تخاريف مابعد يوم عمل

تقلت عليه الهموم صرخت

رفعت إيدي للسما وندهت

قلت يارب...

يا خالقنى انا وحبيبى والليل والسهر

من يوم فراق الحبايب فى القلب جرح انحفر

ياترجعلى اللى غايب يا تاخد قلبى

وتدينى بداله... حتة حجر

موقف ماحصلش... او حصل.. معرفش

قاعد وحدى تحت الشجر... مفيش غَيَام لكن في مطر... لقيت حمار معدّى بصيتله وابتسمت.. بصّلى الحمار... وضِحِك

كريزة ضحك مبرره

هممت بأن أكتب " أَشْعُر ب........" ثم انفجرت في الضحك...... أَشْعُر!!!!! هاهاهاهاهاهاهاها

Sam startd shooting :D

well guys SAM tagged me.. lezz go

What is your idea of perfect happiness?

living somewhere with lots of books and music and animals where i can see the sky wherever i extend my sight

What is your greatest fear?

my greatest fear is having to share my house with ppl forever

Which historical figure do you most identify with?

anyone thats smart, wouldnt mind if they r evil... i like kennedy, hitler, guevara, omar ebn elkhattab, khaled ebn elwaleed and alhajaj ebn yosof

Which living person do you most admire?

some ppl that u dont know

What is the trait you most deplore in yourself?

being edgy all the time, i'm as calm as a bomb

What is the trait you most deplore in others?

being liars, selfish and incosiderate

What is your greatest extravagance?

being as elastic as elastygirl :D

On what occasion do you lie?

when ppl start acting suspicious about me while they have no reason.. i start manipulating, and i can go on like this for days with no slight feeling of guilt "wouldnt blame u f u thought um evil"

What do you dislike most about your appearance?

oh!! i hate being green " the planet i come from females are green "

Which living person do you most despise?

i need a new blog to answer this question, do u have time??

Which words or phrases do you most overuse?

i've no special words these days

If you could change one thing about yourself, what would it be?

being green, i think vermilion red suits me better :p

What do you consider your greatest achievement?

being able to keep my sanity for the past 25 years, its very hard on this planet wish me luck

If you were to die and come back as a person or thing, what do you think it would be?

as a person i'd want to be a clown, as a thing i'd want to be a mountain maybe

If you could choose what to come back as, what would it be?

cat, horse or a bird

Who are your favorite writers?

rafael sabbatini, moliere, nazem 7ekmat, chulk palanhiuk, alexandre demas, edgar allen poe and ahmad al aidy

Who is your favorite hero of fiction?

Grendizer

What is your most treasured possession?

What do you regard as the lowest depth of misery?

losing faith or self-confidence

Where would you like to live?

somewhere n southern france or italy or anywhere with sea, monuments, mountains and shining sun

What is your most marked characteristic?

being stubborn

What is the quality you most like in a woman?

please go forgive me for all the things i should have said but i didn't "for safety reasons"

What is your greatest regret?

i dont have any hmd lelah

What or who is the greatest love of your life?

my room

How would you like to die?

painlessly and decently

no i shoot.. GET READY

i tag:

eve

santakarem

mindonna

moia

nour

ghada

The Peanut Man

A5er e5tera3aty THE PEANUT MAAAAAAAAAAAAAAN

حواديت

من وانا صغيره وانا بموت في الحواديت وامي كانت حافظه حدوتّين تلاته... كنت كل اما اقولها احكيلي حدوته كانت تحكيلي حدوته واحده.... حدوته البنت الصغيره الصغيره.. بابايا مكانش حافظ حواديت بس كان بيألفلنا حواديت واحنا مسافرين عشان ماننامش منه في السكه عشان لو نمنا هو هيروح في النوم وهو سايق ( بابا اجدع واحد ينام وهو بيسوق).... جدتي الله يرحمها كانت تحكيلي حدوته الشاطر حسن وست الحسن.. واحد صاحب بابا كان يحكيلنا حواديت كل اما يجي... كنت بحب اوي حدوته ست الحسن وامنا الغوله... ابن خالي الكبير مره حكالنا حدروته معجبتنيش عشان حدوته تخريف اوي سيبته في نصها واتخانقت معاه قلتله انت بتضحك علينا... كان في الحدوته شجره متعلق عليها طفلين ويسآلوا كل واحد معدي سؤال لو قال الصدق يمشي ولو كذب يتعلق مكان واحد منهم علي لاشجره.. اتخنقت اوي من الحته دي لانه مكانش عارف ليه اساسا الطفلين دول اتعلقوا علي الشجره ومارضيتش اسمع بقيه الحدوته... لسه لغايه دلوقتي بحب الحواديت وبحب اسمع حواديت جديدة... بس من كل الحواديت دي بقي تظل حدوته البنت الصغيره الصغيره هي الأثيره عندي عشان بتبقي عامله زي حتة مزيكا... وبرغم من سذاجة الحواديت ولامنطقيتها الا انها اثرت فيه بشكل كبير.... حتي الحواديت اللي معجبتنيش... لسه لغاية دلوقتي برسم ناس بتتولد علي الشجر واتمني الناس كانت تبقي كلها طرح شجر... نتولد متعلقين في شجره ونسيبها ونمشي مفيش رابط بأي حاجه... مفيش مانجايه بترتبط بالشجره اللي نزلت منها ولا ببقية ثمار المانجه التانيه... ولسه مقتنعه تماما اني لو مالقيتش شغل واهلي كلمه ماتوا ربنا هيبعتلي رزقي مع ملاك يحطهولي تحت المخده... عشان كده مابهينش نسي لفلوس ابدا عشان انا ليه رزق وهيجيلي هيجيلي اسعي اه لكن منغير ماسمح لصاحب شغل يهيني... والحمد لله ربنا مره ماحوجني لمخلوق اما حدوته البنت الصغيره الصغيره اتعلمت منها حاجات كتير رسخت في ذهني... اولها اني ماسيبش حد يستغفلني... وان كل حاجه ليها حل.. واني اما اقع في مصيبه معرفش احلها ابويا هيحلهالي... لسبب او آخر كنت بشوف نفسي في الحدوته دي... عشان انا كنت سفروته (ولازلت) كان حجمي قليل اوي وكانت كل حاجتي منمنه.. حتي لعبي اما كانت تبقي كبيره كنت افصصها حتت صغيره ( هي امي كانت بتتشل بس هيهيهي انا مالي بقي).. وكان ليه اوده لوحدي.. اصغر اوده في البيت..... كفايه رغي بقي واحكيلكم الحدوته احسن...
كان ياما كان كان في بنت صغيره صغيره... عايشه في اوده صغيره صغيره... عندها مقشه صغيره صغيره.. وجاروف صغير صغير.. كل يوم البنت الصغيره الصغيره تكنس اودتها الصغيره الصغير بمقشتها الصغيره الصغيره وجاروفها الصغير الصغير تلاقي جنيه دهب.. تحطه علي الشباك يجي الحرامي ياخده ويمشي.. وفيوم قعدت تعيط تعيط.. جه باباها سألها بتعيطي ليه يا بنت يا صغيره ياصغيره؟؟... قالتلها يا بابا كل يوم اكنس اودتي الصغيره الصغيره بمقشتي الصغيره الصغيره وجاروفي الصغير الصغير الاقي جنيه دهب.. احطه علي الشباك يجي الحرامي ياخده ويمشي... قالها متزعليش يابنت يا صغيره صغيره... اما تكنسي اودتك الصغيره الصغيره بمقشتك الصغيره الصغيره وجاروفك الصغير الصغير وتلاقي الجنيه الدهب حطيه علي الشباك وحطي جمبه وساخه ودقي في الشباك مسامير... تاني يوم... البنت الصغيره الصغيره... وهي بتكنس اودتها الصغيره الصغيره بمقشته الصغيره الصغيره ،جاروفها الصغير الصغير لقت النيه الدهب.. حطته علي الشباك وحطت جمبه وساخه ودقت مسامير في الشباك... جه الحرامي اخد الجنيه ايده اتعاصت وساخه جه يمسحها في الشباك ايده اتعورت من المسامير قال آآآآآآآآي.. باباها سمعه وجه مسكه وحبسوا الحرامي... توته توته فرغت الحدوته حلوه والا ملتوته؟؟؟؟؟

