحمول؟
موبايلى ماركة زقّ واركب



سرعة بروسيسور جهازك؟
عيب عليك مسعد اكبر من الكلام ده كله!!!



حجم ذاكرة –هارد- جهازك؟
تشمانين (80)


المساحة التى تشغلها المواد الاسلامية على جهازك؟
اتنين متر مربع



نفس المساحة السالف ذكرها فى قلبك-الاجابة لنفسك عشان الرياء يا اخواننا-؟
هو انا قلبى مساكن شعبيه انا كمان؟؟؟ والا يكونش تبع بيتشو اميريكان سيتى هبيعه بالمتر؟؟



أهم هدف انت واضعه لحياتك دلوئتى؟
فيلم الانيماشن العظيم اللى نفسى اعمله قبل ماموت



مواصفات فتى الأحلام بالنسبة لك ؟
واحد يستحملنى واقدر استحمله منغير مانبقى متضررين اننا مستحملين



صف ما يأتى
شعورك لما بتسمع كلمة مصر ؟
شعور متخلف وغير مفهوم يعقبه ضحكة بلهاء



شعورك لما بتسمع كلام عن اليهود؟

رغبة عنيفة فى النعاس بالذات لو اللى بيكلمنى محموق اوى




شعورك لما بتشوف ظابط شرطة؟
قرف شديد مع تقلصات بالقولون وزيادة فى افراز الغده الدرقيه والجار كلويه وارتفاع نسبة الادرينالين فى الدم



لون البطانية اللى بتتغطى بيها فى الشتاء؟
حمرا هع هع هع



لون الجورب-الشراب- المفضل لديك؟
لون جوارب الحبيب زى اكل الزبيب



احساسك اذا داست قدمك فى الطريق على مخلفات اخراج حيوان- *** ولا مؤاخذة-؟
بحس كأنى كده خير اللهم اجعله خير كنت ماشيه ودوست فى مخلفات اخراج حيوان... هو ده شعور طبيعى ولا مفروض ابتدى اتعاطى مخدرات بقى؟؟




افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

واحد ماش فى الطريق وانا هاخد بالى من انه لابس
-جلابيه
- الجلابيه لونها ابيض
- الجلابيه قصيرة
- لابس عمامه
- مربى دقنه
- ومصحف فايده
دا كده انا ابقى ماشيه براقبه... وكل ده ماشى هنفرض انى دقيقه الملاحظ
السؤال اللى بيطرح نفسه بقى _ انا ازاى هشوف السواك اللى فى جيبه؟؟؟__




احساس يراودك فى اشارة مرور مغلقة بسبب مسئول كبير؟
بحس ياخواتى كانى كده ضربت باكو هولز عشر حبايات ورى بعض والبطاريق بتعدى تلطشنى على وشى كده كده كده



مين اكتر ست اشخاص بتحبهم ؟؟؟
ممممممممم ثؤال عويث
بس هجاوب على اساس انهم من صحابى بس ومش بلوجرز
- اميرة حسين عباس
- مروه نجيب
- رباب
- والدة آيات
- ابن اخويه



هل أنت سعيد ؟
فى المجمل بييس مقدرش اقول انى تعيسه... بتمرمط آه... تعيسه توء ماحصلش


لو اجتمعت مع حسنى مبارك فى مكان واحد هتعمل ايه ؟
هعمل زى الناس



لو معايا مليون ونص أعمل ايه ؟
شقة وعربيه وانتجلى فيلم كارتون قليل التكلفه ولو فضل فلوس هبقى ازرع ضرس بدل اللى خلعته



بتحب مصر ؟
مشعارفه لم اوضع فى اختبار يثبت او ينفى حبى لمصر.. يمكن يبان لو حد حاول يقنعنى اشتغل جاثوث



أنت مسلم ؟
الحمد لله



ليه ؟
المفروض بقى اقول كلام على طراز انا متجوز ماما تريز عن اقتناع؟؟؟
بسم الله الرحمن الرحيم.. الإجابه ان شاء الله... تونس



مين أكتر شخصية متقدرش تستغنى عنها ؟
مفيش حد لا يمكن الاستغناء عنه



ايه أكتر موقف محرج ؟
صعب اعدهم الصراحه ممكن اعد الموقف اللى مش محرجه ومش هفتكرهم... احم


