مالكش دعوه عمل بوست عجبنى فقلت اقتبسه البوست عن احلى حاجات حصلتله فى 2006 وبيديهم اوسكار حياته

أحلى صوره
صوره اتصورتها فى الازهر بارك شكلها زى ماكون متصوره فى عزبة جدو الباشا.. من الصور القيقليه اللى ببان فيها شبه البنى ادمين مش شبه الخنفسه

أحلى بوسه
لما الواد بن اخويه باسنى فى ركبتى عشان يصالحنى لما قلتله انى زعلانه منه.. خرشم فؤادى المجرم

أحلى كدبه
لما اطلب حاجه من حد ويقولى ماجباهاش ويطلع جابها بس بيزاولنى.. دى عملة سوده العيال الجز صحابى بيعملوها فيه كتير عااااااااااا

أحلى فيلم
the constant gardener

أحلى أغنية
ولو انها مش معمله فى الفين وسته بس هى أغنية العام بالنسبالى... عندى سئه فيك بتاعه الست فويروز

أحلى ورطة
لما حد يتكلم عنى كويس وانا موجوده.. ببقى فى نص هدومى وبقول يا ارض انشقى وابلعينى.. بس اكيد ببقى مبسوطه نيهاهاهاها

أحلى مدونه قريتها
فانتازيا

أحلى صاحب كسبته فى 2006
ناديه

أحلى موقف رجوله
لما امى قالتلى اشترى خيط عشان تعملى شراب صوف عشان الل عندى اتخرم احم احم

أحلى كتاب قريته
survivor by chuck palahniuk

أحلى حاجه عملتها
انى اخيرا اخدت كورس الماكس

أحلى حاجه حصلتلى
انى اكتشفت ان المشكله اللى كانت عند فى الفك ليها علاج هيييييييييييييييييييييييييييييييييييييييييييه

أحلى حاجه اتعلمتها
شغل الاسكوبيدو.. اتعلمت اعمل بيه عرايس وحاجات تانيه غير الغرز العتيقه اللى كنا بنعملها زمان

احلى حاجه اشتريتها
جيبة الغجر اللى مهياش شبه جيبات بنات الغجر بس بحس انها شبه جيبات الغجر


أحلى كلمه اتقالتلى
ماما: سلمى بنت واحده من صحابى الانتيخ مابتقولي غير ماما
بِتو: لما بن اخويه بيندهلى بيقولى بِتو اللى هى المفروض عمتو

الفقير فى البلد دى يعمل ايه يا ناس!!!!!