افتح قلبك ماتخافش

عم محمد منير كان لسه بيغني دلوقتي افتح قلبك ماتخافشى....... زمان ماكنتش واخده بالي ان القلب ليه وظايف غير انه يدق.... ،اما اخدت بالي قفلت الباب كويس وحطيت عليه قفل حديد كبير.... واما جيت اشيل القفل عشان الشمس تخش مالقيتش المفتاح... شيلت البيبان خالص وياريتني ماشيلتهم... دخلت الشمس صحيح بس دخل اكياس نايلون ومناديل كلينكس معاها.. اصل الباب علي ناحيه بحري والهوا بيرمي زبالة الشارع مع الشمس...دلوقتي بقيت محتاسه عشان مش لاقيه باب تاني اركبه... الله يسامحك يا منير

LIFE!!

في ناس الواحد بيقابلهم وبيطلعهم من حياته بمنتهي السهوله.. وفي ناس دخولهم حياتك بيوجعك... وبقائهم في حياتك بيوجعك... دول بقي اللي خروجهم من حياتك بيشبه خروج الروح من الجسد... وجعععععععععععععع... بس بمجرد ما بيخرجوا من حياتك شويه وبنتتهي الحدوته..... وفي ناس مبتعرفش تطلعهم من حياتك.... حتي لو تجاهلت وجودهم في حياتك بتلاقيهم اتوجدوا تاني في حياتك بشكل جديد.... ساعتها بتحس ان الدنيا ضيقه اوي

تناقض

العن الحياه لأنها لا تسير كما احلم والعن احلامي حينما تتحقق

تعب

مَرَجَ الله في الأرض بحرين يلتقيان وفي تلافيف عقلي الرماديه مَرَجَ آلاف الأبحر تتلاطم في امواجها نفسي التي لا تعرف السباحه

حلم جديد

حلمت امبارح اني كتبت مسرحيه تجريبيه من فصل واحد... عن شخص عايش وحيد وفيوم بيصحي يلاقي جمبه جثه..... لا يعرف جت منين ولا مين حطها.... بعد تفكير بيتخلص من الجثه... الليله اللي بعدها بيحاول ماينامش... يقفل باب الشقه كويس والشبابيك وكل المنافذ... ويورح في النوم وهو مستخبي يصحي الصبح مفزوع يلاقي برده جثه في السرير.... يتخلص منها... وكل يوم يتكرر نفس الموقف... كل يوم يصحي يلاقي جثه ويتخلص منها... لحد مازهق... وقرر انه لو لقي جثه مش هيتخلص منها... صحي من النوم لقي جثه... اخد اجازه من الشغل وفضل في البيت بيحاول يمارس حياته بشكل طبيعي وقعد يستني حد ييجي ياخد الجثه... شويه ويلاقي الجثه دبت فيها الروح... واتحولت لواحده بتكلمه... يحاول يسألها هي مين وجت هنا ازاي وازاي صحيت من موتها... بتدور بينهم حوارات طويله بيعرف منها انها هي كمان متعرفش ايه جابها هنا وانها كل يوم تصحي تلاقي نفسها في بيت شكل وتحكيله علي ردود افعال الناس اللي اتفاجئوا بيها قبله... لحد ما فيوم بيصحي مايلاقيهاش.. ومتظهرش تاني... ويفضل ل يوم يستناها... وتنزل عليه الستاره وهو مستني

سخرية القدر

اما كان عندي قلب كان الناس شايلين قلوبهم وحاطين مكانهم قباقيب خشب.... واما الناس بقي عندهم قلوب قلبي كان بقي قبقاب خشب

اللهم تقبل دعاءِ

اللهم فلتلعن كل رجل بذىء تطاول على حرمة جسد اية انثى دون رغبتها

عزيزي الدكتور المحترم احمد عكاشة...........