الأمنية اللى اتمنى تحقيقها ؟
اخش الجنه ويبقى معايا كل الناس اللى بحبهم وبيحبونى



التاج بقى يتمرر لمين ؟
البت توته (الحياه او مايشبهها)
البت شوشو (شيماء دوت نيت)

quote i liked

privacy is so underrated

مصطفى الضبع.. بدون لقب

اصلى اعرفه من ايام اما كنت بقوله يا استاذ مش عارفه اقول د. مصطفى الضبع زى ما بيتقاله دلوقتى
الراجل ده من يوم ماعرفته وهو بيدينى امل فى الحياه خاصة وانى عرفته اول اما الدنيا ابتدت تقلب عليه وتفهمنى ايه يعنى دنيا... بس فعلا مبنساش ابدا كلامه عن مزبلة التاريخ :)
الراجل ده انا مديوناله بكتير... فعلا من الناس اللى اثرت فى حياتى بشكل قوى... لغاية دلوقتى كل اما احاول اكتب قصه قصيره افتكر الراجل ده... ناس كتير عايزينى انشر مجموعه قصصية او مجموعة نصوص... بس انا مش ناويه ارتكب الحماقه دى.. لانى ببساطه بفتخر بانى تتلمذت على ايد الراجل ده بشكل او بآخر ومعنديش استعداد انشر حاجه مقدرش اصدرها بشكر للراجل ده ويقراها وهو فخور انى كنت تلميذته
دايما بتسقط اخباره عشان اعرف وصل لحد فين.. لحد ما مؤخرا لقيت الموقع بتاعه على النت وقريت سيرته الذاتيه انبسط لدرجة ماعينى دمعت واتمليت امل.... الراجل ده بدا حياته كمدرس اعدادى... بعدين ثانوى... وفضل ورى حلمه... واخدت الدكتوراه واتعين فى الجامعه.. ومن هنا لهنا عمل حاجه... لسه فى امل فى الدنيا بجد
الحاجه الوحيده اللى طفت ابتسامى كان لما شوفته صورته... الشعر الابيض ابتدى ينتشر فى راسه ... هو انا عجزت اوى كده!!!!!!
--------------
البوست مفتوح للتعليق

لأنك انت انت فلن تفعل شىء... ولاننى انا انا فلن افقد شىء... ولاننا نحن ولسنا آخرون سوانا فلن يحدث شىء... سنظل هكذا جنبا الى جنب ولكننا بالرغم من ذلك ابدا لن نلتقى

الانسان بطبعه واطى وعينه فارغه.. او ل ما بتتولد اهلك بيربوك -على الاقل بيحاولوا- وما التربيه الا مجرد محاوله -فى الاغلب بتفشل- لمنعك من الاتصال مع فطرتك الواطيه -هى الاقوى من فطرتك الطيبه فى الاغلب- ولو فلشوا، العالم كله بيلومك على فشلهم عشان انت طلعت واطى... ولو نجحوا، بتفضل انت طول عمرك تلومهم عشان مطلعوكش واطى

بيقولك لما تلاقى نفسك هتغضب عد واحد اتنين تلاته لحد عشره... بس الحقيقه ده مبيفشش الغضب خالص بالنسبالى.. هيبقى موقف كوميدى جدا وانا بعد من واحد لعشره وعينى بتطق شرار ومميله بكتفى لقدام فى وضع متحفز للغايه... بس مينفعش برده تفضل تحرق فى دمك... وبما انى بنى ادمه غاويه شفرات من وانا صغيره... عشان كده كان نفسى اطلع جاسوس لا لشىء سوى انى استخدم شفره سريه... فلقيت حل ظريف جدا.... عشان الترقيم ينفع معاك اختار عشر شتايم بتحبهم ورقمهم... ولما حد يغيظك وتبقى على وشك تتعصب ماتشتموش وتاخد سيئات قوله واحد اتنين تلاته عشره عشره عشراااااااااااااه... هتلاقى نفسك فشيت خالص ويمكن قعدت تضحك كمان على فكرة ان الارقام البريئه دي ماهى الا ستارة كثيفه لمجموعه من الشتايم الغير بريئة بالمره

وانا بكتب البوست اللى فات دخلى فرقع لوز من الشباك... ياااااه بقالى زمان اوى مامسكتش فرقع لوز... مستخبى منى ورا المرايه اللى على الحيطا... مخاصمنى يمكن؟؟؟ اكيد حد قاله انى لما طنت صغيره مسكت صرصار بحسبه فرقع لوز.. ولما صحابى تحدونى انه صرصار دوست عليه انهرس... ومن ساعتها وانا مبشوفش فرقع لوزات تانى... وحشنى اوى الفرقع لوز... شكله كده جه عشان ينام... هو ينفع يعيش معايا فى الاوده اناوالزحلفه فى الاوده بتاعتنا؟؟؟

