23 Jul 2005

المذبحه

صحيت من النوم.. عادى... بشوف الساعه كام لقيت الموبايل فاصل شحن... عادى... فتحت الكمبيوتر اشوف الساعه كام لقيتها الساعه 2... عادى.. قمت اتوضيت وصليت الضهر.. عادى .. عملت نسكافيه وفتحت المسنجر... لحد هان كله عادى.. لقيت لست ادرى داخله بتقولى شفتى المهزله؟؟؟؟؟؟؟؟ مهزله ايه يابنتى؟ تفجيرات فى شرم الشيخ مات 85 وانصاب 200 و23 فى الانعاش...... قلبى وقع فى رجليه اما سعمت الارقام دى!!!!!!!! ايه ده!!!!!!!! دى مذبحه... اديتنى لينك اقرا الخبر..لقيت من ضمن الاماكن اللى اتفجرت فندق غزاله..... يانهار اسود!!!!!!!!! يوم الاربع كان فى واحده زميلتنا بتتخانق مش هسافر غزاله يعنى مش هسافر غزاله عشان لينا دعايه هتتعلق على شط غزاله عن المجلات بتاعتنا!!!!!!....... مين ممكن يعمل كده بجد ياناس حرام كفايه دم بقى الله يحرقكم....... هم بيستفيدوا ايه غير دم سايح وترويع الآمنين؟؟؟؟؟؟؟؟ الرسول نهى عن ترويع الآمنين..... طيب فى لندن وامريكا بيخلصوا تار العراق لكن عندنا هنا ليه؟؟؟؟؟؟؟ ....... شىء مقزز الدمويه اللى الناس بقت فيها.... وكل يوم بيبان تخلف جهاز الامن عندنا فالحين بس يقلعونا هدومنا على بوابات الاوبرا اما يبقى فى وزير رايح والا حاجه لكن الناس اللى ماشيه فى الشوارع دول ناس رخيصه ماتستاهلش الحمايه والناس اللى بتصيف دول ناس مش من هنا يالله بقى ملعون ابوهم..... ياخى ملعون ابو حبيب العدلى الف مره... ايه الخنزير ده!!!!! ...... يعنى فالحين بس يتحرشوا بالناس الغلابه فى الشوارع بطاقتك فين ياروح امك وايه منزلك الشارع بالليل ..... امبارح وانا معديه من قدام التليفزيون شفت منظر غايه فى الكوميديا....... مجموعه ضباط تحت شجره قدام التليفزيون واتنين عساكر فى بلكونه اول دور فى التليفزيون وشويه عساكر منطورين على الرصيف....... المضحك بقى انه من السهوله ان واحد يطلع على الشجره قبل اللى هم قاعدين تحتها من بالليل ويبات لحد هم ماييجوا وينشهم كلهم باى بندقيه سريعه الطلقات واحد واحد او حتى مسدس تافه كاتم للصوت ومش هيعرفوا هو فين..... او حتى يزرع قنبله على الشجره اللى هم قاعدين عليها ويفجرها عن بعد..... قعدت اضحك اما انا البنت الغلبانه اللى مناليش فى الطور ولا فى الطحين وفكرت فى كده امال لو حد بقى عنده الامكانيات هيعمل ايه؟؟؟؟؟؟؟ وجه الرد على سؤالى النهارده اول ماصحيت من النوم... هيعمل اللى حصل فى شرم الشيح........ بجد مجموعه هائله من الالفاظ القذره متزاحمه فى زورى مشعارفه اقول انهى فيهم الاول!!!!!!!!!!.. بابا دخل دلوقتى بيقولى القاعده اعلنوا مسؤليتهم عن تفجيرات شرم الشيخ..... بيعلنوا مسئوليتهم وكأنه فخر ليهم احنا اللى قتلنا الناس اللى مالهاش ذنب... ايه القرف ده...... طيب الناس ذنبها ايه!!!!!!!! هو الناس اللى بعتت السفير؟؟؟؟؟؟؟ طيب ماحنا مش موافقين والشعب هايج عليهم بسبب ارسالهم للسفير.. الحكومه وحدها تتحمل هذه المسؤوليه بالكامل عايزين يعاقبوا حد مايروحوا يجيبوا كرش الخنازير اللى بعتوه ... وبعدين مين هم اساسا ولاد الكلب دول عشان يعاقبوا حد هم خلاص بقم هم اولى الامر!!!!!! هم اولياء امر المسلمين ومن حقهم ينفذوا اللى هم بيسموه شرع الله !!!!!!!!!!!! ياخى .... بجد احنا هنفضل فى البتنجان ده لحد امتى يعنى هو كل واحد يلبس جلابيه بيضا يقولك انا مسلم يا كفره ياولاد ال....!!!!!!!!