قريت علي مدونه من شويه تحليل د/احمد عكاشه للأسباب النفسيه اللي وري تصرفات الناس اللي كانت بتشجع يوم مباراة الكونغو وقت دقيقة الحداد اما قعدوا يهيصّوا واتخنقت ماقدرتش اكمل... اصلي مش محتاجه شهادات الدكتور احمد عكاشه (مع احترامي لشهاداته) ولا لازم يبقي عندي مستشفي خاصه زي بتاعته (اللهم لا حسد) ولا محتاجه اتفرج علي شباب جيلي كأنهم قرود في جبلايه عشان اعرف ما بيتنططوش ليه... السبب بسيط.. عشان كل واحد حاسس ان البلد عامله زي البير الضلمه الغويط ترمي فيه القرش ماتسمعلوش رنّه... تنده ماتسمع لصوتك صدي... ترمي نفسك تتخنق وتموت قبل ماتوصل للقاع.. ولو حاولت تعمل دكر وتجيب سلم تنزل تشوف اللي بيحصل..... العفاريت اللي ساكنه في القعر هتشدك وتاخد السلم تستدرج بيبه الناس اللي عندها امل وبتروح ناحية البير... وكلنا عارفين ومتأكدين ان في ناس ولاد كلب قاعدين في القعر تحت بيكوشوا علي كل اللي بيتحدف من فوق علي اعتبار ان كلّه بينفع... فكانت النتيجه ان معدش حد مننا بيقرب م البير واللي بيروح ولسه عنده امل ... يا اما نخاف عليه "هتروح فيه يابني دي سكة اللي يروح مايرجعش".... يا اما بنتقلب علي قفانا من الضحك "هترمي ايه ياهبل كله بيقع في الكروش اللي تحت والبير مالوش قرار"...وياريت لو حد عرف ينزل يبعتلي رساله مع عفريت يقولي احمد عكاشة في القعر بيكوّش والا يطلع موقعه فين....... يا دكتور احمد احنا القرود واحنا اللي عارفين احنا ما بنتنططش ليه اجري علي اكل عيشك وسيبنا في حالنا مش ناقصين حد يجي يخنق فينا... احنا جيل الوكسه يا بيه... تعرف تشيل الوكسه من علي قفانا شيلها ماتعرفش مالكش دعوه بقي نعمل ايه في وكستنا... انا معرفش كتير عن د/ احمد ومعنديش ناحيته اي مشاعر سلبيه ولا آخذ عليه اي شيء بس مابحبش حد يعمل فيها العلّامه الفهّامه حتي لو هو علّامه وفهّامه عشان لو هو بيفهم وانا مبفهمش مش فارقه..... احنا الاتنين مبنعملش حاجه ولا بنغير شيء....مش طالبه ييجي هو والعلّامات الفهّامين التانيين يِنْجِعصوا علي كراسيهم وكل واحد يعدل نضارته ويبصلنا بعمق بعدين يقول علينا مرضي وعندنا مشاكل... طب ماحنا عارفين يابيه وربنا يديم عليك صحتك النفسيه.... عندك وقت تسمع نعبيلك مشاكلنا في شِوِلَه (جمع شوال)؟؟؟ والا عندك اماكن لينا في المستشفي بتاعتك تعالجنا كلنا؟؟؟... اتفضلوا اقعدوا يا دكاتره... جمبينا وانتوا تعرفوا احنا عاملين زي الزومبيز ليه وليه كل واحد فينا شايل حياته قَتَب علي ضهره... وعلي رأي محمود عبد العزيز في فيلم جري الوحوش" انا عايز اعرف حاجه واحده بس يا دكتور... القرد بيتنطط والّا بطّل تنطيط؟؟؟؟؟"
----------------------
الزومبيز= zombies

خير الكلام ما قلّ ودلّ

كَيِّيف الخَرَه يشتريله معلقه دهب

أكيد

علي سيرة اكيد اللي في البوست اللي فات لاحظت حاجه..... اكيد ليها معنيين..... أكيد من التوكيد وأكيد من الكيد... هل الاتنين في بينهم علاقه

كَوكَو تانى kawkaw tany

افتكر اول اغنيه شهرت مدحت صالح اوي كانت أغنية رافضك يا زماني يا اواني يا مكااااااااااااااااني انا عايز اعيش في كوكب تانيييييييييييييييييى، فيه الإنسان، لسه انسان عايش للتانى... كنت ساعتها لسه زعبوله صغيره"دلوقتي بقيت زعبوله اكبر شويه" وكانت الأغنية دي عاملة ضجه عشان غناها في بلاد بره والا كان مهرجان مشعارفه بقى... ما علينا يعني المهم ان اللي عايزه اقوله انه اما كان وقتها الناس عجباها كلمات الأغنيه تنفيسا عن الخنقة اللي مخنوقينها امال دلوقتي نقول ايه!!!! نقول مثلا عايزين نعيش في مجرة تانيه؟؟؟... مابيتهأليش عشان اكيد اكيد... أكيييييييييييييييييييد السياحة بين المجرات مكلفه.. ده الواحد بيقعد يحوّش سنه عشان يعرف يروح يصيف في حته نضيفه هنطلع من الكَوكَو ده ازاى؟؟؟؟؟... مش بالذمة الواحد يخش مستشفي المجانين اريح.. لبسوني القميص مولتو بيللووووووووووووووووووو

افكار جهنميه

احلى حاجه فى دخول الواحد جهنم انه هيبقى عنده قدره على الشماته فيهفرح اوى فى الناس اللى نفخوه فى الدنيا اما يشوفهم بيتمرمطوا فى جهنم ....نياهاهاهاهاهاهاها

اوففففففففف

هو الواحد يعمل ايه عشان يدخلوه مستشفى المجانين؟؟؟؟؟؟ عشان انا زهقت من الحياه وسط الناس العاقله. مستشفى المجانين آخر امل ليه لأن احيا حياه معقوله

حكمة الاقدار

اذا فشلت فى الحصول على ماليس لك لا تغضب فكما ان الاشياء التى لغيرك تضل دوما طريقها اليك فما لك سيضل طريقه الى غيرك

كم اكره تلك الراحة التى يبعثها فى حضورك.. وأكره اكثر استسلامى امام عينيك

الجريمة الكاملة

يصف ابناءه العشره الذين لا يشبهونه فى اي شيء سوي الحسرة فى صف واحد ويقلب ناظريه بينهم المرة تلو الأخري فيراهم يتحولوا الى افاعٍ عظيمة الحجم تلتهم كل مافى الشقه ثم تتجه جميعها نحوه بافواهها المفتوحه تهم بالتهامه هو الآخر ولكنه يستطيع الافلات منهم بعد ان قذفهم بما تبقى من محتويات الغرفه فمات منهم ثلاث.. يشعر بسيفا ينمو فى حزامه فيتناوله فور اكتماله ويشرع فى مهاجمة الافاعى فيقضى عليهم جميعا بعد ان تلدغه احداهم فى ذراعه الايسر فيقطعه قبل ان يتسرب السم الى بقية اعضاءه عندها تلدغه افعى اخرى فى ساقه قبل ان تسقط صريعه فيقطع ساقه التى تتحول بدورها الى افعى تطارد ماتبقى من جسده فتلدغه فى احد اعضاءه فيقطعه ليستحيل الى افعى تلدغه فى عضو آخر فيقطعه حتى تتحول اعضاءه كلها الى افاعٍ تنهش بقاياه بضراوه

مفيش حاجه تساوى احساس حد اما يزرع نظرة سعادة فى عينين حد تانى

المخطوفه

عندما كنت صغيره خطفتنى كائنات غريبه ووضعنى فى ثقب اسود شديد الظلمه والرطوبه به مرآه وهى الشىء الوحيد الذى استطيع ان اراه او المسه فى هذا الثقب فيما عدا ذلك فهو فراغ وكلما نظرت في هذه المرآه وجدتها لا تعكس شىء ولا حتى وجهى وانما ارى بها شمعه تداعب رياح مجهوله فتيلتها فيتراقص ضوؤها وكلما حاولت لمسها يصطدم اصبعى بزجاج المرآة الشديد البرودة كلوح ثلج.. لا ادرى كم من الأيام مضت قبل ان استفيق على وجه امى تخرج الترمومتر من فمى بترقّب وتنظر اليه ثم تتنهد بارتياح شديد "الحمد لله الحرارة نزلت" ومنذ ذلك الحين وانا اكره الظلمه والرطوبه والمرايا والشموع