تهييس بسبب شمة من عقد فل

على صفحة بيضا رسمنى ورده.. ومشى... قالى هغيب فى كفك سنين... اصل فى كفك ده الدنيا بتبتدى، وفى التانى انا بنتهى.
الورده،على الورقه البيضه لوحدها... وفـ حلقها طعم الدموع... اصل الشوق... ملى سطور الورقه كلها، والورده لسه لوحدها... فى قلب صفحة الشوق خربها وخلاها بور...
عدت شهور والوردة لسه لوحدها بين السطور... مشتاقه لننى عينه يقع عليها... للمسة من حبر قلمه تسقيها.. او يرسملها غيمه... وشمس... وهوا... وبنت حلوة تعدى، تقطفها من قلب الجنينه... وتزرعها جنب قلبه... فى عروة جاكتة بدلته السودا يوم الفرح

في حاجات في الدنيا بتبقي عايزها واول ماتجيلك بتتمني انها مكنتش جاتلك... زي كده جزمه عجبتك اوي واشتريتها واول مالبستها بهدلت رجلك وبقيت لا عارف تلبسها ولا تلبس غيرها عشان اي حاجه بتلبسها بتيجي علي التعويره اللي عملتها الجزمه

نقطة الصفر مرهقة نفسيا اكتر من خط النهاية

من اقوال النبي عيسى

- لو أن لابن آدم من اليقين قدر شعيره مشى على الماء
- لا يصيب أحد حقيقة الإيمان حتى لا يبالى من أكل الدنيا
- فكرت في الخلق فوجدت من لم يخلق أغبط عندي ممن خلق
- كما ترك لكم الملوك الحكمة فكذلك فاتركوا لهم الدنيا
- كلوا خبز الشعير واشربوا الماء القراح واخرجوا من الدنيا سالمين آمنين، بحق ما أقول لكم إن حلاوة الدنيا مرارة الآخرة، وإن مرارة الدنيا حلاوة الآخرة، وإن عباد الله ليسوا بالمتنعمين، بحق ما أقول لكم إن شركم عالم يؤثر هواه علي علمه يود أن الناس كلهم مثله
- اعبروا الدنيا ولا تعمروها
- حب الدنيا رأس كل خطيئة، والنظر يزرع في القلب الشهوة (ورب شهوة أورثت اهلها حزنا طويلا)
- يابن آدم الضعيف: اتق الله حيثما كنت، وكن في الدنيا ضيفا، واتخذ المساجد بيتا وعلم عينيك البكاء وجسدك الصبر وقلبك التفكر، ولا تفكر برزق غد فانها خطيئة
- كما أنه لا يستطيع أحدكم أن يتخذ علي موج البحر دارا فلا يتخذ الدنيا قرارا
- لا يستقيم حب الدنيا وحب الآخرة في قلب مؤمن كما لا يستقيم الماء والنار في إناء
- طالب الدنيا مثل شارب ماء البحر، كلما ازداد شربا ازداد عطشا حتي يقتله
- إن الشيطان مع الدنيا ومكره مع المال وتزيينه مع الهوى واستمكانه عند الشهوات
- طوبى لمن بكي من ذكر خطيئته وحفظ لسانه ووسعه بيته
- طوبي لعين نامت ولم تحدث نفسها بالمعصية وانتبهت علي غير إثم
- لا تكثروا الحديث بغير ذكر الله فتقسوا قلوبكم فإن القلب القاسي بعيد من الله ولكن لا تعلمون، ولا تنظروا في ذنوب العباد كأنكم أرباب وانظروا فيها كأنكم عبيد، فإنما الناس رجلان معافي ومبتلي فارحموا أهل البلاء واحمدوا الله علي العافية
- من طلب الفردوس فخبز الشعير والنوم علي المزابل مع الكلاب لقليل في طلب الفردوس
- لا خير في علم لا يعبر معك الوادي ويعبر بك النادى
- يامعشر الحواريين لا تحدثوا بالحكمة غير اهلهافتظلموها ولا تمنعوها عن أهلها فتظلموهم، والأمور ثلاثة: أمر تبين رشده فاتبعوه وأمر تبين غيه فاجتنبوه، وأمر اختلف عليكم فيه فردوا علمه إلي الله عز وجل
- لا تطرحوا اللؤلؤ للخنزير فإن الخنزير لا يصنع باللؤلؤ شيئا، ولا تعطوا الحكمة من لا يريدها فإن الحكمة خير من اللؤلؤ ومن لا يريدها شر من الخنزير

---------
نقلا عن قصص الأنبياء إمام بن الحافظ بن كثير

الحرامي اعترف

الحرامي اعترف
https://www.blogger.com/comment.g?blogID=17191131&postID=7901070360397764234&isPopup=true
اقروا اخر تعليق ليه عند زرياب اسمحولي برده هحطهم احسن يشم خبر ويخش يحذف التعليق قبل ماتقروه
""""""

Vampire said...