كان ياما كان فى سالف العصر والاوان جالى استبحس فى بقى.. والدكتور وصفلى تركيبه اركبها فى سنانى واعمل علاج طبيعى... التركيبه ب 500 جنيه مع انها مابتكلفوش من المعمل اللى بعملها عنده اكتر من 100 جنيه وهى واقفه على المعمل اساسا ب5 جنيه بالكتير لانها بلاستيك.. وجلسات العلاج الطبيعى الجلسه 70 جنيه 3 مرات فىالاسبوع لمده غير معلومه حاليا... لو فرضنا ان واحده تانيه غيرى هى اللى جالها استبحس فى بقها وممعاهاش الفلوس دى كانت هتعمل ايه!!!!..........
اما لو جينا بقى للاسعار المبالغ فيها فهى كالتالى.. التركيبه ام 100 جنيه الدكتور بيديهالى ب 500 عشان هو دكتور فى الجامعه ليه اسمه مركزه اللى انا معرفوش طبعا ولازم بقى يبقى عنده عياده مؤثثه تأثيث فاخر كأنها سراية باشا ولا حاجه وانا طبعا معرفش ليه.. حتى الدنيا هناك برد ومبيشغلش التكييف سخن مع ان المفروض الرفاهيه فى أثاث العياده بتبقى عشان راحة الزباين فى مكان الانتظار... اما بقى للعلاج طبيعى الجلسه ساعه الا ربع بسبعين جنيه عشان الدكتور متعلم فى بلاد بره.. واحنا كمواطنين ملزمين بقى نوفرله مستوى المعيشه بتاع دكتور متعلم فى بلاد بره... عياده ارضيتها سيراميك.. وتليفزيون بدش لتسلية الزباين.. والكوره الارضيه اللى بتلف فى مكتبه ولعبتين تلاته كريستال عالمكتب وطقم اقلام خشب بتسعوميت جنيه وكام كتاب بالانجليزى وتخان ومطبوعين فى بلاد بره برده عشان يطقم بيهم مع الشهاده.. ومكتب بسحلوميت جنيه؟؟؟؟ عشان ايه يا اولاد؟؟ عشان احنا بلد بتاعه مظاهر... لكن لو جينا بقى فى المقابل بصينا على الكفاءه الفعليه.. اولا مش هو اللى بيعمل العلاج الطبيعى ولا بيشرف عليه.. هو بيكشف على المريض يويقول الجلسه يتعمله فيها كذا وكذا... مالوش دعوه بقى ان الجهاز اللى بستخدمه بيعلق ومبيرضاش يشتغل... وطبعا مفيش داعى بقى اقلكم كمان ان اللى بتعمل العلاج الطبيعى خريجه جديده.. طازه.. بشوكها.. ومن كتر الكفاءه الحقيقه كل مره بتكهربنى بجهاز الالكترو ثيرابى لحد دماغى مابتصدع وعينى توجعنى من الكهربا العاليه وبطنى تقبل وابقى عايزه ارجع وبتلسعنى بجهاز اللاترا ساوند ثيرابى لحد اما عظام الوجنه وجعتنى... وكل مره تعملى تمارين غير المره الاولانيه.. المفروض كله ده بيتعمل لمفصل الفك.. والضحك بقى ان الدكتور نفسه لما جه يكشف عليه مكانش عارف مفصل الفك فين وحط صوابعه على الفك السفلى.. قلتله حضرتك المفصل بتاع الفك مش هنا وحطيتله صباعى على مكان المفصل وقلتله اهه... وشخص الحاله على انها خشونه فى المفاصل مع انها حالة استبحس واضحة.. مشعارفه نا شهادة ايه اللى واخدها من بلاد بره وعامل بوستر كبير قد كده عشان يقول انه عامل دراسات عليا فى امريكا القمح... وعلى راى خالتى بكيزه الدراملى "دكتوراه ومش عارف يفك سلك!!!"... ناس ضحك والمصحف... طيب مابدل المكتب والسيراميك ماجيب اجهزه جديده بدل اللى بتعلق ويجيب جيل انضف شويه من اللى بيستخدموه... المفروض الواحد بيدفع فلوس مقابل خدمه بياخدها مش عشان الدكتور يغير المكتب بتاعه كل 6 شهور ويجيب ساعه بتقول بابا وماما... حتى طيب يعين ناس عندهم خبرة شويه بدل معدومى الخبره اللى معينهم يبهدلوا فى خلق الله دول يعنى انا اخش باستبحس فى المفصل اطلع من هناك بنور فى الضلمه!!!!!

لا تصدقني يوما عندما أهمس لك بأنى أحبك...أو صدق ان شئت ولكن لا تعتمد علي ذلك الحب كثيرا... فأنا انثي اعتادت الرحيل.. فكما تعلم فإنني احمل من طباع الغجر الشيء الكثير.. ونساء الغجر يا عزيزى لا يعشقن الرجال.. وانما فقط يتزوجن بحثا عن الحماية ويحطمن الكثير من القلوب كهواية لتزجية وقت الفراغ ولجنى بعض المال.. ولأن الرجال بطبعهم ليس لديهم القدره على الغوايه.. فلا تفكر انك تستطيع يوما ان توقعنى فى شباكك.. وان تظاهرت بالوقوع فهذا من سوء حظك.. فشباكك ليست بالقوه الكافيه لتحتمل بقائى فيها كثيرا.. وعندها سأكون سقطت فقط لالتهمك كأنثى العنكبوت.. وسأكون ساعتها الفريسة التى أكلت صيادها.. فلا تعتمد على ذكائك كثيرا.. فالدهاء يغلب الذكاء.. والرجال بطبعهم ضعيفوا الحيلة.. والنساء بفطرتهن قويات الدهاء.. فقط ارحل الآن.. ارحل قبل ان اقرر التلهى بك قليلا.. ارحل فيما لاتزال فرصة الفرار امامك سانحة.. ارحل ولا تستدر حتى لا تصيبك لعنة نساء الغجر.. فنساء الغجر لا يٌنْسَيْن... اللعنة.. فيمَ النصح ولم الحديث... ابق ان شئت... فأنت فى كل الاحوال هالك..
عزيزى.. وداعا

