لم تعد الاشياء كما كانت لأنك لم تعد كما كنت.. لأيام الاسبوع نفس الاسماء.. لا تتغير - الا ان كنت من مواطنى ليبيا- واسماء الشهور لم تتغير من قرون... والسنون.. عداد.. يكرر نفس الارقام.. ولكنك لا تلحظ ذلك.. فأصابع قدميك تلهيك عن ملاحظة رتابة التكرر.. ربما يوما -عندما تكبر- قليلا ستلحظ ان هناك اشياء تقبع امام اطول اصابع قدميك.. تلامسه أو تكاد

سجحة

- السجحة.. جرح سطحي يقتلع فيها الجزء من الجلد تاركا منطقة ناعمة ومحتقنة ومحمرة

---------------------------

think out of the box
و انسى كل اللى اتعلمتيه فى الكليه عشان الغلط احيانا بيبقى قمة الصح
* الغضب المقدس دوما يعطينى قدرة على تحمل مثل هذه الترهات.. اصمت... واحملق مليا فى شاشه الحاسوب فتحملق فى وجهى الغاضب بنفس الهدوء.. واتذكر الامام الشافعى "لو حاجنى الف عالم لغلبتهم ولو حاجنى جاهل واحد لغلبنى" فأحجم عن النقاش وامسك عن كل ما اردت قوله.. فما الفائده من مخاطبة من لا يسمع وان سمع لما وعى.. والمأساة انه على جانب من الحق.. ففى هذا الزمن صاروا يهدوا المكذنبين اوسمة الكرامه..
وصيتى الاولى.. الصمت عند الغضب

---------------------------

الناس بتشتغل عشان الفلوس اولا بعدين يجى النجاح فى المرتبه التانيه
* اذكر آمالا لم تزل تداعب خيالى وطرق يجب ان اعدوها... عذرا.. ففى عدوى لا يسعنى التوقف لتأمل كلماتك.. فلتسعى لما تسعى ولأسعى لما أسعى ففى النهاية انا سعيك نحو احلامك وانت .. فى الاغلب... احدهم.. ربما اشير اليك فى مذكراتى يوما... مذكراتى التى سيكون مصيرها فى الاغلب البالوعة... وصيتى الثانية.. الصمت ايضا

---------------------------

انظر الى طرف حذائى الذى صاحبنى فى الليالى المطيرة اللتى بللتنا سويا.. ارتفع قليلا ببصرى لأرى منطقة يصير فيها لون القماش داكنا قليلا.. فوق الركبة تماما.. تلطخت يوم انزلقت.. انزلقت من الوقوف... من الثبات انزلقت.. سقطت ركبتى فى الجزء الوحيد الغير مبلل من الاسفلت الممدود امامى.. فتلطخ القماش وانسجحت ركبتى.. الى الان لا ارغب فى ازالة تلك اللطخه.. فهى تذكرنى بالسجحة التى كانت وباللطخه... وصيتى الثالثة... ان تسجح كرامتك خيرا من ان يلطخ ضميرك.. فاثبت مادمت على الحق.. واغضب للحق

---------------------------

وصيتى الرابعة... لا تمضِ قدما فى اجترار ماسمعته من كلمات فارغة من اى مضمون يستسيغه عقلك.. وابتسم.. بعد ان تغضب...

يستيقظ من نومه بعينين منتفختين لأسباب يظن انها تتعلق بأحلامه فى الليلة الماضية.. وهذا ايضا مايعلل به وجود بعض الكدمات الزرقاء فى انحاء متفرقه من جسده.. فلا احد يجروء على صفعة سوى فى احلامه.. اما من يصفعونه كل يوم فى كل مكان يصفعونه صفعات وهمية لا تترك اثارا على جسده... وصفعات الاحلام هى التى تعطيه القدرة عل تحمل كل شىء... فهى دوما حقيقية اكثر من الصفعات التى تأتيه خلال يومه.. لذلك.. عندما توقفت تلك الاحلام فقد كل قدرة على تحمل الصفعات الوهمية.. وعندما افتقد الكدمات الزرقاء نما فى داخله حس عدائى صار يكبر كل يوم حتى لم يعد يستطع احتوائه.. فذهبت عنه طبيعته الهادئه وصار مشاكسا.. لكنه لم يتخل عن صمته المعهود.. لكن نظراته اصبحت اكثر حدا ونفاذا.. فاينما ذهب اخذ يحملق فى وجوه الموجودين لعله يجد بينهم وجه لشخص قد صفعه فى احلامه، ولكنه لم يجد اى منهم.. فانطوى على نفسه وانعزل عن الناس وتفرغ للدعاء فى الليل والبكاء فى النهار، ظنا منه ان الله يعاقبه على شىء لا يعلمه فأكثر من الدعاء والاستغفار لعل الله يرضى عنه ويعيد اليه احلامه.... فلما آيس من كل شىء، قرر الانتحار.. وذهب لينام لعله يحلم حلما اخيرا قبل ان يفارق الحياة لعالم لا احلام فيه كعالمه هذا
فى منامه الاخير اتاه احد رفقاء الحلم الذين كانوا يتناوبون صفعه ولكمه ليلة بعد ليلة فسأله عن طول الغياب.. فأجابه صديق الحلم بانه يوما كان مثله يتلقى الصفعات الوهمية الى ان توفاه الله فصار يصفع الاخرين فى احلامهم.. ولأن كل صافعيه الاخرين مثله فقد قرروا جميعا ان يختاروا شخصا اخر بعد ان آيسوا من انه سيرد لأيهم الصفعة فى حلم ما.. فهم لا يكونوا يأتوه ليعذبوه، وانما فقط اتوه ليستمتعوا بتبادل الصفعات... وبشره بانه عندنا ينتقل الى عالمهم سينضم اليهم فى مهمتهم الخالدة