أديني يا عم حذفت الكلمتين اللي تاعبينك من البروفايل ، هدي نفسك شوية كده و ما تشغلش بالك
ناس و مش عاجبهم حاجتهم و شالوها لأنها أكييد ما عادتش لزماهم ، فتلزم حد غيرهم
بلاش تتعب نفسك بقى و تنط لي كل شوية
و انت مش هاتكون أحن عليهم من نفسهم يعني


""""""""
اهو اعترف 12:42 PM

غالى والطلب رخيص

ده مسروق من غادة سامحونى

"التوقيت، هو الفيصل

فحتى لو كنت تملك خططاً كبيرة ل...
التوقيت، هو الفيصل

فحتى لو كنت تملك خططاً كبيرة للحظة القفز منذ دهر، وجبنت في تلك اللحظة المناسبة بالذات، فإن كل ما تملك يصبح رماداً في غمضة عين

..........الخ"
نظرا لان غاده قفلت البلوج هتلاقيه هنا
http://sam7oni.blogspot.com/atom.xml

فى الاتوم فييد

https://www.blogger.com/comment.g?blogID=2557101696346615742&postID=4587124004677877792 وده الحرامى

للاسف بوستات جيفارا وعوليس مالهمش روابط اقدر احطها لان بوستاتهم اتمسحت تماما

اكره الوداعات لاننى اكره الوحدة.. واكره الوحدة لاننى اكره الخوف... واكره الخوف لاننى اكره الضعف.. واكره الضعف لاننى اكره ان اتذكر اننى انثى...
ما ذهب لا يعود.. وان عاد لن يجدنى.. وان وجدنى لا اكن انا التى خلفها قبل ان يرحل.. وانما اكن انا مضافا الى عشرة اسوار وسبعة حصون تقينى وحدة الوداع التالى...
الوداع.. يشعل فى قلبى كرة من نار.. تلتهمنى من الداخل.. لا احد يراها ولا حتى انا.. وتظل تكوينى حتى تصاب اعصابى بالخدر فلا اعد اشعر بشىء... والخدر يفقدنى السيطرة على جسدى... وفقدان السيطرة يصيبنى بالغضب.. والغضب يولد المزيد من الكره الغير محدد الاتجاه
لذلك لا تندهش اذا صفعت احدهم فى لحظة وداع بدلا من تقبيل السماء بين عينيه

تستبق الدموع الى مآقىّ من فرط اللاشىء.. فأبتسم فى سخرية.. فاللاشىء لم يعد محايد... فربما الآن اللاشىء قد صار تعريف مبهم للغياب.. وربما ايضا قد اصبح اللا احد هو كل من سواك

بعينى خيالى كنت دوما ارانى افكر برأس مائل قليلا الى اليمين... كان هذا قبل اعوام طوال.. اما اليوم.. في عينى مخيلتى.. قد صار رأسى مائلا الى الأمام يرقد بين كفى وله ملمس يشبه الحريق

اذا اردت ان تبدو كضحية لا ينبغِ ان تكن مظلوما بالفعل... فقط اجبر الآخرين على التصرف كالوحوش

امسك حرامىىىىىىىى

لينك الحرامى

هذا الشخص بمنتهى الوقاحه والتبجح واخد بوستات قديمه من مدونة القطط العمياء لصاحبها جيفارا وبلوج عوليس وبلوج تياترو صاحب السعاده وبلوج غاده مع نفسى وعاملهم فى مدونه على انهم كتاباته الخاصه ولما اتهزا راح عامل كومينت موديريشن عشان ماى تعليق مش عاجبه يقوم مينزلوش اساسا ياريت اكبر قدر ممكن ينشر البوست ده عنده عشان الحرامى ده ممكن ياخد كلام اى حد فينا ويحطه على انه كتابته... يمكن كتاباتنا ماهياش اعمال ادبيه خالده بس فى الاخر كل واحد كتب حاجه من حقه انها ماتنسبش لغيره مهما كانت ضئيلة القيمه.....