19 comments:

4thH said...

I'm to sad to comment

littilemo said...

بالرغم من اللى بيحصل غلط وان الناس دى غلطانه
بس معذروين
زى الولد بتاع الازهر واصحابه
الل حولهم لقتله هوالجانى واحنا عارفين حجم الحريه اللى فى بلدنا اللى اصغر من خرم الابره

أحمد said...

يا راجل
لا و الله
شوف ازاى
----------
مسخرة

AZ said...

معلش لو سمحت ماتخلطش بتوع الازهر وتنظيم القاعده عشان الفرق شاسع؟............ فى فرق كبير اوى بين العمل الفردى اللى عملوه بتوع الازهر اللى طافحين المر من الجوع والفقر والجهل دول احنا كلنا كمجتمع وحكومه مسئولين عن افراز مثل هذه الشخصيات لكن تنظيم القاعده بقى بروح اهاليهم اللى عاملين نفسهم الهه الكون بيعاقبوا من اساء دول بقى عذرهم ايه؟؟؟؟؟؟؟؟؟؟؟

unknown said...

أعتقد انهم شايفين شارم معقل للفساد حبو ينقوها

ما هى كل حاجه غلط

Aladdin said...

من يستطيع إزالة ميراث الحقد الأسود اللي بين العرب وبعضهم البعض (أولئك العرب الأوساخ الذين يعتقدون أن وجود "إسرائيل" بيننا بينهم "أأمن") يقدر يمنع الأحداث دي إنها تحصل من الأول.

م الآخر، الموضوع لا علاقة له بالقاعدة، ده اسم (شايفينه كبير) بيتمسحوا فيه (زي الكلب الصغير اللي ولا مؤاخذة بيتمسح في صاحبه).

sydalany-وش مكرمش said...

أنا كنت متنرفز و عملت زيك كده و عملت بوست ع الساعة 7 الصبح


و من 7 لغاية دلوقتي حاسس إن دماغي حتضرب
شغالة على سؤالين
لييييييييييييييييه؟
و ميييييييييييييييين؟

حكاية تنظيم القاعدة مش داخلة دماغي ما ممكن أي حد يعمل حاجة و ينسبهالهم
و لو تابعنا العمليات الإرهابية بتاعتهم حنلاحظ إن الحوادث بتأثر على الأجانب أكتر
لكن ولاد الكلب دول فجروا ف سوق تجاري ده غير الفندق ده غير موقف العربيات يعني مصريين بالهبل

بلاش
نفرض إنه تنظيم القاعدة
إيه مصلحته
وإيه مصلحة أي حد

ملحوظة:إعلامنا نجح نجاح تام ف إنه يقنعنا إن أي واحد ربى دقنه أو لبس جلابية إرهابي و ده باين في كلام ناس ياما ع البلوجر و برا البلوجر

Zeryab said...

اللهم اشكو إليك ضعف قوتنا وقلة حيلتنا وهواننا على من تكلم باسمك وذبح باسمك واسم نبيك يا أرحم الراحمين يا أرحم الراحمين يا أرحم الراحمين انجدنااااااااااااااااااا
انجدنى يارب واللهمنى تلك المرة ألا أهرب من بكائى

Anonymous said...

Tomorrow the 24 of July at 5:30pm on the 6 of October bridge between Zamalek and Tahrir. There will be banners available but you are encouraged to bring your own. It should last until sunset.
This is not for foreign media. This is to send a message to elements in our own communities. We need to tell these bastards that they are not welcome here.
Keep it decent. Park your cars in Zamalek, Don't bother traffic and stay civilized.
Wear white tee shirts. "
Karim Elsahy
http://onearabworld.blog.com/267610/

Mr-Biboooo said...