كابوس

ساعات قبل مانام يجيلى احساس انى مش هصحى تانى.. اتكسف اوى من ربنا.... عشان النهارده راح منى الظهر ونميت وشتمت وبقالى اسبوع ماسألتش على امى وافتكر الواد محمود اللى فتنت عليه فى ابتدائى وافتكر كل المرات اللى زعلت فيها ابويا.. قلبى يدق افضل اعد فى دقاته وكل دقه اسألها هو انتى اخر دقه؟؟؟؟؟؟؟؟؟؟.. اخبى وشى فى الغطا واغمض عينيه وساعات يغلبنى دمع الندم والخوف ابكى لحد ماروح فى النوم.. تانى يوم افتح عينيه الاقى الدنيا سوده.. مبقاش عارفه اللى ملفوف حواليه ده الغطا والا الكفن.. تتمد ايد تلمسنى وتقولى قومى عشان تصلى الفجر... اشيل الغطا من على وشى يزغلل نور النيون عينيه والاقى ابويه قدامى بيصحينى ابتسم واخد نفس عميق من هواء الكره الارضية الملوث واتمطع واقوم اصلى وارجع انام

الجغرافيا مش فوتوغرافيا

لم استطع يوما ان افهم الجغرافيا.... فلا استطيع ان افهم لماذا توضع حدود بين بنى الانسان ثم يتقاتلوا على اضافه شبر جديد لمساحات داخل تلك الحدود.. ولم استطع يوما ان افهم مالذى يعطينا احقية التصرف كالآلهة الصغار في موارد الطبيعه لا لشىء سوى لأننا نسكن بجوارها.. ثم تصبح بعض الدول قويه وتبدأ فى السيطرة على الدول الأضعف لإضافة المزيد الى قوتها.. ولم افهم لماذا هو من العسير علينا ان ندرك اننا لا نملك شيئا وانما فقط نملك حق الحيازه والانتفاع بالأشياء...يبدو الامر كله بالنسبه لى كلعبة قذرة يلعبها شخص مجهول لافساد العالم ثم يستلقى على قفاه ضحكا من رؤيانا نتقاتل حول مالا نملك

لقد صبأت

اذا اردت افساد حياتى فانا لا احتاج لان افعل ذلك كما اخبرنى كارل ماركس او التاو العظيم... ولان كثرة القراءة فى علم النفس تجعل المرء مجنونا وليس طبيبا والاقبال على الفلسفه يجعل المرء احمق.. فلا حاجه لى بهما ايضاولا احتاج الى الفيزياء والكيمياء ولا اى علم اخر. ولا الى كل هؤلاء الادباء والمتحذلقون والمفكرين والفلاسفه . ولا احتاج الى التفكير الكثير لكى اعلم ان كل الاشياء تصبح عديمة القيمة حينما لا تكون هنا لاختبىء فى صدرك من كل تلك الاوجاع والأفكار

طب اعمل ايه

اعمل ايه وكل حاجه فيك جت زى ماتمنيتها فى حلمى

الخطيئة الأزلية

ان ترغب فيما ليس لك ام ان تحاول الحصول عليه.. ولكن اذا لم نحاول الحصول على الاشياء كيف سنحصل على ماهو لنا؟؟؟؟؟؟

المأساة المرتقبة

اخاف بكره.. يطول عمرى.. وانا لسه.. بتوحشنىىىىىىىىىىىى

شيرين

قد آن ياكيخوت للقلب الجريح

ان يستريح
فاحفر هنا قبرا ونم
وانقش على الصخر الأصم

"يانابشا قبري حنانك، هاهنا قلبا ينم،

لافرق من عام يُنام وألف عام،

هذي العظام حصاد ايامى رفقا بالعظام.

انا لست احسب بين فرسان الزمان

إان عُدّ فرسان الزمان

لكن قلبى دوما كان قلب فارس

كره المنافق والجبان

مقدار ماعشق الحقيقة"

نجيب سرور

No Comments Anymore

ملغيتش التعليقات تناكه ولا ازدراء انا بس شايفه ان التعليقات بتتعارض مع السبب اللي خلاني اعمل بلوج... انا عملت بلوج عشان ادلق كل اللي جوايا زي مابشخبط في كشكولي بالزبط..... انا مش اديبه ولا انا املك الحكمه... مش بكتب علم ولا ادب ولا حكمه تتوارثها الاجيال ولا انا بقول معلومات ولا بدي قيم ثابته... ولا برسي قواعد للكون والبشريه ... انا بهفلط.. بقول رأي في حاجات مش دايما بيبقي رأي محايد او سليم وبشاور علي حاجات عاجباني وحاجات مش عاجباني... ساعات بحلم حلم واقوم اكتبه هنا..وساعات بتخنق من نفسي اخش اشتمني هنا.... يمكن في ناس بتشوف نفسها ساعات في كلامي وناس تنيه بتشوفه عبث وناس كلامي بيطرح جواها اسئله.. كل واحد بيقف في زوايه ويقرا الكلام ويطلع منه بحاجه او ميطلعش... كل واحد حر... ماتقيدوش نفسكوا بشيء.. اقروا البلوج زي مابتقروا مجله او جرنان كبير كل يوم بيزيد حته... زي مابتتفرجوا علي التليفزيون وبرنامج يعجبكوا وبرنامج مايعجبكوش.. الفرد قيمته في انعدام قيمته... انا مش موجوده لكن الكلام للي بكتبه موجود.. انا لا املك نفسي ولا افكاري.. كلها حاجات بتتحدف جوايا وبتتفاعل مع بعضها واللي بيطلع بحطه هنا عشان عشان حد منكم معدي ينكش في الكركبه دي يمكن يلاقي حاجه ياخدها زي ماهي ويمكن يلاقي حاجه ياخدها ويحطها مع حاجه تانيه يعملوا حاجه جديده ويمكن مايلاقيش حاجه ويتدور ويمشي... الحاجات دي مش دايما بتجيلي من حد اقدر اقوله شكرا ولا العن ابوه عشان كده مالهاش لازمه ان حد يشكرني او يلعن ابويا :).... والتشات بوكس موجود تحت برده عشان لو حد عايز يقول كلمتين اهو نهفلط سوي :)