-------------
البوست مفتوح للتعليق

انا مالبلد دي... دي ارض ابويا وجد جد

طول عمري عارفه اني مواطنه مصريه صميمه قلبا وقالبا عشان في تمثال شبهي في المتحف المصري وكمان ملامح اهلي مصريه صميمه وحتي لوني قمحي لون خيرك يا مصر... ودلوقتي... الوطن اعترف بيه كقطعه من ارضه... نلت الشهاده السامية يوم الخميس وانا مروحه.... كنت معديه قدام دار الدفاع الجوي وانا كلي فخر واعزاز بالشبشب الاحمر ابو صباع (صنع في الصين علي فكره احنا ناس مرفهه لسه هنصنع شباشب!!! مش مقامنا شباشب احنا) وبابا حسني كان رايح هناك (تقريبا كان عنده فرح حد معرفه) وقالوا لاحد خدام الوطن يرش ارصفة الوطن من اول رصيف الوطن اللي قدام بيت خادم الوطن الأعظم ولحد رصيف الوطن اللي قدام دار الدافع الجوي... وتراب الوطن كمان اللي قدام ارصفة الوطن المعنيه واسفلت شوارع الوطن اللي تحت تراب االوطن الي قدام ارصفة الوطن المذكوره آنفه... المهم بقي قوم ايه، خادم الوطن الموكل اليه مهمة رش الأشياء السالف ذكرها وهو بيرش بكل ذمة وافتخار (طبعا حبا في الوطن) ارصفة الوطن وتراب الوطن (يرشه احسن مايسفّه) واسفلت شوارع الوطن رشني معاهم باعتباري قطعة من ارض الوطن... عشان انا من تراب الوطن... ولوني بقي لون اسفلت الوطن من هباب مصانع الوطن وعوادم سيارات مواطني الوطن...
وعليه... وللاسباب الموضحه اعلاه قد نلت الشهادة الساميه ودلوقتي اقدر اغني بنفس... انا مالبلد ديييييييييييي... انا مالبلد ديييي.... دي ارض ابوياااا وجد جدييييي... دي ارض ابويا وولادي بعديييي (ده اذا مكنتش لسه قطعت الخلف بفعل ملوثات هواء وماء وغذاء الوطن)..... واطلع لساني لاي سخس ماترشش واسال بكل ثقه وتبجّح وصفاقة الفخووور... ماطفحتش من نيلها؟؟؟؟ ماتسممتش ببطيخها (طرح السنه اللي فاتت كان بيجيب نزلة معويه)؟؟؟؟؟... ماتهببتش بعوادم سياراتها؟؟؟..... ماترشيتش بمية مجاريها؟؟؟... ماسففوفكش ترابها في شوارعها وحواريهااااا؟؟؟؟؟
تبقي ميش من موستاوايااااااا

شىء بايخ جدا ان مايبقاش ليك مزاج تنام مع انك عايز تنام... وتبقى مش عايز تاكل وانت هتموت من الجوع.. وبالذات لو مفيش سبب مثلا انك بتعمل كده من باب تهذيب النفس او من باب السخافة على الذات.. فى الاغلب بيبقى زهق.. وفى واحد حكيم قال ان الزهق غضب وخوف بنسب متفاوته تختلف من شخص لآخر... اعرف عدوك هتلاقى انك عدو نفسك

الدنيا مبقتش قرية صغيره... الدنيا باللى فيها بقت مزنوقه فى صفحتين تلاته على شاشة كمبيوتر.. وسكرول داون يا مان على كام دوسة على زرار نيييييكست توصل آخر الكوكب... معدش فى مكان لحاجه تانى... الناس و الحاجات قربت تبظبظ من الشاشه

كل شىء موجود اونلاين بس اللى يدور... اكتشفت ان عمايل برفان بريحة الياسمين شىء سهل جدا مش محتاج اكتر من مشوار صغنن لحد الحسين وقزازة كحول من الصيدليه وشوية مية مقطرة... وكمان هعمل صابون بريحةا لياسمين بامر الله.. الموضوع طلع سهل وبسييييييط.... مشعارفه ليه بتوع البرفانات المضروبه اللى ماليين البلد مبيحاولوش يعملوا برفانات بتاعتهم بدل المضروبه... الناس بقت غاويه تقليد معدش حد عايز يفكر.. بقينا ولا تنابلة السلطان.. فى الاغلب النظام التعليمى هو اللى عودنا على كده واهالينا كمان.. احفظ صم احفظ صم واسمع الكلام... ماحدش علمك تسال ولا تفكر.. فقط اسمع وطع وصمممممم