حسبى الله و نعم الوكيل
امين يا زرياب

littilemo said...

انا خلاااااااااااااص
معنتش فاهم حاجه

Lasto-adri *Blue* said...

طب حتى لينك لــ"لستُ أدرى" ديه
:D

ibn_abdel_aziz said...

طب منتي اهوه كاتبة مقالة طويلة :)

اشمعني انا يعني ؟؟

واللا اتعديتي مني ؟

ربنا يكرمك ان شاءالله

AZ said...

um not suporting what happened in london but when someone do this in london i can understand his reasons why while i cant find a single reason to explain what happened n sharm el shee5

Aladdin said...

Read my comment in Lonewolf's blog. It might be of help!

أحمد said...

هو مين الاخ اللى بيدافع عن بتوع الازهر و بيقول الكلام بتاع طافحين الكوته و الجوع و شوية الافشخنات بتاعة الفقرا بتاعة افلام سى عاظف الطيب دى ؟؟؟؟؟؟!!!!!!؟؟؟؟؟؟


اتفضلوا كل بيهاجم الارهاب ، وواحد جاى يقولك بتاع الازهر لا حاجة تانية خالص ، و بعدين لما ناخد في راسنا نرجع ندور زى الهبل مين اللى ضربنا و احنا اللى زى المساطيل قاعدين نفرخ ارهاب و تتطرف و قتل

من البلد دى خرجت افكار سيد قطب و الزمر و الظواهرى ، و خرجت الجماعات المسلحة و القتال من اجل الدين و فقه الفريضة الغائبة ، الاخت اللى بتقول ان بتوع القاعدة يروحوا بلدهم

معلهش هى القاعدة دى طالعه منيين؟؟
ايمن الظواهرى منين ؟؟
محمد عطا منيين؟؟؟

بلاش مسخرة

طول ما في ناس موجودين يدافعوا عن الارهاب و يحاولوا يبرروه بحجة الفقر و الجوع و الحكومة الوسخة ، طول ما هيفضل فيه ارهاب و قتل و تفجير

طيب ما الشعب كله طالع عين ، نروح بقي نعمل حفلة تفجير جماعى في ميدان التحرير ونفجر نفسنا علشان الحكومة وسخة و احنا عايزين نروح الجنة

AZ said...

لو ماعندكش اسلوب اكثر احتراما فى الرد على الناس يا اخ ابليس يبقى ياريت تحتفظ بكلامك لنفسك... عندك البلوج بتاعك سب لاللى يعجبك لكن عندى هنا لو سمحت يا تحترم الناس اللى بتكلمها يا بلاش منه احسن

Lasto-adri *Blue* said...

جدعة يا إيه زى
كنتى فين من زمان وإنتى عرفانى مليش فى الرد ع الناس دى

AZ said...

فى فرق بين التبرير ونسبة الاشياء الى مسببها.. انك تقبض على كل واحد حاول يفجر نفسه وفشل او اهل واصحاب كل واحد حاول يقوم بعمل ارهابى ونجح مش ده اللى هيحل المشكله... المشكله مش فى التنظيمات الارهابيه المشكله تكمن فى اسباب تكونها اساسا؟؟؟؟؟؟؟ظ ايه السبب اللى دفع واحد زى محمد عطا ده انه يقع فى ايد جماعه زى دى تعمله غسيل مخ؟ وايه اساسا اللى خلى جماعه زى دى موجوده؟؟؟؟
فقر-انعدام وعى- جهل دينى مجتمعين فى واحد شايف ناس عايشه بالطول والعرض وراكبه عربيات وهو متدلدل من الاتوبيس ابو ربع جنيه اللى بيلف الكره الارضيه.. وفجاه يجيله واحد يقوله دول ولاد كلب رايحين النار وانت كويس هتخش الجنه دول وحشين وانت كويس واعمل كذا وسوى كذا وانت تخش الجنه..... تفتكر مش هيمشى وراه؟؟؟؟؟