سته وعشرين سنه يا دنيااااااااا

على سبيل التغيير قلت السنه دى اقضى يوم عيد ميلادى مع اصدقائى لانى مش هنفع احتفل بيه فى البيت مع الفاموليا لظروف سفر والدتى... اتفقت مع بنتين صحباتى نخرج وقولت لكام واحده صحباتى كمان وجيبتلهم تورته... اتضحلى فى الاخر انهم كانوا متفقين عليه من ورايا هىهىهىى جم يعملولى سيربرايز بارتى انتهى الامر بانى انا اللى عملتلهم سيربرايز بارتى هع هع هع... بس فى ناس جم كنت زعلانه انهم مش جايين عشان ماردوش عليه لما كلمتهم بعدي اتضح فى الاخر انه كان فيلم عاملينه عليه عشان معرفش انهم فاكرين عيد ميلادى... هو مش ده الغريب.. الغريب فى الامر ان السنه دى اول مره حد من صحابى يفكر فى كده مع انى اعرفهم من سنين.... فى ناس غريبه اوى افتكرت عيد ميلادى السنه دى!!!! بجد انا مندهشه... جالى كمية رسايل على الموبايل وايميلات بالهبل!! اكتر من اى سنه فى الحياه... يمكن عشان السنه دى بالذات اول سنه محتفلش بعيد ميلادى مع الفاموليا زى كل سنه لانى مش بعمل عيد ميلاد ولا بشوف اى حد غير افراد الاسره يوم عيد ميلادى.. كل سنه بقضيه فى وسط البلد اتمشى واكل شاورمه و ايس كريم واجيب جاتوه واشترى لنفسى هديه واروح للفاموليا نطفى الشمعه ونظرا لانه كان دايما بييجى فى اجازه نص السنه فمش متعوده انى اعمل حاجه فى اليوم ده غير الانتخه فمن ساعه ما اتخرجت وانا يوم عيد ميلادى باخده اجازه... وطبعا الامر لا يخل من التريقه المنزليه والدعاء بالشفاء العاجل من الهبل المزمن عشان موضوع الاجازه ده احم احم احم :)..وبالمناسبه صحيح انا جيبت السنه دى لنفسى زحلفه وسميتها زيزا
كان وقت ممتع جدا الحقيقه وانبسطت ان صحابى كانوا مبسوطين لان معظمهم كانوا ناس الشىء الوحيد المشترك بينهم انهم صحابى.. فى ناس مكنتش تعرف بعض خالص وناس تعرف بعض طشاش فانبسطت اوى انهم اندمجوا مع بعض... بجد كان هيبقى يوم كئيب اوى لو مطفيتش شمعه زى كل سنه.. و صحيح كمان يحيى الفخرانى كان متواجد فى المكان وجه قطع معانا التورته واتصور معانا بس للأسف نسيت اسأله هو كان جاى يعزى والا جاى يهرج :( .... والعيال بقى جابولى هديه قيمه جداااااااااااا... جابولى كارت كده من مكتبه ديوان اروح اشترى بيه حاجات من ديوان ببلاش نياهاهاهاهاهاااااااااااااااااااااااااااااااااااااااا.. انا مبسوطاااااااااااااااااااااااااااه.. وانا بحيى الحبه دول.. والحبه دوله والحبه دول.. والله بفكر اعملى كام عيد ميلاد كده كل سنه احسن الموضوع طلع مسلى جدا
---------------
البت شيماء قالتلى افتح التعليقات فى هازوها المودوع وانا مقدرش أأخر لشوشو تلب

كان نفسى اعرف ارسم لوحات من خيالى وأرسم شخصيات كارتون.... وكان نفسى ابقى بعرف كتب روايات خياليه او بوليسيه.. وكان نفسى ابقى بعرف اعوم.. وكان نفسى ابقى باليرينا.... كان نفسى ابقى حاجات كتير اوى.. وانا خلاص هكمل 26 سنه كل الحاجات اللى كان نفسى فيها دى بقت بالنسبالى حاجات بتخلينى ابتسم.. مش بسمه رضا ولا بسمة عجز.. مجرد ابتسامه تقرير واقع... انا كبرت!!!!