كائناتي المشوهة وبجعتي الحزينة

دايما في كشكولي بشخبط وانا في الشغل،، ودايما برسم حاجات متنفعش تبقي نفسها معرفش ليه... يعني لابرسم النمله نمله ولا القطه قطه... لازم تكون زي البني ادمين بس مبتسمين وبيضحكوا.. ولو رسمت بني ادمين مبعرفش ارسمهم مبتسمين... لكن البجعه العجيبه اللي رسمتها كانت حزينه... مع اني مش حزينه ولا هي مبوزه بس شكلها حزين..... البجعه دي مش شبه البجع بس انا مسمياها بجعه...... شبهي اوي البجعه دي... اصلي انا كمان بقيت خطوط مجرده زيها....... بقيت شويه دواير وكام خط منكوشين مع اني لسه شبه البني ادمين
مشعارفه ليه مبشوفش السطور اللي في الصفحه... شخابيطي دايما مالهاش علاقه بالسطور... كتاباتي مايله ورسوماتي لا بتبدأ ولا بتنتهي فوق السطور مع اني لو بشخبط في صفحه بيضا منغير سطور بلاقي الدنيا اتكركبت في نص الصفحه.... يمكن السطور بتحسسني ان لسه في حته فاضيه في حين ان الصفحه البيضه بتضيعني فيها

بيت الأفكار

اعظم الحلول اتولدت فى اغرب المواقف... نيوتن بدأ تحت شجره وارشيميدس لقى الحل فى البانيو

Karioka

الست دى تمثل بالنسبالى الأنثى المصريه الصميمه... ده مفهومى عن الانوثه بكل خيرها وشرها.. حلوها ومرها... طيبتها وشراستها... امومتها وقسوتها.. حتى فى مياصتها ودلعها... كل ده كان فى ادوار تحيه كاريوكا.. عملت الست المصريه كويسه والوحشه والام والرقاصه وكل حاجه... واتقنت كل الأدوار دى بصراحه... تحيه كاريوكا كت بتابعها بعيون مفتوحه على وسعها وانا صغيره عشان اتعلم منها الرقص واتعلمت منها بجد حاجات كتير غير الرقص... الست دى تدرس فى كتب فعلا.... ومهما كانت بتمثل دور واحده رخيصه عمرها ماكانت بتبقى مبتذله ولا عمرى كنت اتكسف اتفرج عليها وانا فى حجر ابويا... ازاى بقى العظمه دى كلها هتعملها الجربوعه فيفي عبده؟؟؟؟؟؟؟؟؟؟؟؟ فيفى عبده النقيض بتاعها تماما.. مبتعرفش تبقى محترمه مهما حاولت تنضف نفسها.. دايما مبتذله ورخيصه وياريتها حتى بتعرف ترقص.. فيفى عبده بترقص رقص كباريهات درجه تالته.... فى حين ان تحيه كاريوكا غيرت وجه الرقص الشرقى.. ازاى مجرور الخره يعمل نفسه كوز عسل!!!!(حلوه كوز عسل دى اقتبستها من ابويا نياهاهاهاها)

روقان

فى احدى الكافيتيريات فى الهواء الطلق تجلس فتاتين على احدى الترابيزات.. تنظر احداهما الى التمثال الموجود فى احد الاركان ثم الى صديقتها وكان ان دار هذا الحوار
- بت..
- نعم
- تفتكرى التمثال اللى هناك ده احساسه ايه تجاه المناظر اللى بيشوفها كل يوم دى؟
-مشعارفه.. بس اكيد بيضحك كتير على الهبل اللى بيشوفه كل يوم
- ده شاف يامه تلاقيه... ليه يارب ماعملتنيش تمثال
- او فازه

ايتها المركبه الفضائيه فلتحملينى الى ابعد كوكب عن كوكب انصاف الألهه والمدعين

يالله زيطه بزيطه بقى قرر العارف بالله المبجل عمرو خالد- ازاح الله التلوث من فضاءه الجوى- ان يتوجه الى الأراضى الطاهره لقناة اقرأ ليدلى بدلوه بشأن قضيه الدنمارك المثيره للجدل. هذا وقد تقرر ان تذاع خطبته الكريمه 3 مرات... لازم تلاته مطابقة للسنه الكريمة يا احبائى

وزى ماحنا عارفين دلوقتى مصير الدنمارك متعلق بما سيدلى به العارف بالله المبجل عمرو خالد فى هذه الخطبه

وعلى رأى المثل... ارمى القرش على ودن القرد يلعب

Um A frog.. Reddit.. Reddit..

You Are A: Frog!

Independent yet still part of a large community, frogs are unique creatures known for their distinctive sound and ability to hop. As a frog, you spend your days sitting on lily pads or climbing trees, searching for delicious insects to eat. While there are some frogs that aren't exactly cute, you are certainly not one of those!

You were almost a: Bear Cub or a Kitten
You are least like a: Duckling or a GroundhogCute Animal Test!

My Dante's Inferno Test Result

The Dante's Inferno Test has sent you to Purgatory!
Here is how you matched up against all the levels:

Level	Score
Purgatory (Repenting Believers)	High
Level 1 - Limbo (Virtuous Non-Believers)	High
Level 2 (Lustful)	Low
Level 3 (Gluttonous)	Very Low
Level 4 (Prodigal and Avaricious)	Low
Level 5 (Wrathful and Gloomy)	Low
Level 6 - The City of Dis (Heretics)	Very Low
Level 7 (Violent)	Low
Level 8- the Malebolge (Fraudulent, Malicious, Panderers)	Moderate
Level 9 - Cocytus (Treacherous)	Low

Take the Dante's Inferno Test

عروس البحر

يلسعني البرد في اخر الليل علي شاطيء البحر.. المح ظلا على الشاطىء فاختبىء خلف كتله صخريه لاتبين كنه الظل... ادقق النظر قليلا فأرى الظل انثى. ذات شعر طويل مموج وترتدى على رأسها تاجا ذو فصوص براقه مصنوع من احجار لا اعلم لها اسما.. اما بقيه جسدها فهو شبه عار الا من رداء غريب لايكاد يغطى صدرها ونصفها السفلى تغطيه امواج الشاطىء فلا استبينه جيدا.... اسمع حفيف خطوات فاتاكد من اننى مختفٍ تماما خلف الصخره... يظهر رجلا يخطو بثقه متجها نحوها يجلس بجوارها صامتا... تشعر بوجوده فتبتسم وتتحسس وجهه بهدوء كما يفعل المكفوفين ونظراتها معلقه فى الفراغ... ثم تقبله فى شفتيه... يتناجيان لساعات طوال وانا ارقبهم فى هدوء الى ان انصرف الرجل.. عندها استدارت فى جلستها ليبدو لى نصفها السفلى المخبا فى الماء فاتسمر مكانى من الدهشه. انها عروس البحر!!!!!!!!!!!!!!!!!!!. تغطس فى الماء بهدوء وتتركنى اسير دهشتى...