MOJO رزعتنى تاج بتاع الخمسه اسرار المريعه فى حياتى.. مشعارفه انا ايه الجرس اللى بالكيلو دى!!!

طيب اول حاجه
انا كنت بمشى على الحيطه وانا صغيره ومش عايزين طولة لسان.... كنت بحط رجليه على حلق الباب ومنه الى الطرقه اللى بعرض الباب تقريبا واخدها رايح جاى وبعدين اقفز قال يعنى بطير .. عادى يعنى عيله وبتاع

تانى حاجه
انا اكلت دراع واحد كان معايا فى ابتدائى... وانا فى سنه خامس ابتدائى كان معاي واحد فى الفصل اسمه مدحت.. مكنش شاطر بس مكنش بليد كان بونو يعنى بينجح بس منغير مجموع وكان بيغيظنى.. وحذرته اكتر من مره انه لو غاظنى تانى هعضه.. اديته انذار والتانى والتالت بقى كان صبرى نفد كنا فى يوم اجازه ورايحين المدرسه بنتدرب فى فريق الموسيقى عشان المسابقه قربت وهو كان معاه عجله.. طلعت اجرى وراه وقفزت عليه جيبته هو العجله على الارض وركبت فوقيه وقرمته من دراعه لحد ما الدم نشع من فوق الهدوم مدريتش غير وبقية العيال اللى معانا فى الفريق جم على صوت صريخه وجم يشيلونى من فوقيه.... ومن يومها عرفت انى بلاش اغضب عشان الادرينالين وحش... احم..

تالت حاجه
انا شخصيه دمويه جدا ولو مكنش القتل حرام انا كان زمانى بقنى سفاحه على سبيل تزجية وقت الفراغ بس سفاحه زى تيد باندى كده مش زى السفاح السكه بتاع المعادى

رابع حاجه
وانا صغيره كان نفسى اطلع سواق مكروباص او حلاق رجالى

خامس حاجه
مفيش مره مكان دخلته اكتر من مره الا اما اضطريت اخش الحمام الرجالى اللى فيه بدل حمام البنات

ولبست تاج من الحاج كريم عمر
يالله الامر لله
ايه اللي هيحصل لإيميلك لما تموت ؟
هيشحت فى الشوارع

اديت الباس وورد لحد قبل كده ؟
ايوه... صاحب الشغل اللى انا فيه عشان معندناش نت فى الشغل وكان جايلى حاجات على المايل تبع الشغل فاديته الباسورد يخش ياخدها من البيت وينزلها على فلاشايه عشان فلاشايتى متقلبه وحسبى الله ونع الوكيل فى اللى ضربوا عليها منى

اسمك ؟
المخفيه (على راى امى) هع هع هع

اسم الدلع المشهور وسط اصحابك ؟
كتشير اوى.. مفيش انتين تقريبا بيندهولى بنفس الاسم ولا عدش حد بيندهلى باسمى الحكيكي بتاع البتاكه بس اللى ماشى فالسوق اليومين دول " أم زيزا"

عمرك ؟
26

برجك ؟
الجردل

مجال دراستك ؟
فنون تطبيقيه تخصص جرافيك

شخصيتك نوعها إيه ؟
عروستى

السفر بالنسبه لك ؟
احلى حاجه فى الدنيا.. احب عيشة الغجر.. لو عليه اسرح بعجله فى بلاد الله اعيش على الجمع والالتقاط والرسم

المود بتاعك ؟
زفت الزفت الحمد لله الحقيقه بمر بمنعتف فزيع جدا فى حياتشى (كالمعتاد يعنى انا احيا على الحافه يالله خير)

وقت فراغك بتعمل فيه ايه ؟
حد بس يناولنى وقت فراغ وانا اسوى الهوايل

الأكلة المفضلة ؟
الشوربه والمكرونه والحمام والممبااااااااااااار والمحشى ولبسله بالجزر والفاصوليا الخضرا. هو انا بس محبش القرنبيط والقلقاس والكوسه والجبن باكل الرومى منها فقط.. بقية الحاجات بقى اللى كلتها غير دول يعتبروا اكلتى المفضله ماعدا الفاصوليا البيضا اكلها بس مطلبهاش