سفاح وماشى فى البلاد سفاااااااااح

ناس بتقول اسمر وشعره مفلفل وناس بتقول ملتحى وناس بتقول لابس نقاب وناس بتقول راكب موتسيكل وناس بتقول انه بنى وباستيك من فوق... يبقى ايه؟؟؟
بسم الله الرحمن الرحيم.. الاجابه ان شاء الله تونس

صرح مصدر مسئول بوزارة الداخليه ان وزارة الداخليه قامت باتخاذ اجراءات امنيه -سر طبعا مش عايزين يقولوا عليها- مش فى المعاتشى بس دى فى القاهره الكبرى كلها عشان احنا عارفين طبعا ان السفاح زى اتوبيس سته بيروح كل حته... كما اكد السيد وزير الصناعه انهم بصدد مشروع لتصنيع ملابس داخليه حريمى غير قابله للخدش ومقاومه للرصاص وهتطرح فى عمر افندى باسعار فى مستوى الطالب المتوسط.... وكمان بعتو يستوردوا من كيلفن كلاين و دولسى اند جابانا بنطلونات ستريتش مطاطيه يصعب اختراقها بالآلات الحاده -وبينى وبينكم كده فى اشاعه قويه بتقول ان مدام نظيفه هى اللى هتعمل اعلانات للبنطلونات دى.. والسكينه مابتكدبش-. كما اكد احد المصادر السفحيه ان السفاح بيفكر ينشر مذكرات ليه بعنوان "سفاح ولكن" وانه بيفكر يعمل مدونه... ومفيش داعى طبعا اقولكم ان احد مصانع السمنه هتغير اسمها لسمنة السفاح... واكد المطرب تامر حسنى انه هينزل اغنيه مطلعها بيقول " نويت اصلى سفاح دخلى من الشباك".. وسامى العدل واخواته الاتنين هيعملوا شركه انتاج سينيمائى جديده هيسموها "السفاحين التلاته"...
واتصل بزيرو تسعوميه زيرو تسع تسعات عشان تحصل على رنة السفاح ولوجو السفاح وخش على www.sfa7.com ونزل el safa7 wall-paper and elsafa7 winodows theme والسفاح رينج تون وخد عليهم تيشرت السفاح هديه وتمنه على قد الايد... وقد نمى الى علمى ان بعض الرسائل انتشرت على الهواتف المحموله تدعو بصيام يوم الاربعاء المقبل -لان الاربع اجازة السفاحين- والدعاء على كل السفاحين ساعة الفطار.. وقد نادى بعض المدونين بانشاء مدونه وتصميم بعض البانرات تحمل عبارة " لا للسفح والسفاحين احنا فى القرن العشرين".. وفى حركة مضاده تم انشاء حركة مؤيده للسفح تحت عنوان "سفاحين من اجل التغيير"... ويمكن قريب تلاقوا كتب على الرصيف تحمل عنوان "الحصن الحصين للوقايه من السفاحين".........
والآن نوفر طباعه صورة السفاح على التيشيرتات والمجات والاقلام البيك والفرنساوى.... وابعت اس ام اس على 234 وصوت لسفاحك المفضل التوربينى او سفاح المعادى.. وعلى كل الجرافيك ديزاينرز من البنات الاحتراز يمكن يجيلهم السفاح عايزهم يعملوله كروت ورجاء والنبى اى واحده تقابل عمو السفاح تمضيلى منه اوتوجراف وتقوله انىمعجبه جدا بتسريحة شعره وعملته جروب على الياهو اسمه "السفاح المعجزه" وممكن لاى حد من محبى السفاح انه يشترك فيه...........
مولد جديد وهيتنصب.. مولد سيدى السفاح... وبرده مش هنعرف الحقيقه فين كالمعتاد وهتنطلق العديد من نظريات المؤامره اللى بتقول ان الحكومه عامله كده عشان تطلع السفاح ملتحى ويخنقوا على الاسلاميين ونظرية مؤامره تانيه هتقول ان دى مؤامره مدبرها الاسلاميين عشان يساعدوا على نشر الحجاب... بس اللى انا متاكده منه انهم بعد مايقبضوا على المشتبه فيه هيطلع طبعا مختل عقليا

انشقت الارض عن كف اسمر غليظ كثيف الشعر.. انطلق من رحم الارض ليصفعنى على وجهى فيترنح عالمى بالكامل ثم يهوى فيتحطم وتتناثر اشلاؤه.. صفعنى ثم مضى وتركنى غارقة فى ضحكى واشلاء عالمى المتحطم