يوقظنى ضوء الفجر المقتحم عينى فى قسوه لاجد نفسى مكوما خلف نفس الصخره.. استرجع ذكريات الليلة الماضية فانتهى الى انه كان حلما.... يمر يومى بلا احداث مهمه تخرج عقلى من التفكير فى احداث حلم الليلة السابقه.... ظللت ساهرا طوال الليل خلف نفس الصخره لعدة ليالٍ متواليه فلم ار احدا فأيقنت بعد الليلة الرابعة انه كان حلما... لا ادر كم من الليالى مرت حتى تكرر نفس الحلم مرة ثانيه وثالثه ورابعة... اللعنه.. لابد وان الخرف قد اصاب ذهنى.... لم اجروء ان احدّث احدا عما اراه فى الليل فمن سيصدق بوجود عروس البحر.. لكننى صرت الان موقنا ان ما اراه حقيقة واقعه لا مراء فيها.. فقد حدث منذ حوالى اسبوع ان رجلها الغامض لم يأت.. وتكرر انتظارها له فى عده ليال وكل ليلة لا يأت .. وفى كل ليلة تترك له على الشاطىء ورده قبل ان تنصرف... وهاهى الوردات الثلاث بين يدى.. كلا ليس هذا بحلم او تخريف.. ولكى اتأكد تماما ساذهب اليها اذا لم يأت رجلها الغامض واستطلع حقيقه الامر... انتظرت حتى اتى الوقت المعتاد وذهبت الى الصخره وانتظرتها الى ان ظهرت ومر الوقت دون ان يأتِ رجلها الغامض... لم يعد من المنطقى ان يظهر الآن.. فاستجمعت شجاعتى وذهبت اليها.. انتفضت عندما سمعت حفيف خطواتى على الرمال وهتفت فى لهفه" حسن؟؟؟؟؟؟". اجبتها بالنفى فأجفلت.. قلت لها بأننى حارس هذا الشاطىء واننى اراها كل ليله تنتظر رجلا لا يأتى... فاخبرتنى بانها ابنه ملك البحار وحدث يوما ان غرق مركبا وانها انقذت واحدا من ركابها وكان هو هذا الرجل الذى يأتيها كل ليلة.. وقد وعدها بالزواج ووافق اباها..وأنه قد كان من المفترض ان يتم زفافهما فى اول ليله لم يأت فيها.. وقد اعدت مراسم العرس فى قاع البحر ولكنه لم يأت.. وهى لا تعلم ماحدث له.. وفى كل ليله تخرج للقياه ولكنه لا يأتِ.... فرق قلبى لها ولحالها واردت ان احطم وجه هذا الندل.. فمن يكسر قلب انثى لها مثل هاتيك العينان حتى وان كانت مكفوفه.. ظللت اواسيها حتى اشرقت الشمس وافترقنا عندما غالبها النعاس.. صرت اؤنسها كل ليله وحبيبها الغائب لا يعود من غيابه.. وظللنا على هذه الحال لمدة طويله.. مدة كافيه لأن أغرق فى حبها واعدها بالزواج... وحينما جائت الليلة الموعوده تهيأت للقياها وذهبت... عندما اعود سأكمل بقية التفاصيل عن العرس وكيف جرى...

اقفل حارس الشاطىء دفتر يوميات الحارس السابق له فقد التحق بالعمل عوضا عنه بعد ان وجدت جثته طافيه على شاطىء البحر ولم يعلم احدا كيف غرق... وفى الليل سمع صوتا شجيا يغنى فذهب ليستطلع الامر.. ليجد انثى. ذات شعر طويل مموج وترتدى على رأسها تاجا ذو فصوص براقه مصنوع من احجار لا يعلم لها اسما.. اما بقيه جسدها فهو شبه عار الا من رداء غريب لايكاد يغطى صدرها ونصفها السفلى تغطيه امواج الشاطىء فلا يستبينه جيدا.... وعندم يقترب منها تتوقف عن الغناء وتهتف فى لهفه " حسن؟؟؟؟؟؟؟"... فيجلس بجوارها ليستطلع امرها......... فتحكى له عن حسن الذى وعدها بالزواج ولم يأتِ ابدا... وظلا يلتقيان كل ليله....

حتى حدث ان وجدت جثته طافيه على الماء ذات صباح... وبعد ان وجدت جثة الحارس العاشر اقفل الشاطىء تماما ولم يعد حارسا يبيت ليلا هناك بعد ان ذاع امر عروس البحر التى تنتظر حسن الذى لا يأتِ وكل من ذهب اليها سواه يغرق