الصفات اللي خدتها من بابا ؟
العصبيه.. الدهاء .. غضبى بيفش بسرعه بس عند القفش ببقى مأساه.. القدره على قلب الترابيزه على اللى قدامى لو ليه مزاج

الصفات اللي خدتها من ماما ؟
للاسف انا امى بس على صغير الفرق انى انا قليلة الادب ولسانى طويل وبالى طويل عن امى وعشريه حبتين

اكتر 6 حاجات بتكرهها ؟
-الكدب

-الغباء

- الجاهل المتعافى

-المتنكين على مخاليق ربنا

-الشخصيات الخنوعه اللى لابسين جلد النعجه وعايشين بيه ومش راضيين يقلعوه ابدا

- الناس الكئيبه اللى طول النهار تشتكى من ان الناس جايه عليهم مع ان الحقيقه انهم شوية كسالى

أكتر 6 حاجات بتحبها ؟
-اسدكائى

- الشغل ثم الشغل ثم الشغل

-المزيكا

-القرايه

-الرقص

-تشغيل النافوخ

الشغل بالنسبه لك ؟
هو بابا وهو ماما وهو انور وجدى.. انا الشغل والشغل انا.. والحياه الشغل والشغل الحياه

ايه الكمبيوتر والانترنت بالنسبة لك ؟
اهو شغل على تسالى

خدمه منكم ليه :)

لقيت الاسئله دى بالصدفه النهارده عند واحد بيعمل استفتاء على نفسه تقريبا هىهىهى فقلت اقلده فكره مش بطاله الحقيقه.. بتساعد الواحد يعرف الناس شايفينه ازاى بالذات الناس اللى بتخش تقرأ وتمشى.. طبعا كان فى اسئله مسحتها واسئله انا زودتها.. ماتطنشوش بقى :)
اختبار عجبنى الحقيقه :)
ياريت تجاوبوا على الاسئله وتبعتولى الاجابات على المايل ده
bezret.eldor@gmail.com

1. Who are you?
2. Are we friends?
3. Give me a nickname and explain why you picked it.
4. Describe me in one word.
5. What was your first impression about me?
6. Do you still think that way about me now?
7. What reminds you of me?
8. If you could give me anything what would it be?
9. How well do you think you know me?
10. Ever wanted to tell me something but couldn't?
11. Do you think i will be successful in life? (dont forget to mention the reasons)
12. Name 10 thins you hate about me and 10 more things you love about me (or my blog)
13. How long have you been following my blog? (if you do.. tell me why)
14- What do you think of my blog?( dont forget to mention the reasons)

احنا بتوع التيموتيكى

وانا اصغر شويه.. كنت بقعد بالسعات ابحلق لنفسى فى المرايه عشان كنت بحب اوى اشوف نفسى وانا مبتسمه.. كنت مبسوطه.. بايه؟؟ معرفش.. بس كنت مبسوطه مع انى وقتها كنت مقتنعه تماما انى قبيحه الشكل.. دلوقتى بقيت بستخبى من المرايات.. عشان مبقيتش ببتسم..
الرسول عليه الصلاه والسلام قال "تبسمك فى وجه اخيك صدقه"... زمان مكنتش بفهم ليه.. عشان وقتها الابتسامه مكنتش بالنسبالى اختراع....دلوقتى لو ابتسمت فى وش حد بحس انى هخش الجنه حدف.. اصل شكلى بيخض اوى وانا مكشره.. بيخض لدرجه انى انا نفسى مبقيتش اطيق ابص فى وشى فى المرايه.. اصلى مش ناقصه نكد الحقيقه... زهقت من الابتسامه اللى بتطلع وتختفى كانى بدوس على زرار.. ساعات بعد ماببتسم بسخسخ من الضحك عشان بفتكر عادل امام وهو بيقول تيموتيكى تيموتيكى.. الناس مابتبقاش فاهمه انا بضحك ليه... وده احيانا بيخلينى اضحك زياده.. بالذات اما بيفتكروا انى بضحك عشان دمهم خفيف مع انى ساعات ببقى بضحك من كتر تقل دمهم اللى خلانى ابتسم ابتسامه تيموتيكى تيموتيكى

الى كل عشاق البسبوسه انا مش بدوده.. حلوا عن قفايا

شىء بغيض ان حد يتذاكى عليك وشىء ابغض ان حد يستضعفك ويستتخن نفسه فى حين انك لو قلبت وشك بس هيجيله اسهال من الخضه... وشىء بقى قد يسبب الموت باسفيكسيا الخنق ان حد يحاول يخترق حياتك بالدراع.. وشىء قد يصيب الآخرين بجروح وكسور وحروق من الدرجه التالته لو حاول احدهم ان ينتهك خصوصيتى....