الحموم الحمووووووووووووم ميه وصابوووووووووووون

خير اللهم اجعله خير... ساقتنى الاقدار تانى انى اترمى قدام اداة التعذيب الذاتى المسماه بالتلفاز.. وانا بشقلب القنوات شوفت كليبات بالهبل.. فى بينهم شىء مهم جدا مشترك... كلها ستات بتستحمى.. فاستغربت وقولت اكيد بيتهيالى..... بقيت بعد كده كل اما اعدى من قدام تليفزيون مشغل اغانى ابص الاقى فعلا ست بتستحمى.... لحد مافيوم..كنت مع واحده صحبتى نازلنين نشترى جزمه. هى واقفه قدام الفاترينه وانا ببص فى المكان لقيت شاشه تلفزيون فيها واحده لابسه قميص نوم محتشم كده اطول من جيبه ماريا.. لسه هتدور لصاحبتى عشان اقولها ان اول مره من زمان اشوف كليب مفهوش واحده بتستحمى الا ولقيت الست ام قميص نوم لبست بشكير وداخله تستحمى...............
نفسى اعرف ايه المغزى... هل هم مثلا شاييفن ان الستات معفنين مابيستحموش فعايزين ينفوا التهمه دى عن نفسهم والا يكونوش عايزين يغروا الرجاله انهم يستحموا بقى عشان ريحتهم فاحت

Color Quiz Results

Your Existing Situation

Hopes to obtain an improved position and greater prestige, so that she can procure for herself more of the things she has had to do without.

Your Stress Sources

Delights in the tasteful, the gracious, and the sensitive, but maintains her attitude of critical appraisal and refuses to be swept off her feet unless genuineness and integrity can be absolutely vouched for. Therefore keeps a strict and watchful control on her emotional relationships as she must know exactly where she stands. Demands complete sincerity as a protection against her own tendency to be too trusting.

Your Restrained Characteristics

Emotionally inhibited. Feels forced to compromise, making it difficult for her to form a stable emotional attachment.

Feels that she cannot do much about her existing problems and difficulties and that she must make the best of things as they are. Able to achieve satisfaction through sexual activity.

Your Desired Objective

Seeks success, stimulation, and a life full of experience. Wants to develop freely and to shake off the shackles of self-doubt, to win, and to live intensely. Likes contacts with others and is enthusiastic by nature. Receptive to anything new, modern, or intriguing; has many interests and wants to expand her fields of activity. Optimistic about the future.

Your Actual Problem

Wants to act freely and uninhibitedly, but is restrained by her need to have things on a rational, consistent, and clearly-defined basis.

Your Actual Problem #2

The fear that she might be prevented from achieving the things she wants leads her to play her part with an urgent and hectic intensity.

http://www.colorquiz.com

فين التخصص يا حوش

كان فى مسرحية بتاعة فؤاد المهندس وشويكار اسمها انها حقا عائله محترمه قالت فيها شويكار جملة المفروض درسوها دلوقتى قالت
"عندنا فى الكباريه الرقاصه مينفعش تقول مونولوجات والمونولوجست ماينفعش ترقص"
دايما بفتكر الجمله دى كل اما اشوف فيديو كليب.. ياريت والنبى حد يفهم نيكول سابا واخواتها (مالناش دعوه ببوسى سمير واخواتها عشان دول حوار تانى) انهم يا يغنوا يا يرقصوا يا يمثلوا يا يفتحوا للزباين... واحب احييهم عالمجهود الخرافى اللى بيبذلوه الصراحه بالنسبه لانهم مش من جيل السمنه البلدى وصحتهم مساعداهم يعملوا كل ده فى نفس ذات المومينت... وكلنا بنحب مصر

من بين طيات المكان والزمان يأتيك احدهم.. يخرج من بين عينيه وشفتيه احلاما تتكاثر.. تتناثر... لتستقر فى قلب ما وتطمئن.. وينبت منها ياسمينة صغيرة وريحانة على ضفة بحيرة صغيرة تنشق حيث استقرت الاحلام...
واحيانا لا يأت احد فتظل تطارد احلاما ولدت لتستقر فى قلوب آخرين...
واحيانا يخرج من بين عينيك فراشات صغيره تغزو العالم وتحط فوق كل ازهار الياسمين.. من اجل هذا انت خلقت.. فلا تنتظر احلام احد ان تستقر فى قلبك فبه يجرى نهرا يصب فى بحيرات الآخرين