مولد سيدى الدنمارك

نفسى مره فى حياتنا نتخذ موقف صح عليه القيمه.. الكاريكاتير اللى معمول على الرسول مستفز للغايه ده شىء لا خلاف عليه بس الرد على الموضوع ده مش بالمقاطعه والكلام الفارغ اللى احنا بنعمله ده . الرسول عليه الصلاه والسلام نبينا احنا لكن بالنسبالهم هو واحد روج لمبادىء شخصيه زيه زى لينين وماركس... بدل نظام الغازيه لازم تنزل اللى احنا لسه عايشين بيه ده مفروض نتعلم بقى يعنى ايه حوار ومناقشه مع الناس اللى شايفينا غلط. الناس دى لا شافوا الرسول ولا عرفوه ولا يعرفو ا حاجه عن الاسلام كما هو.. مفهومهم ان المسلمين زى مفهومنا احنا عن بتوع افغانستان.. ناس بجلاليب ودقون وقنابل ومدافع رشاشه وستات منقبه والرجاله مستنيين يموتوا عشان يتجوزا عذارى فى الجنه. موضوع المقاطعه سهل جدا وبسيط خالص مع دوله زى الدنمارك منتجاتها ليها الف بديل على نفس الكفاءه لكن هل هو ده الحل؟؟؟؟؟؟؟ ... لو هنرجع لسيره الرسول عليه الصلاه والسلام وشفنا ابسط موقف اللى كلنا حافظينه من ايام المدرسه.. جاره اليهودى الى كان بيؤذيه بالكلام ويحطله زباله قدام بيتهم... هل المسلمين قاموا بمقاطعه قريش؟؟؟؟؟؟؟؟ والا عملوا عرايض شجب وتنديد تطالب بمنع اليهود من سب النبى؟؟؟؟ طبعا هتقولوا كانوا قله وموقفهم غير مؤثر.. هسأل وايه الفرق دلوقتى؟؟ ماحنا عدد فى اللمون مالوش اى لازمه!!!........ كل مصيبه نقعد نِحزَق ومفيش حاجه بتتغير.. الرسول عالج الموقف بمنتهى البساطه.. عامل الراجل اليهودى بخلق الاسلام........ لحد ما الراجل غير فكرته عنه وعرف يعنى ايه اسلام. هو ده نفس الموقف دلوقتى..... الناس فى كل حته شايفين الاسلام غلط اعتقد ان الاوان بقى اننا نوريلهم الاسلام عامل ازاى.. يعنى احنا نحترم نفسنا ونتخلق بخلق الاسلام قبل مانقعد نرفّص زى الحمير الضرّاطه ....... انا جالى حوالى عشرين ايميل بيطالبونى بالمقاطعه وبيلطموا ويولولوا على هيبه الرسول الضايعه.. بس لامؤاخذه ماحنا اللى ضيعناها.. الناس دى مش بتتريق على الرسول دول بيتريقوا علينا احنا واستخدموا اسمه كرمز لينا... كبيرنا يعنى والزعيم بتاعنا.... احنا اللى هزأنا الرسول باخلاقنا الغلط وتصرفاتنا الغلط.. المفروض احنا اللى نعتذر للرسول قبل غيرنا... عايزين نقاطع لابداء استياءنا؟؟؟ ماشى وماله بس وبعدين؟؟ وبعد مانقاطع؟؟؟؟؟؟؟؟....طيب هنقاطع ليه عشان يعذروا؟؟؟ ماشى حقنا يعتزروا عن غلطهم وبعدين؟؟؟ بعد مايعتذروا ايه اتغير؟؟؟ ولا حاجه... برده هيفضلوا شايفينا راهابيين ومتعصبين ......كل اللى احنا عايزين نعمله دلوقتى اننا نطالب الحكومه الدنماركيه بقمع مواطنيها.......... كتنا ستين وكسه ماحنا لو كل واحد شافنا وحشين حطنا بلاستر على بقه نبقى بنغيب نفسنا.... بنعمل زى الديكتاتور العبيط الى فاهم انه عشان بيحط معارضينه فى المعتقل يبقوا بطلوا يعارضوه. والمضحك بقى ان ولا ايمايل من اللى جم دول فيهم صوره للكاريكاتير. استنتج من كده ان تلات ارباع الناس هايجه ومايجه منغير مايشوفوا حاجه اساسا........ وارمين عالسيره....... الكاريكاتير ده معمول من شهر 9 اللى فات وجالى على المايل وقتها. دمى اتحرق بس قلت ماهى غلطتنا احنا اللى سايبين الصوره دى مزروعه فى دماغهم. .. احنا فين بقى من ساعتها. وايه اللى فوقنا فجأه دلوقتى؟؟؟؟ والايميلات اساسا اللى بتيجى بقى اليومين دول مستفزه. جايلى مايل عشان امضى على بيتيشن يموت من الضحك لانه حول الامر فى الاخر مطالبه الحكومه الدنماركيه ببوس راس ( مشيها راس وخليكوا مؤدبين) المسلمين ولا حد جاب سيره الرسول فى حاجه وخدوا عندكوا اهه

"أخواني واخواتي ساكتب لكم رابط موقع هدفة تجميع مليون توقيع وهدفةهوتقديم عريضة للحكومة الدينماركية تحت عنوان ( إهانةوجرح مشاعر 1بليون مسلم ) على أمل أن تمنع الحكومة الدينماركية هذه التصرفات غيراللائقة وأن تقدم الصحيفة اعتذاراً لجميع المسلمين وأن ترجو منهم السماح"

اللى هو يا صباح التهريج!!!!! نمضى البيتيشن ونرفق معاه اغنيه طلب السمح حبيبى لمحمد منير!!!!!!!!! متشكره جدا مابحبش حد يبوس راسى عشان بقشعر مش ماضيه البيتيشن.... والغريبه ان الناس اللى بعتو الايميلات دى هم نفس الناس الى غاويين فوروارديد ايمايلز... الموضوع بقى موده هو راخر.. مولد... مولد سيدى الدينمارك وشى لله يا عافيه...........

ومايل تانى بيقول احنا لازم نقاطعهم الى الابد حتى لو اعتذروا...........ايه يا جماعه التخريف الىل احنا بنخرفه ده!!!! هى دى اخلاق الاسلام اللى الناس مدعيه انهم محموقين عشانه؟؟؟؟؟؟؟؟؟...... هو الرسول قال اللى يعتذرلك ماتقبلش اعتذاره؟؟؟؟؟؟؟.........

ده غير بقى الناس اللى بتهيص فى الزحمه اشاعات بقى يا خراشىىىىىىىىىى

" الله اكبر والعزه لله لقد وجدت جثه الذى رسم كاريكاتير الرسول محروقه بجوار مقر الجريده بالدنمارك"

الضحك بقى انها كانت مسابقه وكذا واحد مشتركين. طيب مش اللى يطلع اشاعه يسبكها!!!!!!!!!!

ورساله تانيه على الموبايل بتقول الدنماركيني هحرقوا المصحف يوم السبت عشان احنا اعلنا المقاطعه ادعوا الله ينكل بيهم ويخسف بيهم الارض......... الكلام ده بييجى منين!!!!!!. انتوا فاكرين الدنمارك دى مصر الناس بتاخد اذن قبل ماتعمل مظاهره!!!!!!!!!!. ازاى عرفنا بقى المعلومه العظيمه دى!!!!!!!!!

حاجه تفقعععععععععععععععععععععععععععععععععععععععععععععععععععععع

بجد انااتخنقت من الناس مدعين الاسلام..... الكاريكاتير ده كف اتلزق على قفا كل مسلم عشان نفوق ونشوف منظرنا بقى ايه قدام الناس والمأساه اننا مفقناش ولسه بنتصرف زى الغنم. صدق الرسول اما قال اننا هنبقى زى غثاء السيل....... يعنى هنبقى مسلمين كتييييييييييييييييييييير ومالهمش ربع لازمه. فوقوا بقى جرَّستونا قدام الخلق

الوحيد اللى اتصرف تصرف معقول كان صاحب بلوج يحيى عياش اما قال انه هيعمل مقالات عن الرسول ويترجمها بكذا لغه.......

---------------------------

الضُراط: لفظه عربيه فصيحه واعتقد كلكوا عارفين معناها

الضرَّاط: صيغة المبالغه منها

الامود.. الافرانكا

عندما تتحول ابسط الاشياء الى موده سخيفه فاننى اجعل ممارستى لها سرا من اسرارى... عندما كنت فى الثانيه عشره من عمرى اتجهت الى ممارسة اليوجا وعندما وصلت الى المرحلة ا لجامعيه كانت اليوجا موده وكن الفتيات دوما مايثرن احاديث غايه فى المسخره عن اليوجا كما لو انها احدى الطقوس النسائيه التى تمارسها الانثى فى الحمام لتبدو اكثر نضاره.. فتمرين اليوجا الفلانى مفيد لصغيرات الاثداء والتمرين الآخر مفيد لتقليل حجم الارداف.. فمن الطبيعى والمنطقى ان يصبح دربا من دروب العبث اية محاوله لاقناع هاتيك الفتيات المسكينات ان اليوجا فلسفه يا بنات.. اليوجا رياضه ذهنيه.. تتحول كل تلك الكلمات لشعارات بارده لا طعم لها كشعارات التيار الاسلامى.. الاسلام هو الحل... فلم يعد احد يلتفلت لصحه الكلمات من عدمها ولم يعد احد يهتم بالمضامين..... مكتبة ديوان بقت موده.. كوبرى قصر النيل ووسط البلد موده.. ساقية الصاوى والاوبرا بقم موده.. فرقه وسط البلد وافتكاسات والدور الاول وزياد الرحبانى بقم موده.. الرحمه!!!!!!!!. اصبحت امارس كل متعى البسيطه فى سريه تامه كما لو اننى امارس الرذيله..حتى فى هذه الايام اصبحت الرذيله موده.. ياحلاوه ياولاااد...... اذا قلت لفتاه انها خجوله صرخت فيك مدافعه عن نفسها." انا مابتكسفش.. انت اصلك لسه ماتعرفنيش"...... ويتبارى الجميع فى مسابقات غير معلنه تحت شعار " مين فينا الاكثر قباحه"....ده غير طبعا الموده الاكثر خنقه " انا مشكلتى انى طيب ( هستخدم صيغه المذكر للدلاله على المذكر والمؤنث).. انا عيبى انى بثق فى الناس بسرعه... انا مش مضيعنى غير انى مبقدرش ازعل حد.... اللعنه!!!!! اصبح الكمال موده فى عالم يسوده النقص بشكل مخجل....... الا ايها الكاملون الطيبون الراشقون فى مكتبه ديوان بتفاخر ومرتادى ساقيه الصاوى والاوبرا بتفاخر وممارسى اليوجا بتفاخر ومدعى الطيبه والثقه وحب الخير والحق والجمال والمتشدقى بقراءة كافكا وصنع الله ابراهيم وسماع الموسيقى الكلاسيكيه و وجيه عزيز وعشق الباليه والفن التشكيلى..... فلتبتعدوا عنى ماستطعتم فقد اصيبكم بنجاساتى.. فأنا لست مثلكم.. انا ناقصه.. اعلم ذلك.. ويكفينى ذلك.. "حقق النتائج لكن لا تتشدق ولا تتفاخر ولا تتكبر.. حقق النتائج لان هذه هى طبيعة الحياة".

حجرتى الصغيره الصغيره

لو اننى وسقف حجرتى تبدالنا الاوضاع لبرهه!!!! فاننى اتمنى بشده ان ارى حياتى من الخارج.. ان اقف من نفسى ومن حياتى موقف المتفرج لارى كيف تبدو حياتى ... لو ان سقف حياتى ينطق ليخبرنى عن مدى سعادتى او شقائى!!!!!!!!!! فما ن مخلوق على وجه الارض يعرفنى حق المعرفه كسقف حجرتى وجدرانها.. التهمنى ذلك المكعب الاسمنتى منذ ان كنت فى العاشره من عمرى.. وها انا قد صرت فى الخامسه والعشرين ولم يزل لم يبتلعنى تماما ولم يلفظنى تماما وانما يلوكنى فى بطء .. اتراك ايها السقف حفظت ثقوب روحى كما احفظ الثقوب المحفوره على صفحتك البيضاء المستهلكه؟.. ام انك لم تعد تميزنى من بين كراكيبى التى ملات الغرفة

ماضاقت الا اما فرجت

تشير كل المرئيات فى حجرتى الى حيث كنت واقفا وتخرج لى السنتها بوقاحه... اذهب لاستطلاع الامر فاكتشف المأساه.. لقد خلّف حذائك خلفه بقعه طينيه.. اللعنه!!! مافائده منفضه الاقدام على عتبه بابى اذا!!!!!!!!...أكنس السجادة فى محاوله يائسه لإزالة البقعة الطينية...ولكن لاتزال البقعه حية ترزق و تخرج لى لسانها فى تحدٍ واضح...مما يزيد من ضحك محتويات الغرفه وتعلوا اصواتهم بضحك هيستيرى ووحدها السجاده تبكى، فهى تعلم ما يستلزم ازاله البقع من الفرك بفرشاة البلاط .... لابد من التنظيف بالماء فقد جف الطين العالق باطراف شعيرات السجاده... اهِمّ بطٌىّ السجاده وحملها للحمام لتنظيفها عندها تنشق الارض عن مدام نظيفه معلنه عن سائل جينيرال الجديد لتنظيف بقع السجاد.. والقطنه مابتكدبش

خلف زجاج الميكروباص

احب ركوب الميكروباصات التويوتا كثيرا خاصة فى الليل حيث استطيع ان ارى كل الاشياء فى حالتين.. معتمه او مضيئه لتستحيل المرئيات الا سولويتات بسيطه.. وتتحول الاشكال الى خطوطها الاوليه البسيطه.. وفى البساطه تتجلى اعقد الاشياء

اللبن المسكوب

دوما يتحول بكائى على اللبن المسكوب الى رقصه غجريه مرحه حوله.. فانا لا احب اللبن

استراحة قصيرة ثم ماذا بعد؟؟

ماذا بعد ان يتخلي عنك صديق؟؟؟.. تاركا اياك تصارع افكارك حتى تصاب بالحمى من مغبة التفكير.. وفى النهايه لا تستطيع ان تجد اية سبب منطقي لموقفه الذى لازال يبدو غريبا.. الحلول كثيره.. فاما ان تبدا فى محاوله استطلاع الامر : من كرم اصله لان لبه: ولابد ان يثوب الى رشده فى يوم من الايام... واما ان : سيب حبيبك على هواه بكره ييجى اللى يديله على قفاه:..... او قد تثور وتبدا فى صب جام غضبك عليه :ان كنت تظن نفس نصف اله فاعلم انك نصف بغل ونصف بقف:... او قد تبدا فى لوم نفسك حتى توشك على ان تكره نفسك تماما وتقنع نفسك ان الانتحار هو الحل الوحيد :كى تريح البشريه من اثامك وشرورك:... او قد لا تفعل كل ذلك وتقرر فى النهايه اختيار رد الفعل السلبى اهمال الامر برمته وتتركه فى حياتك كنبته يتحمل هو مسؤلية ريها بالكامل فان واصل ريها كان بها.. وان اهملها حتى ماتت وتحللت وتلاشت فهو شأنه ايضا. افضل دوما الخيار الاخير وان كان الشخص عزيزا اجرب اولا الاخيار الاول فان فشل فانه الخيار الاخير اذا

Tafaneen

Tafanen
my tafaneen blog is more active now, enjoy